ବଲାଙ୍ଗୀର: ମଦ ପିଇ ସ୍କୁଲରେ ମାତାଲ ଶିକ୍ଷକ । ପାଠ ପଢାଇବାକୁ ଆସି ନିଶାରେ ଟଳମଳ ଶିକ୍ଷକ । ଭିଡିଓ ଭାଇରାଲ ପରେ ସଂପୃକ୍ତ ଶିକ୍ଷକଙ୍କ ହେଲା ଦରମା ବନ୍ଦ । ଏଭଳି ଘଟଣା ଘଟିଛି ବଲାଙ୍ଗୀର ଗୁଡଭେଲା ବ୍ଲକ ଅନ୍ତର୍ଗତ ତାଣ୍ଡିଗା ପ୍ରାଥମିକ ବିଦ୍ୟାଳୟରେ । ଏଠାରେ କାର୍ଯ୍ୟରତ ଥିବା ପ୍ରଧାନ ଶିକ୍ଷକ ଅର୍ଜୁନ ଘଡେ଼ଇ ପିଲାଙ୍କୁ ପାଠ ପଢାଇବା ବଦଳରେ ମଦ ପିଇ ସ୍କୁଲ ଆସୁଛନ୍ତି । ଏକ ଚେୟାର ବସି ନିଶାରେ ଟଳମଳ ହେଉଥିବା ବେଳେ ଗ୍ରାମବାସୀ ଏହାର ଭିଡିଓ ଉତ୍ତୋଳନ କରି ଭାଇରାଲ କରିଛନ୍ତି ।
ଭାଇରାଲ ଭିଡିଓରେ ଦେଖିବାକୁ ମିଳିଛି ଯେ, ଶିକ୍ଷକ ଜଣଙ୍କ ଚେୟାରରେ ମଦ ପିଇ ବସିଥିବା ବେଳେ ଜଣେ ବ୍ୟକ୍ତି ତାଙ୍କୁ କାହିଁକି ମଦ ପିଇ ସ୍କୁଲ ଆସୁଛ ବୋଲି ପ୍ରଶ୍ନ କରୁଛନ୍ତି । ଏହାପରେ ସେ ମଦ ପିଇ ନଥିବା କହୁଛନ୍ତି ଶିକ୍ଷକ। ସ୍କୁଲର ଛାତ୍ର ଛାତ୍ରୀଙ୍କୁ ମୁଁ ମଦ ପିଇଛି ନା ନାହିଁ ବୋଲି ମଧ୍ୟ ପଚାରୁଛନ୍ତି । ଭିଡିଓରେ ପିଲାଏ ମଧ୍ୟ ଶିକ୍ଷକ ମଦ ପିଉଥିବା କହୁଛନ୍ତି । ମଦ ପିଇ ଛାତ୍ରଛାତ୍ରୀଙ୍କୁ ଶିକ୍ଷକ ମାଡ ମାରୁଥିବା ମଧ୍ୟ ଭିଡିଓରେ ଅଭିଯୋଗ ହୋଇଛି । କେବଳ ଗୋଟିଏ ଦିନ ନୁହଁ ପ୍ରତ୍ୟେକ ଦିନ ପ୍ରଧାନ ଶିକ୍ଷକ ଅର୍ଜୁନ ଘଡେ଼ଇ ମଦ ପିଇ ସ୍କୁଲକୁ ଆସୁଥିବା କୁହାଯାଉଛି।
ଗ୍ରାମବାସୀ ଏହି ସବୁ ଘଟଣାର ଭିଡିଓ ଉତ୍ତୋଳନ କରି ସାମାଜିକ ଗଣମାଧ୍ୟମରେ ଭାଇରାଲ କରିଥିଲେ । ଭିଡିଓ ଭାଇରାଲ ହେବା ପରେ ଜିଲ୍ଲା ଶିକ୍ଷା ବିଭାଗ କାର୍ଯ୍ୟାନୁଷ୍ଠାନ ନେଇଛି। ସ୍ଥାନୀୟ ବ୍ଲକ ଶିକ୍ଷା ଅଧିକାରୀ ଏହି ଘଟଣାରେ ପ୍ରାଥମିକ ତଦନ୍ତ କରି ସଂପୃକ୍ତ ଶିକ୍ଷକଙ୍କ ଦରମା ବନ୍ଦ କରାଯାଇଥିବା ସୂଚନା ଦେଇଛନ୍ତି । ତେବେ ଆଗକୁ ପ୍ରଧାନ ଶିକ୍ଷକଙ୍କ ବିରୋରେ କଣ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି ତାହା ଦେଖିବାକୁ ବାକି ରହିଲା ।
ତେବେ ବଲାଙ୍ଗୀର ଜିଲ୍ଲାରେ ଶିକ୍ଷକ ମାନଙ୍କର ଏଭଳି କାର୍ଯ୍ୟକଳାପ ନୂଆ ନୁହେଁ । ପୂର୍ବରୁ ଶିକ୍ଷକଙ୍କ ଦ୍ଵାରା ଯୌନ ନିର୍ଯାତନା ଅଭିଯୋଗ, ଛାତ୍ରଛାତ୍ରୀଙ୍କୁ ଦଣ୍ଡ ଭଳି ଅନେକ ଘଟଣା ସାମ୍ନାକୁ ଆସିଛି । ଏପରିକି ଗୁଡଭେଲା ବ୍ଲକରେ ଶିକ୍ଷକ ମାନେ ପାଠପଢା ସମୟରେ ଛାତ୍ର ଛାତ୍ରୀଙ୍କୁ ଇଟା ବୋହିବା ଭଳି କାର୍ଯ୍ୟ କରାଇଥିବା ଖବର ମଧ୍ୟ ନଜିର ରହିଛି । ଯେଉଁଥିରେ ସଂପୃକ୍ତ ଶିକ୍ଷକଙ୍କ ନାରେ କାର୍ଯ୍ୟାନୁଷ୍ଠାନ ମଧ୍ୟ ହୋଇଥିଲା । ତେବେ ଏଭଳି ଘଟଣା ମାନ ବାରମ୍ବାର ଘଟୁଥିବା ବେଳେ ଛାତ୍ରଛାତ୍ରୀଙ୍କ ଭବିଷ୍ୟତକୁ ନେଇ ଚିନ୍ତାରେ ଅଭିଭାବକ ।
ସରକାର ଶିକ୍ଷା ଭିତ୍ତି ଭୂମିକୁ ସୁଦୃଢ କରିବା ପାଇଁ ଅନେକ ପଦକ୍ଷେପ ଗ୍ରହଣ କରୁଥିବା ବେଳେ କିଛି ହାତ ଗଣତି ଶିକ୍ଷକଙ୍କ ପାଇଁ ଉପାନ୍ତ ଅଞ୍ଚଳରେ ଏହି ବ୍ୟବସ୍ଥା ସଫଳ ହେବା ସମ୍ଭବ ହୋଇ ପାରୁନାହିଁ ବୋଲି ମତ ପ୍ରକାଶ ପାଇଛି । ସେପଟେ ସଂପୃକ୍ତ ମାତାଲ ପ୍ରଧାନ ଶିକ୍ଷକଙ୍କ ମାମଲାରେ ବଲାଙ୍ଗୀର ଶିକ୍ଷା ବିଭାଗ ଏଯାଏଁ କୌଣସି ପ୍ରତିକ୍ରିୟା ଦେଇନାହିଁ । କିନ୍ତୁ ପ୍ରାଥମିକ ତଦନ୍ତ ପରେ ସଂପୃକ୍ତ ଶିକ୍ଷକଙ୍କ ଦରମା ବନ୍ଦ ହୋଇଥିବାର ଜଣା ପଡ଼ିଛି।
ଇଟିଭି ଭାରତ, ବଲାଙ୍ଗୀର
