ବରଗଡ: ପାଇକମାଳ ସ୍ଥିତ ଲଉଡମାଲ୍ ଗ୍ରାମର ମହାମାୟା ପବ୍ଲିକ ସ୍କୁଲର ନୂତନ କୋଠରୀ ନିର୍ମାଣ କାର୍ଯ୍ୟ ଚାଲିଥିବା ବେଳେ ଛାତ ଉପରୁ ଖସିପଡି ଜଣେ ମହିଲାଙ୍କର ମୃତ୍ୟୁ ହୋଇଛି | 61 ବର୍ଷୀୟା ଏହି ମହିଳା ଜଣକ ନିର୍ମାଣଧୀନ ସ୍କୁଲରେ କାମ କରୁଥିବା ବେଳେ ଛାତ ଉପରୁ ତଳକୁ ପାହାଚ ଦେଇ ଆସିବା ସମୟରେ ପାଦ ଖସିଯିବାରୁ ତଳକୁ ପଡିଯାଇଥିଲେ | ଗୁରୁତର ଅବସ୍ଥାରେ ତାଙ୍କୁ ସ୍ଥାନୀୟ ଡାକ୍ତରଖାନାକୁ ନିଆଯାଇଥିଲେ ମଧ୍ୟ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି । ଏହି ଘଟଣାରେ ପାଇକମାଳ ଥାନାରେ ଏକ ମାମଲା ରୁଜୁ କରାଯାଇଥିବା ବେଳେ ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଜାରିରଖିଛି ।
ବଡଗାଁ ଗ୍ରାମର ୬୧ ବର୍ଷୀୟ ମହିଳା ଜାନକୀ ବିଶ୍ଵାଳ ପ୍ରତ୍ୟେକ ଦିନ ପରି ଗୁରୁବାର ମଧ୍ୟ କୁଲିମଜୁରୀ କାମ କରିବାକୁ ଆସିଥିଲେ । ସକାଳ ପ୍ରାୟ ୧୦ଟା ସମୟରେ କାର୍ଯ୍ୟ କରୁଥିବା ବେଳେ ଛାତ ଉପରେ କୌଣସି କାରଣରୁ ପଡି ମହିଳାଙ୍କ ମୃତ୍ୟୁ ହୋଇଯାଇଛି । ସଙ୍ଗେ ସଙ୍ଗେ ମହାମାୟା କର୍ତ୍ତୃପକ୍ଷ ମହିଳା ଜଣଙ୍କୁ ପାଇକମାଳ ସରକାରୀ ଡାକ୍ତରଖାନା ନେଇଥିଲେ । ମହାମାୟା ପବ୍ଲିକ ସ୍କୁଲ ପକ୍ଷରୁ ପାଇକମାଳ ଥାନାରେ ଏକ ମାମଲା ରୁଜ୍ଜୁ କରାଯାଇଛି । ପାଇକମାଳ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଥିବା ଜଣାପଡିଛି । ତେବେ ମୃତ ମହିଳା ଜଣକ ଅତି ଗରିବ ମଜୁରିଆ ଶ୍ରେଣୀର ହୋଇଥିବାରୁ ତାଙ୍କ ପରିବାରକୁ ଆର୍ଥିକ ସହାୟତା ପାଇଁ ସ୍ଥାନୀୟ ଲୋକେ ଜିଲ୍ଲା ପ୍ରଶାସନଙ୍କୁ ଦାବି କରିଛନ୍ତି ।
ବରଗଡରୁ ରାଜେଶ ସରାପ, ଇଟିଭି ଭାରତ
