ବରଗଡ଼: ଚାଷୀ ଦେଶର ମେରୁଦଣ୍ଡ । କିନ୍ତୁ ଦେଶର ମୁଖ୍ୟ ସମସ୍ୟା ହେଉଛି ଚାଷୀ ସମସ୍ୟା । ପ୍ରତ୍ୟେକ ଥର ସରକାରଙ୍କ ନିକଟରୁ ନିରାଶ ହୋଇ ଫେରିବା ଚାଷୀଙ୍କର ଏକ ନିତିଦିନିଆ ଘଟଣା ପାଲଟିଲାଣି । ସାରା ରାଜ୍ୟରେ ଚାଷ ପାଇଁ ସୁନାମ ଅର୍ଜନ କରିଛି ବରଗଡ଼ ଜିଲ୍ଲା । କିନ୍ତୁ ଏଠାରେ ଚାଷୀମାନେ ହିଁ ମୁଖ୍ୟ ସମସ୍ୟାରେ ଫସି ସରକରାଙ୍କ ସହାୟତାକୁ ଚାହିଁ ବସିଛନ୍ତି ।
ଚାଷ ହେଉ ବା ପନିପରିବା ସବୁଥିରେ ଏକ ଭିନ୍ନ ପରିଚୟ ସୃଷ୍ଟି କରିପାରିଛନ୍ତି ବରଗଡ଼ ଚାଷୀ । କିନ୍ତୁ ଫସଲବୀମା ପାଇଁ ପ୍ରିମିୟମ ପଇଠ କରିଥିଲେ ସୁଦ୍ଧା ଚାଷୀକୁ ମିଳୁନାହିଁ ଫସଲର କ୍ଷତିପୂରଣ । ଚାଷୀଙ୍କୁ ତାଙ୍କ ଅଧିକାର ପାଇଁ ଶେଷରେ କଟକ ହାଇକୋର୍ଟକୁ ଯିବାକୁ ପଡୁଛି । ତଥାପି ମଧ୍ୟ ଚାଷୀ ପାଇପାରୁନାହିଁ ତାର ଅଧିକାର ।
ଘଟଣା ୨୦୧୬ ମସିହା ଖରିଫ ଫସଲ ସମୟର । ସୋହେଳାରେ ଖରାମାଡ଼ ଓ ଅଦିନିଆ ବର୍ଷା ଜନିତ ବହୁ ଫସଲ ନଷ୍ଟ ହୋଇଯାଇଥିବା ବେଳେ ପ୍ରିମିୟମ ନେଇଥିବା ଓରିଏଣ୍ଟ ଫସଲ ବୀମା କମ୍ପାନୀ ବରଗଡ଼ ଜିଲ୍ଲା ସୋହେଲା ବ୍ଲକର ପାଞ୍ଚୋଟି ପଞ୍ଚାୟତର ଶତାଧିକ ଚାଷୀଙ୍କୁ କ୍ଷତିପୂରଣ ଆଦୌ ଦେଇନଥିଲା । ବାରମ୍ବାର ଜିଲ୍ଲାପାଳଙ୍କ ନିକଟକୁ ଦୌଡ଼ିଲା ପରେ ମଧ୍ୟ କୌଣସି ସୁଫଳ ନମିଳିବାରୁ ୪୫% କ୍ଷତି ହୋଇଥିବା ପାଞ୍ଚଟି ପଞ୍ଚାୟତର ଚାଷୀମାନେ ଉଚ୍ଚ ନ୍ୟାୟାଳୟର ଦ୍ବାରସ୍ଥ ହେବାକୁ ବାଧ୍ୟ ହୋଇଥିଲେ ।
ତେବେ ୨୦୧୬ ମସିହାର କ୍ଷତିପୂରଣ ଅର୍ଥ ବାବଦକୁ ମାନନୀୟ ଉଚ୍ଚନ୍ୟାୟାଳୟ ବରଗଡ଼ ଜିଲ୍ଲାପାଳଙ୍କୁ ଚାଷୀଙ୍କ ଏହି ସମସ୍ୟାର ସମାଧାନ ପାଇଁ ୨୦୧୯ ରେ ଆଦେଶ କରିଥିଲେ । କିଛିଦିନ ତଳେ ବୀମା କମ୍ପାନୀ ସହିତ ଜିଲ୍ଲାପାଳ ଏବଂ ଚାଷୀଙ୍କ ବୈଠକରେ ୪୦ % କ୍ଷତିଗ୍ରସ୍ତ ଚାଷୀଙ୍କୁ କ୍ଷତିପୂରଣ ମିଳିବ ବୋଲି ଫଇସଲା କରାଯାଇଥିଲା । ଏହାସହ ଏହାର ଶୁଣାଣୀ ଆଜି ଅର୍ଥାତ ଜୁଲାଇ 9 ରେ କରାଯିବ ବୋଲି କୁହାଯାଇଥିବାରୁ ସୋହେଲା ଅଞ୍ଚଳର ବହୁ ଚାଷୀ ଆଜି ବରଗଡ଼ ଜିଲ୍ଲାପାଳ ଇନ୍ଦ୍ରମଣୀ ତ୍ରିପାଠୀଙ୍କ ନିକଟକୁ ଆସି ପହଞ୍ଚିଥିଲେ ।
ଆଜିର ଫଇସଲା ସମ୍ପୂର୍ଣ୍ଣ ଓଲଟା ହୋଇଗଲା । ସେହି ଅଞ୍ଚଳର ସାତ ବର୍ଷର କ୍ଷତିର ଆକଳନକୁ ଆଧାର କରି କ୍ଷତିପୂରଣ ମାତ୍ର ୫% ଦିଆଯିବ ବୋଲି କୁହାଯାଇଥିଲା । ଫଳରେ ଚାଷୀମାନେ ନିରାଶ ହୋଇ ଜିଲ୍ଲାପାଳଙ୍କ ଅଫିସରୁ ଫେରିଥିଲେ । ଜିଲ୍ଲାର ଚାଷୀଙ୍କୁ ନିଜର ଅଧିକାର ପାଇଁ କୋର୍ଟକୁ ଦୌଡ଼ିବାକୁ ପଡୁଛି । ତଥାପି ନ୍ୟାୟ ପାଇପାରୁନଥିବା ଅଭିଯୋଗ ଆଣିଛନ୍ତି । ସରକାରଙ୍କ ଚାଷୀ ମାରଣ ନୀତିକୁ ପରିବର୍ତ୍ତନ କରିବା ଜରୁରୀ ହୋଇପଡିଛି । ଚାଷୀ ଗୋଟିଏ ଫସଲର ବୀମା ପ୍ରିମିୟମ ଭରୁଥିବା ବେଳେ ବିଗତ ସାତ ବର୍ଷର କ୍ଷୟକ୍ଷତି ଆକଳନ କରିବା କେତେଦୁର ଯଥାର୍ଥ ବୋଲି ଚାଷୀ ପ୍ରଶ୍ନ କରିଛନ୍ତି ।
ବରଗଡ଼ରୁ ରାଜେଶ ସରାପ, ଇଟିଭି ଭାରତ
