ବରଗଡ: କୋରୋନା ସଂକ୍ରମଣରୁ ବଞ୍ଚିବା ସହ ଗ୍ରୀନ ଜୋନରେ ବରଗଡ଼ । ଏଥିପାଇଁ ଜିଲ୍ଲାପ୍ରଶାସନ ପକ୍ଷରୁ ସହରରେ ଥିବା ମଲ ସହ ପ୍ରସିଦ୍ଧ ବାଲିଜୁରୀ କପଡା ବଜାରକୁ ମଧ୍ୟ ଖୋଲିବାକୁ ଅନୁମତି ଦିଆଯାଇଛି । ଏହାକୁ ବିରୋଧ କରି ନିକଟସ୍ଥ ବହୁ ଗ୍ରାମବାସୀ ବୁଧବାର ଜିଲ୍ଲାପାଳଙ୍କ ଠାରେ ଅଭିଯୋଗ କରିଛନ୍ତି ।
ବେହେରା ଓ ବାଲିଜୁରୀ ଗ୍ରାମର ବହୁ ଲୋକ ଆସି ଏହି ବିରାଟ କପଡା ବଜାରକୁ ବନ୍ଦ କରିବାକୁ ଜିଲ୍ଲାପାଳଙ୍କ ଠାରେ ଦାବି ଜଣାଇଛନ୍ତି । ଏହି ବଜାରକୁ ଆଖପାଖ ଜିଲ୍ଲା ତଥା ପଡୋଶୀ ଛତିଶଗଡ଼ ରାଜ୍ୟରୁ ମଧ୍ୟ ବହୁ ବ୍ୟାପାରୀ ଆସୁଥିବା ବେଳେ ବାଲିଜୁରୀ ଏବଂ ବେହେରା ଗ୍ରାମର ପୋଖରୀକୁ ଗାଧୋଇବା ପାଇଁ ବ୍ୟବହାର କରୁଛନ୍ତି । ଯାହାଫଳରେ ସେଠାକାର ଲୋକଙ୍କୁ କୋରୋନା ମହାମାରୀ ସଂକ୍ରମଣ ଭୟ ଘାରିଛି ।
ଏଣୁ ଯଦି ବ୍ୟବସାୟ ଆରମ୍ଭ ହୁଏ ତେବେ ଏହି ଅଞ୍ଚଳରେ କୌଣସି ଲୋକଙ୍କୁ କୋରୋନା ହେଲେ ଜିଲ୍ଲା ପ୍ରଶାସନ ଦାୟୀ ରହିବେ ବୋଲି ଗ୍ରାମବାସୀ ଚେତାବନୀ ଦେଇଛନ୍ତି ।
ବରଗଡ଼ରୁ ରାଜେଶ ସରାପ, ଇଟିଭି ଭାରତ
