ବାଲେଶ୍ଵର: ମାର୍କୋଣା ରେଳ ଷ୍ଟେସନ ନିକଟରେ ଅଗ୍ନିକାଣ୍ଡ । ଭୁବନେଶ୍ୱର-ହାୱଡା ଜନ ଶତାବ୍ଦୀ ଏକ୍ସପ୍ରେସର ଗୋଟିଏ ବଗିରେ ଏହି ଅଗ୍ନିକାଣ୍ଡ ଘଟିଥିବା ଦେଖିବାକୁ ମିଳିଛି । ଏଥିରେ କୌଣସି କ୍ଷୟକ୍ଷତି ହୋଇନଥିବା ଜଣାପଡିଛି । ପରେ ଟ୍ରେନଟି ସୋର ଷ୍ଟେସନରେ ପାଖାପାଖି 20 ମିନିଟ ଅଟକିବା ପରେ ହାୱଡା ଅଭିମୁଖେ ବାହାରିଥିବା ଜଣାପଡିଛି ।
ସୂଚନା ଅନୁସାରେ, ଟ୍ରେନ ମାର୍କୋଣା ଷ୍ଟେସନ ପହଂଚିଲା ବେଳକୁ ବଗି ନମ୍ବର-ଡି6ରୁ ଧୂଆଁ ବାହାରୁଥିବା ଯାତ୍ରୀମାନେ ଦେଖିବାକୁ ପାଇଥିଲେ । ଏଥିରେ ଯାତ୍ରୀମାନେ ଭୟଭୀତ ହୋଇ ରେଳବାଇ ପୋଲିସକୁ ଜଣାଇଥିଲେ । ପୋଲିସ ମାର୍କୋଣାରୁ ସୋର ଷ୍ଟେସନ ମାଷ୍ଟରଙ୍କୁ ଖବର ଦିଆଯାଇଥିଲା । ଏହାପରେ ଟ୍ରେନର ବେଗ କମାଯାଇ ସୋର ଷ୍ଟେସନରେ କର୍ମଚାରୀମାନେ ନିଆଁକୁ ଆୟତ୍ତ କରିବା ପରେ ଟ୍ରେନ ଗନ୍ତବ୍ୟସ୍ଥଳକୁ ବାହାରିଥିବା ଜଣାପଡିଛି । ତେବେ କେହି ଜଣେ ଯାତ୍ରୀ ଟ୍ରେନ ବାଥରୁମରେ ସିଗାରେଟ ଟାଣି ପକାଇ ଦେଇଥିବାରୁ ଏମିତି ଅଗ୍ନିକାଣ୍ଡ ଘଟିଥିବା କୁହାଯାଉଛି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
