ବାଲେଶ୍ବର: ଭୁବନେଶ୍ବର ଏମ୍ସର ସପ୍ତମ ପ୍ରତିଷ୍ଠା ଦିବସ । ଏହି ଅବସରରେ ବାଲେଶ୍ବର ଆଇଟିଆର କଲୋନୀରେ ଏକ ମାଗଣା ସ୍ବାସ୍ଥ୍ୟ ଶିବିର ଅନୁଷ୍ଠିତ ହୋଇଯାଇଛି । ଏହି କାର୍ଯ୍ୟକ୍ରମରେ କେନ୍ଦ୍ରମନ୍ତ୍ରୀ ପ୍ରତାପ ଚନ୍ଦ୍ର ଷଡଙ୍ଗୀ ମୁଖ୍ୟ ଅତିଥି ଭାବେ ଯୋଗଦେଇଛନ୍ତି । ତେବେ ବାଲେଶ୍ବର ଏମ୍ସ ସେଟଲାଇଟ ଶାଖା ପକ୍ଷରୁ ଆୟୋଜିତ ଏହି କାର୍ଯ୍ୟକ୍ରମକୁ ଶ୍ରୀ ଷଡଙ୍ଗୀ ଭୁରିଭୁରି ପ୍ରଶଂସା କରିଥିଲେ । କେନ୍ଦ୍ର ସରକାର ମାଗଣା ସ୍ବାସ୍ଥ୍ୟସେବା ଯୋଗାଇ ଦେବା ପାଇଁ ଆୟୁଷ୍ମାନ ଭଳି ବିଭିନ୍ନ ଯୋଜନା ହାତକୁ ନେଇଛନ୍ତି । ଏହାର ସେବା ନେବା ପାଇଁ ସେ ସମସ୍ତଙ୍କୁ ଆହ୍ବାନ ଦେଇଛନ୍ତି ।
ଖବର ଅନୁଯାୟୀ, ଦୀର୍ଘ 2 ବର୍ଷ ହେବ ଏମ୍ସ ଓପିଡ଼ିର ଏହି ମାଗଣା ସ୍ବାସ୍ଥ୍ୟସେବା ଆଇଟିଆର ତତ୍ବାବଧାନରେ ହେଉଥିବାରୁ ଶ୍ରୀ ଷଡଙ୍ଗୀ ଆଇଟିଆର କର୍ମକର୍ତ୍ତାଙ୍କୁ ଧନ୍ୟବାଦ ଜଣାଇଥିଲେ । ଏହି କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ଆଇଟିଆର ନିର୍ଦ୍ଦେଶକ ଡ଼ ବିନୟ କୁମାର ଦାସ, ଏମ୍ସର ଡେପୁଟି ନିର୍ଦ୍ଦେଶକ ପିକେ ରାଏ, ଏମ୍ସର ନିର୍ଦ୍ଦେଶକ ଡା ଗୀତାଞ୍ଜଳି ପ୍ରମୁଖ ଉପସ୍ଥିତ ଥିଲେ ।
ଅନ୍ୟପଟେ ପ୍ରତାପ ଷଡଙ୍ଗୀଙ୍କ ଏହି କାର୍ଯ୍ୟକ୍ରମକୁ ରେମୁଣା ବିଧାୟକଙ୍କୁ ନିମନ୍ତ୍ରଣ ନକରିବା ଅଭିଯୋଗରେ ବିଜୁ ଯୁବ ଜନତା ଦଳ ପକ୍ଷରୁ ବିରୋଧ ପ୍ରଦର୍ଶନ କରାଯାଇଛି । ଏହି ମାମଲାରେ 7 ଜଣଙ୍କୁ ଅଟକ ରଖିଛି ପୋଲିସ ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
