ବରଗଡ: ରଥଯାତ୍ରା ହେଲା, ହେଲେ କାନ୍ଦୁଛନ୍ତି ଭକ୍ତ | ଭଗବାନଙ୍କୁ ରଥରେ ଦର୍ଶନ ନପାଇ ଭାଙ୍ଗିପଡିଛନ୍ତି ବହୁ ଶ୍ରଦ୍ଧାଳୁ । କୋହଭରା କଣ୍ଠରେ କାନ୍ଦି କାନ୍ଦି ଭକ୍ତର ଭକ୍ତି ଭାବ ପ୍ରକାଶ କରିଛନ୍ତି | ମହାମାରୀ କରୋନା ଯୋଗୁଁ ପଶ୍ଚିମ ଓଡିଶାର ଶ୍ରୀକ୍ଷେତ୍ର କୁହାଯାଉଥିବା ବରଗଡ ଜିଲ୍ଲା ଭଟଲି ଦଧିବାମନ ମନ୍ଦିରରେ ଭଗବାନ ଜଗନ୍ନାଥଙ୍କର ଚଳିତ ବର୍ଷ ବନ୍ଦ ହୋଇଯାଇଛି ରଥଯାତ୍ରା | ଯାହାକୁ ନେଇ ଭକ୍ତ ମାନେ ଦୁଃଖର ସାଗରରେ ଭାସିଯାଇଛନ୍ତି |
ଦୀର୍ଘ 300 ରୁ 400 ବର୍ଷ ହେବ ଭଟଲି ଦଧିବାମନ ମନ୍ଦିରରେ କେବେ ମଧ୍ୟ ଏପରି ରଥଯାତ୍ରା ବନ୍ଦ ହେବାର ଇତିହାସ ନାହିଁ ବୋଲି ସ୍ଥାନୀୟ ପୁରୁଖା ଲୋକେ କହିଛନ୍ତି | ପଶ୍ଚିମ ଓଡିଶାର ଶ୍ରୀକ୍ଷେତ୍ର ମାନ୍ୟତା ରହିଥିବା ଭଟଲି ଦଧିବାମନ ମନ୍ଦିରକୁ ସମଗ୍ର ପଶ୍ଚିମ ଓଡିଶା ତଥା ପଡୋଶୀ ଛତିଶଗଡ ରାଜ୍ୟରୁ ହଜାର ହଜାର ଭକ୍ତଙ୍କ ଭିଡ ଜମିଥାଏ ପ୍ରତିବର୍ଷ ରଥଯାତ୍ରା ସମୟରେ | ପୁରୀ ରଥଯାତ୍ରା ସମୟରେ ଭଗବାନ ଜଗନ୍ନାଥଙ୍କୁ ଦର୍ଶନ ପାଇଁ ଯାଇନପାରିଲେ ଭକ୍ତ ମାନେ ଏଠାରେ ଦର୍ଶନ କରିଥାନ୍ତି | ପ୍ରତ୍ୟକ ବର୍ଷ ଭଟଲି ରଥଯାତ୍ରାରେ ଲକ୍ଷ ଲକ୍ଷ ଭକ୍ତଙ୍କ ସମାଗମ ହୋଇଥାଏ ହେଲେ ଚଳିତ ବର୍ଷ ଖାଁ ଖାଁ ଲାଗୁଛି ଭଟଲି ଧାମ | ନା ରାସ୍ତାରେ ଗଡୁଛି ଭଗବାନଙ୍କର ରଥ ନାଁ ରହିଛି ଭକ୍ତଙ୍କ ଭିଡ | ରଥରେ ଭଗବାନଙ୍କୁ ନପାଇ ମୁଣ୍ଡରେ ହାତ ମାରି ଦୁଃଖରେ ବସିଛନ୍ତି ଭକ୍ତଗଣ |
ବରଗଡରୁ ରାଜେଶ ସରାପ, ଇଟିଭି ଭାରତ
