ବରଗଡ: କୁହାଯାଏ ମାନବ ସେବା ହେଉଛି ମାଧବ ସେବା । ଆଉ ମାନବ ସେବା କରିବା ପାଇଁ ବିଭିନ୍ନ ଲୋକ ବିଭିନ୍ନ ପନ୍ଥା ଆପଣାଇଥାନ୍ତି । ଏବେ ରାଜ୍ୟରେ ରୋଗୀମାନେ ଆମ୍ବୁଲାନ୍ସ ନପାଇ ଅନେକ ଦୁର୍ଦ୍ଦଶା ଭୋଗୁଥିବାବେଳେ ଠିକ ଏତିକି ବେଳେ ଜଣେ ଯୁବ ସମାଜସେବୀଙ୍କ ନିଆରା ସମାଜସେବା ଏବେ ସ୍ଥାନୀୟ ଅଞ୍ଚଳ ସମେତ ସାରା ରାଜ୍ୟରେ ଚର୍ଚ୍ଚାରେ ରହିଛି ।
ଏମିତିକି ଏକ ନିଆରା ସମାଜସେବା ଦେଖିବାକୁ ମିଳିଛି ବରଗଡ ଜିଲ୍ଲା ବିଜେପୁରରେ । ବିଜେପୁରର ବୁଲୁ ମେହେର ପେଶାରେ ଜଣେ ବ୍ୟବସାୟୀ, ନିଶା ସମାଜ ସେବା । ବୁଲୁଙ୍କର ଏକ ଫେନ୍ସି ଦୋକାନ ଅଛି । ଦୋକାନରେ ପରିବାର ଲୋକ ସହଯୋଗ କରୁଥିବାବେଳେ ବୁଲୁ ନିଜର ଏକ ନାନୋ କାରରେ ରୋଗୀସେବା କରୁଛନ୍ତି । ନିଜର ନାନୋ କାରକୁ ବୁଲୁ ଆମ୍ବୁଲାନ୍ସରେ ପରିଣତ କରିଛନ୍ତି । ଏହାସହ ବିଜେପୁର ଅଞ୍ଚଳର ରୋଗୀଙ୍କୁ ମାତ୍ର 30 ଟଙ୍କାରେ ଆମ୍ବୁଲାନ୍ସ ସେବା ଯୋଗାଇ ଦେଉଛନ୍ତି । ଗୋଟିଏ ପଟେ ସରକାରୀ ଆମ୍ବୁଲାନ୍ସ ସେବା ପାଇଁ ଲକ୍ଷ ଲକ୍ଷ ଟଙ୍କା ଖର୍ଚ୍ଚ ହେଉଥିବାବେଳେ ସୁବିଧା ମିଳୁନି ବିଭିନ୍ନ ସମୟରେ । ଏପରି ସ୍ଥଳେ ଜଣେ ସମାଜସେବୀ ନିଜ ଉଦ୍ୟମରେ ସାମାନ୍ୟ କିଛି ପଇସା ନେଇ ନିଜ ବ୍ୟକ୍ତିଗତ କାରକୁ ଆମ୍ବୁଲାନ୍ସରେ ପରିଣତ କରି ରୋଗୀଙ୍କୁ ଆମ୍ବୁଲାନ୍ସ ସେବା ଯୋଗାଇବା ନିଶ୍ଚିତ ଭାବେ ଉଦାହରଣ । ଏହାସହ ଏହି ସେବାକୁ କେମିତି ଅଧିକରୁ ଅଧିକ ଲୋକ ଜାଣିପାରିବେ, ସେଥିପାଇଁ ବୁଲୁ ଷ୍ଟାର ନାମରେ ବିଭିନ୍ନ ସ୍ଥାନରେ ପୋଷ୍ଟର ଲଗାଇଛନ୍ତି ।
ବରଗଡରୁ ରାଜେସ ସରାପ, ଇଟିଭି ଭାରତ
