ବାଲେଶ୍ବର: ବିଭିନ୍ନ ସମସ୍ୟା ନେଇ ରାଜ୍ୟ ସରକାରଙ୍କୁ ଟାର୍ଗେଟ କରିଛନ୍ତି ରାଜ୍ୟ କୃଷକ ମୋର୍ଚ୍ଚା ସଭାପତି । ଗୁରୁବାର ବାଲେଶ୍ବର ଗସ୍ତରେ ଆସିଥିଲେ ବିଜେପି ରାଜ୍ୟ କୃଷକ ମୋର୍ଚ୍ଚା ସଭାପତି ପ୍ରଦୀପ ପୁରୋହିତ । ରାଜ୍ୟରେ କୃଷକମାନଙ୍କର ବାସ୍ତବିକ ସ୍ଥିତି ସର୍ବଭାରତୀୟ ତୁଳନାରେ ଅନେକ ତଳରେ ଅଛି ବୋଲି ପ୍ରଦୀପ କହିଥିଲେ । ଏହାସହ ଆର୍ଥିକ ମାନଦଣ୍ଡ, ଉନ୍ନତ କୃଷି ପ୍ରଣାଳୀ , ବିପଣନ ସୁବିଧା ସୁଯୋଗରୁ ବଞ୍ଚିତ ହେଉଛନ୍ତି କୃଷକ।
ରାଜ୍ୟ ସରକାର କୃଷକଙ୍କ ପ୍ରତି ଖାମଖିଆଲି ମନୋଭାବ ପୋଷଣ କରୁଛନ୍ତି ବୋଲି ବିଜେପି ରାଜ୍ୟ କୃଷକ ମୋର୍ଚ୍ଚା ସଭାପତି ପ୍ରଦୀପ ପୁରୋହିତ ଅଭିଯୋଗ କରିଛନ୍ତି । ଏଥିପାଇଁ ଓଡ଼ିଶାର ଚାଷୀକୂଳ ପାରମ୍ପରିକ ଚାଷରୁ ବିମୁଖ ହେବାକୁ ବସିଛି । ସେହିଭଳି ତ୍ରୁଟିପୂର୍ଣ୍ଣ ଟୋକନ ବ୍ୟବସ୍ଥା ପାଇଁ ଚାଷୀମାନେ ବର୍ଷକୁ ବର୍ଷ ହଇରାଣ ହରକତ ହେଉଥିବାବେଳେ ସରକାର ଏଥିପ୍ରତି କର୍ଣ୍ଣପାତ କରୁନାହାନ୍ତି କି ବ୍ୟବସ୍ଥାରେ ସୁଧାର ଆଣୁ ନାହାନ୍ତି । କେତେବେଳେ ପଞ୍ଜିକରଣ ପରେ ଟୋକନ ମିଳୁ ନାହିଁ ତ ଆଉ କେତେବେଳେ ଟୋକନ ମୁତାବକ ଧାନ ଚାଷୀ ପାଖରୁ କିଣା ଯାଉନଥିବା ଅଭିଯୋଗ ହୋଇଛି ।
ସେହିଭଳି ବାଲେଶ୍ୱର ସମେତ ଆଖପାଖ ଜିଲ୍ଳାମାନଙ୍କରେ ଜଳସେଚନ ବ୍ୟବସ୍ଥା ସମ୍ପୂର୍ଣ୍ଣ ଅଚଳ ଅବସ୍ଥାରେ ରହିଛି । ରାଜ୍ୟରେ ପାଣି ପଞ୍ଚାୟତ କାଗଜ କଲମରେ ସୀମିତ ଭଳି ମନେ ହେଉଛି । ନବୀନ ସରକାରରେ ଜଳସେଚନଠାରୁ ଆରମ୍ଭ କରି ଶୀତଳ ଭଣ୍ଡାର ଅଚଳାବସ୍ଥା ରହିଛି ବୋଲି ବିଜେପି ରାଜ୍ୟ କୃଷକ ମୋର୍ଚ୍ଚା ସଭାପତି ପ୍ରଦୀପ ପୁରୋହିତ ରାଜ୍ୟ ସରକାରଙ୍କୁ ଟାର୍ଗେଟ କରିଛନ୍ତି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
