ବଲାଙ୍ଗୀର: ଟିଟିଲାଗଡକୁ ଜିଲ୍ଲା ମାନ୍ୟତା ଦାବି ନେଇ ପୁଣି ତେଜିବାରେ ଲାଗିଛି ଆନ୍ଦୋଳନ । ଏନେଇ ଆସନ୍ତା କାଲି କ୍ରିୟାନୁଷ୍ଠାନ କମିଟି ପକ୍ଷରୁ ଟିଟିଲାଗଡ 12 ଘଣ୍ଟିଆ ବନ୍ଦ ଡାକରା ଦିଆ ଯାଇଛି । ଯେଉଁଥିରେ ଜରୁରୀ ବ୍ୟବସ୍ଥା ପ୍ରତିଷ୍ଠାନ ଛଡା ସବୁ ଏଠି ବନ୍ଦ କରିବ ବୋଲି କହିଛି କ୍ରିୟାନୁଷ୍ଠାନ କମିଟି ।
ସୂଚନା ମୁତାବକ, ଦୀର୍ଘ ବର୍ଷରୁ ସ୍ଥାନୀୟ ଲୋକେ ଏହି ଆନ୍ଦୋଳନ କରି ଆସୁଛନ୍ତି । ହେଲେ ସରକାର ପ୍ରତିଶୃତି ଦେଇ ତାହା ପାଳନ କରୁ ନ ଥିବାର ଅଭିଯୋଗ କରି ଆନ୍ଦୋଳନକୁ ଓହ୍ଲାଇଛନ୍ତି ଟିଟିଲାଗଡବାସୀ । ଏନେଇ ଟିଟିଲାଗଡ ୧୨ଘଣ୍ଟା ବନ୍ଦ ଡାକରା ଦିଆଯାଇଥିବା ବେଳେ ଦୋକାନ ବଜାର, ସରକାରୀ ଓ ବେସରକାରୀ ପ୍ରତିଷ୍ଠାନ ସହ ଗାଡି ଚଳାଚଳ ଓ ଟ୍ରେନ ଚଳାଚଳ ସକାଳୁ ୬ଟା ରୁ ସନ୍ଧ୍ୟା ୬ଟା ପର୍ଯ୍ୟନ୍ତ ବନ୍ଦ ରହିବ ବୋଲି କହିଛି କ୍ରିୟାନୁଷ୍ଠାନ କମିଟି । ସେହିପରି ଏହି ବନ୍ଦ ଡାକରାକୁ ଟିଟିଲାଗଡ ର ସବୁ ସଂଗଠନ ସମର୍ଥନ ଦେଉଥିବାର କମିଟି କହିଛି ।
ଏନେଇ ଟିଟିଲାଗଡ ଆକ୍ସନ କମିଟିର ସଭାପତି ସଞ୍ଜୟ ବେହେରା କହିଛନ୍ତି, ଟିଟିଲାଗଡକୁ ସ୍ବତନ୍ତ୍ର ଜିଲ୍ଲା ମାନ୍ୟତା ନେଇ ୩୦ ବର୍ଷ ହେଲା ଏହି ଆନ୍ଦୋଳନ ଜାରି ରଖିଛୁ । କିନ୍ତୁ ସରକାର ଆମକୁ ଠକି ଚାଲିଛନ୍ତି । ଏନେଇ ଆମେ ଏହି ଆନ୍ଦୋଳନ ଦ୍ବାରା ଟିଟିଲାଗଡ ଜିଲ୍ଲା ହାସଲ କରିବୁ ।
ଇଟିଭି ଭାରତ, ବଲାଙ୍ଗୀର
