ବାଲେଶ୍ବର: ତ୍ରିସ୍ତରୀୟ ପଞ୍ଚାୟତ ନିର୍ବାଚନ ଯେତିକି ପାଖେଇ ଆସୁଛି ସେତିକି ସରଗରମ ହେଉଛି ରାଜନୀତି । ଅନ୍ୟପଟେ ବିଭିନ୍ନ ପଞ୍ଚାୟତର ଲୋକଙ୍କ ଦୀର୍ଘଦିନର ଦାବି ପୂରଣ ହୋଇନଥିବାରୁ ଏଥର ଭୋଟ ବର୍ଜନ କରିବାର ମଧ୍ୟ ଚେତାବନୀ ଦିଆଯାଉଛି । ସେମିତି ବାଲେଶ୍ଵର ଜିଲ୍ଲା ସିମୁଳିଆ ବ୍ଲକ ବାଟି ପଞ୍ଚାୟତର ସୁଙ୍ଗୁଡ଼ା ପତିପୋଖରୀ ଆଦିବାସୀ ସାହିର ବାସିନ୍ଦା ମାନେ ମୌଳିକ ସୁବିଧାରୁ ବଞ୍ଚିତ ହେଉଥିବା ଅଭିଯୋଗ କରି ଚଳିତ ପଞ୍ଚାୟତ ନିର୍ବାଚନରେ ଭୋଟ ବର୍ଜନ ପାଇଁ ନିଷ୍ପତ୍ତି ନେଇଛନ୍ତି ।
ସୂଚନା ଅନୁସାରେ, ଏହି ଆଦିବାସୀ ସାହିରେ ୨୦ରୁ ଉର୍ଦ୍ଧ୍ବ ପରିବାର ବସବାସ କରୁଛନ୍ତି । ହେଲେ ଏହି ଗାଁକୁ ଯିବାଆସିବା ପାଇଁ ରାସ୍ତାଟିଏ ନାହିଁ । ଫଳରେ ଗ୍ରାମବାସୀ ମାନେ ବିଲ ହିଡରେ ଯାତାୟତ କରୁଛନ୍ତି । ଏହି ହିଡ ରାସ୍ତାଟି ୧ କିଲୋମିଟରରୁ ଉର୍ଦ୍ଧ୍ବ ହୋଇଥିବା ବେଳେ ବର୍ଷା ଦିନରେ ଯାତାୟତ ଠପ ହୋଇଥାଏ । ଗାଁର କେହି ରୋଗରେ ପଡ଼ିଲେ ଗାଁକୁ ଆମ୍ବୁଲାନ୍ସ ଆସିପାରେ ନାହିଁ ଫଳରେ ରୋଗୀଙ୍କୁ ଖଟିଆରେ ବୋହି ମେଡିକାଲ ନିଆଯାଇଥାଏ । ଏହି ସମସ୍ୟା ବିଷୟରେ ବାରମ୍ବାର ସ୍ଥାନୀୟ ନେତା ଓ ପ୍ରଶାସନ ନିକଟରେ ଗ୍ରାମବାସୀ ଅଭିଯୋଗ କରିଥିଲେ ମଧ୍ୟ ଏହାର କିଛି ସୁଫଳ ମିଳିନାହିଁ । ନିର୍ବାଚନ ଆସିଲେ ନେତାମାନେ ଗାଁକୁ ଆସି ରାସ୍ତା କରିବାକୁ ପ୍ରତିଶୃତି ଦେଇ ପୁଣି ଯେଉଁ କଥାକୁ ସେହିକଥା ହେଉଥିବାରୁ ଗ୍ରାମବାସୀ ମାନେ ଗାଁରେ ଏକ ବୈଠକ କରି ଆଗାମୀ ପଞ୍ଚାୟତ ନିର୍ବାଚନରେ ଭୋଟ ବର୍ଜନ କରିବେ ବୋଲି ନିଷ୍ପତ୍ତି ନେଇଛନ୍ତି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
