ବରଗଡ: କୋରୋନା ମହାମାରୀ ଯୋଗୁଁ ସାରା ଦେଶ ଲକଡାଉନ ଥିବା ବେଳେ କେବଳ ସ୍ବାସ୍ଥ୍ୟ ସେବାକୁ ଛାଡି ସବୁ କିଛି ବନ୍ଦ ହୋଇଛି । ହେଲେ ଏହି ଲକଡାଉନର ପ୍ରଭାବ ବରଗଡର ରକ୍ତ ଭଣ୍ଡାରରେ ଦେଖିବାକୁ ମିଳିଛି । ସାମାଜିକ ଦୂରୀକରଣ ଯୋଗୁଁ ବନ୍ଦ ହୋଇଛି ରକ୍ତ ସଂଗ୍ରହ ଶିବିର । ଅନ୍ୟପଟେ କୋରୋନା ସଂକ୍ରମଣ ଭୟରେ ରକ୍ତଦାତାମାନେ ମଧ୍ୟ ଡାକ୍ତରଖାନାରେ ପାଦ ଦେବାକୁ ଭୟ କରୁଛନ୍ତି । ଫଳରେ ବରଗଡ଼ ରକ୍ତଭଣ୍ଡାରରେ ଦେଖା ଦେଇଛି ରକ୍ତ ସଙ୍କଟ ଏବଂ ରକ୍ତ ନପାଇ ଚାଲିଯାଉଛି ବହୁ ରୋଗୀଙ୍କ ଜୀବନ ।
ଏପରି ପରିସ୍ଥିତିରେ ବରଗଡର ‘ଫର’ ଅନୁଷ୍ଠାନ ପକ୍ଷରୁ ପ୍ରତିଦିନ ବିଭିନ୍ନ ଗ୍ରୁପର ରକ୍ତ ଦାନ କରାଯିବା ପ୍ରକ୍ରିୟାକୁ ବୁଦ୍ଧିଜୀବି ମହଲରେ ପ୍ରଶଂସା କରାଯାଇଛି । ଏଥିସହ ଅନ୍ୟମାନଙ୍କ ପାଇଁ ଏହା ଏକ ପ୍ରେରଣା ସାଜିଛି । ଅନ୍ୟପଟେ ବରଗଡର ବିଜେପି ଦଳ ପକ୍ଷରୁ ମଧ୍ୟ ବରଗଡ ରକ୍ତ ଭଣ୍ଡାରରେ ଅଭାବ ରହିଥିବା ରକ୍ତକୁ ଭରଣ କରିବା ପାଇଁ ରକ୍ତଦାନ ଶିବିର କରାଯାଇଛି ।
ଲକଡାଉନ ସମୟରେ ରୋଗୀଙ୍କ ପାଇଁ ଆବଶ୍ୟକୀୟ ରକ୍ତର ଅଭାବକୁ ଦୂର କରିବା ପାଇଁ ବରଗଡ଼ ରକ୍ତଭଣ୍ଡାରରେ ବିଜେପି ଜିଲ୍ଲା ସଭାପତି ଅଶ୍ଵିନୀ ଷଡଙ୍ଗୀଙ୍କ ସହିତ ଦଳର କାର୍ଯ୍ୟକର୍ତ୍ତାମାନେ ରକ୍ତଦାନ କରିଥିଲେ । ସାମାଜିକ ଦୂରତା ପାଳନ କରି 5 ଦିନ ପର୍ଯ୍ୟନ୍ତ ଏହି ରକ୍ତଦାନ ଶିବିର କରାଯିବାର ଯୋଜନା ରହିଛି ।
ବରଗଡରୁ ରାଜେଶ ସରାପ, ଇଟିଭି ଭାରତ
