ବଲାଙ୍ଗୀର: ଗୁଣି ଗାରେଡି ସନ୍ଦେହରେ ବୃଦ୍ଧା ଦମ୍ପତିଙ୍କ ହତ୍ୟା ଘଟଣାରେ 4 ଜଣଙ୍କୁ ଗିରଫ କରିଛି ପୋଲିସ । ଗିରଫ ଅଭିଯୁକ୍ତ ହେଲେ ସେହି ଗାଁର ନାରାୟଣ ବରିହା, ସ୍ବରୂପ ଘିବାଲା, ଗୌରାଙ୍ଗ ପୋଡ ଓ କୃଷ୍ଣ ବରିହା । ଉକ୍ତ ମାମଲାରେ ଗାଁର ଅନ୍ୟ ଲୋକଙ୍କ ମଧ୍ୟ ସମ୍ପୃକ୍ତି ରହିଛି । ସେମାନଙ୍କ ଗିରଫ କରିବାକୁ ପୋଲିସ ତଦନ୍ତ ଜାରି ରଖିଥିବା ବଲାଙ୍ଗୀର ଏସପି ସନ୍ଦୀପ ସମ୍ପଦ ସୂଚନା ଦେଇଛନ୍ତି ।
ସୂଚନାନୁଯାୟୀ, ବଲାଙ୍ଗୀର ଜିଲ୍ଲା ପାଟଣାଗଡ଼ ଅନ୍ତର୍ଗତ ଲରମ୍ଭା ଚିଟିକାମାଲ୍ ଗାଁର ନାରାୟଣ ବରିହାଙ୍କ ଦେଢବର୍ଷ ପୁଅର ଜ୍ବରରେ ମୃତ୍ୟୁ ହୋଇଥିଲା । ଏହାପରେ ପରିବାର ଲୋକେ ତାଙ୍କ ମୃତଦେହକୁ ଜମିରେ ପୋତି ଦେଇଥିଲେ । କିଛିଦିନ ପରେ ସେଠାରେ କେହି ପୂଜାର୍ଚ୍ଚନା କରୁଥିବାର ଗ୍ରାମବାସୀ ସନ୍ଦେହ କରିଥିଲେ । ତେବେ ଏସବୁ କାର୍ଯ୍ୟ ସେହି ଗାଁର ରହୁଥିବା ବୃଦ୍ଧା ଦମ୍ପତ୍ତି ଚିନ୍ତାମଣି ବରିହା ଓ ତାଙ୍କ ସ୍ତ୍ରୀ ରୁକ୍ମଣୀ ବରିହା କରୁଥିବାର ସନ୍ଦେହ କରିଥିଲେ ଗ୍ରାମବାସୀ । ପରେ ଡାହାଣୀ ସନ୍ଦେହରେ ଉଭୟଙ୍କୁ ଗାଁ ନିକଟ ସ୍କୁଲ ପାଖରେ ହତ୍ୟା କରି ଗ୍ରାମବାସୀ ନିକଟସ୍ଥ ଜଙ୍ଗଲରେ ପିଙ୍ଗି ଦେଇଥିଲେ ।
ଏସମ୍ପର୍କରେ ଅଭିଯୋଗ ହେବା ପରେ ପାଟଣାଗଡ ପୋଲିସ ଓ ସାଇଣ୍ଟିଫିକ୍ ଟିମ ଜଙ୍ଗଲରେ ଖୋଜାଖୋଜି କରିଥିଲା । ଶେଷରେ ଉଭୟଙ୍କ ମୃତଦେହକୁ ଏକ ପଥର ଖୋଲରୁ ଉଦ୍ଧାର ହୋଇଥିଲା । ଉକ୍ତ ଘଟଣାରେ ପୋଲିସ 4 ଜଣଙ୍କୁ ଅଟକ ରଖି ପଚରାଉଚରା କରିବା ପରେ ଘଟଣାର ସତ୍ୟତା ସାମନାକୁ ଆସିଥିଲା । ପୋଲିସ ଆଗରେ ସେମାନେ ନିଜର ଦୋଷ ସ୍ବୀକାର କରିଥିଲେ । ଗୁଣି ଗାରେଡି ସନ୍ଦେହରେ ଦମ୍ପତିଙ୍କୁ ହତ୍ୟା କରିବା କଥାକୁ ପ୍ରଘଟ କରିଥିଲେ । ପୋଲିସ ସେମାନଙ୍କ ନିକଟରୁ ହତ୍ୟାରେ ବ୍ୟବହୃତ କରିଥିବା ଲାଠି, ଭାର ଓ ରକ୍ତ ଭିଜା କପଡା ଜବତ କରିଛି । ଉକ୍ତ ମାମଲାରେ ଅଧିକ ତଦନ୍ତ ଜାରି ରହିଥିବା ବେଳେ ଏଥିରେ ସମ୍ପୃକ୍ତ ଥିବା ଅନ୍ୟମାନଙ୍କୁ ଖୁବ୍ ଶୀଘ୍ର ଗିରଫ କରାଯିବ ।
ଗିରଫ 4 ଜଣଙ୍କ ନାଁରେ କରମ୍ଭା ଥାନାରେ କେଶ ନମ୍ବର 79 ରୁଜୁ ହେବା ସହ ଧାରା 302, 301 ଆଇପିସି ସେକ୍ସନ 4 ଓ ଗୁଣି ଗାରେଡି, ହତ୍ୟା ଭଳି ସଙ୍ଗୀନ ମାମଲାରେ ଏମାନଙ୍କୁ କୋର୍ଟ ଚାଲାଣ କରାଯାଇଛି ।
ବଲାଙ୍ଗୀରରୁ ଶେଖ୍ ମହମ୍ମଦ ୱାହିଦ, ଇଟିଭି ଭାରତ