ଅନୁଗୋଳ: ହଜିଗଲା ମାନବିକତା, ଅଲୋଡା ହେଲା ମା’ର ମମତା । ମା ପୁଅର ନିଷ୍କଳଙ୍କ ପ୍ରେମରେ ଲାଗିଲା ଦାଗ । ଯେଉଁ ମା ଦିନେ ପୁଅକୁ କୋଳେଇ କାଖେଇ ଯତ୍ନରେ ଛୋଟରୁ ବଡ କରିଥିଲା ସେହି ମା’ର ଶେଷ ସମୟରେ ମଧ୍ୟ ମୁଖାଗ୍ନି ଦେବାକୁ ମଧ୍ୟ ଚାହିଁଲା ନାହିଁ ଏହି ଅମାନବୀୟ ପୁଅ ।
ଏମିତି ଏକ ଦୁଃଖଦ ଅଭାବନୀୟ ଘଟଣା ଘଟିଛି ଅନୁଗୋଳ ଜିଲା ଛେଣ୍ଡିପଦା ଥାନା ମାଛକୁଟା ଗାଁରେ । ଘଟଣା ହେଉଛି ଗତକାଲି ରାତିରେ ଦୌରିକା ନାଥ ଗଡନାୟକଙ୍କ ସ୍ତ୍ରୀ ଗହମ ଗଡନାୟକଙ୍କ ମୃତ୍ୟୁ ହୋଇଥିଲା । ପାରିବାରିକ କଳହକୁ ନେଇ ମୃତ ଗହମ ଗଡନାୟକଙ୍କ ପୁଅ ଦୀର୍ଘଦୀନ ହେବ ଘରଛାଡି ନିଜ ପରିବାର ଧରି ଗାଁ ଠାରୁ ଅଳ୍ପ ଦୂର ଛେଣ୍ଡିପଦାରେ ଭଡାରେ ରହୁଥିଲା ।
ତେବେ ମାର ମୃତ୍ୟୁକୁ ନେଇ ସମ୍ପର୍କୀୟ ଓ ଗ୍ରାମବାସୀ ପୁଅ ଧରଣୀକୁ ଖବର ଦେଇଥିଲେ । କିନ୍ତୁ ବିଡମ୍ବନାର ବିଷୟ ପୁଅ ଧରଣି ମାର ମୃତଦେହକୁ କାନ୍ଧ ଦେବା ତ ଦୂରର କଥା ଶେଷଥର ପାଇଁ ମଧ୍ୟ ଦେଖିବାକୁ ଆସିନଥିଲା ।
ଫଳରେ ଗ୍ରାମବାସୀ ଓ ସମ୍ପର୍କୀୟ ମାନେ ବାରମ୍ବାର ଯୋଗାଯୋଗ କରିବା ସମୟରେ ପୁଅ ଅନ୍ତିମ ସଂସ୍କାରରେ ଯିବା ପାଇଁ ମନାକରିବା ସହିତ ସେମାନଙ୍କୁ ମା’କୁ ମାରିଦେଇଥିବା ନେଇ ଥାନାରେ ଅଭିଯୋଗ କରିବାର ଧମକ ଦେଇଥିଲେ । ନିରୁପାୟ ଗ୍ରାମବାସୀ ଓ ଧରଣୀଙ୍କ ବାପା ତଥା ମୃତ ମହିଳାଙ୍କ ସ୍ବାମୀ ଦ୍ବାରିକା ଛେଣ୍ଡିପଦା ଥାନାରେ ଲିଖିତ ଅଭିଯୋଗ କରିଥିଲେ । ପରେ ପୋଲିସ ଉପସ୍ଥିତିରେ ଗ୍ରାମବାସୀ ଓ ସଂପର୍କୀୟ ମାନେ ଗହମଙ୍କ ଅନ୍ତିମ ସଂସ୍କାର କରିଥିଲେ ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
