ଅନୁଗୋଳ: ବାହାଘରର କାର୍ଡ ବାଣ୍ଟିବା ନାଁରେ ହେଉଥିଲା ଗଞ୍ଜେଇ ଚାଲାଣ । ଗଞ୍ଜେଇ ଚାଲାଣ ବେଳେ 6 ଜଣକୁ ଧରିଛି ଅନୁଗୋଳ ଅବକାରୀ ବିଭାଗ । ଏହାସହ ଘଟଣାରେ ଦୁଇଟି ଗାଡି ମଧ୍ୟ ଜବତ କରିଛି ଅବକାରୀ ବିଭାଗ । ଆଜି ଅନୁଗୋଳ ଅବକାରୀ ବିଭାଗକୁ ମିଳିଛି ଏକ ବଡ଼ ସଫଳତା । ଅନୁଗୋଳ ଦେଇ ଗଞ୍ଜେଇ ଚାଲାଣ ବେଳେ ଦୁଇଟି ଗାଡିକୁ ଧରିବାରେ ସଫଳ ହୋଇଛି ଅବକାରୀ ବିଭାଗ ।
ଅଧିକ ପଢ଼ନ୍ତୁ: Umesh Pal Murder Case: ମୁଖ୍ୟ ଅଭିଯୁକ୍ତ ଅତିକ ସହଯୋଗୀ ଘରେ ବୁଲିଲା ବୁଲଡୋଜର
କୌଣସି ସୂତ୍ରରୁ ଖବର ପାଇ ବିଭାଗର ଏକ ଟିମ୍ ଅନୁଗୋଳ ଜିଲ୍ଲାର ବଇଣ୍ଡା ଅଞ୍ଚଳରେ ଜଗି ବସିଥିଲେ ଅବକାରୀ ବିଭାଗ କର୍ମଚାରୀ । ଏକ ବୋଲେରୋ ଯୋଗେ ତିନି ଜଣ ବାହାଘର କାର୍ଡ ବାଣ୍ଟିବାକୁ ଯାଉଥିବା କହିଥିଲେ । ବିଭାଗର କର୍ମଚାରୀ ମାନେ ଖୋଜା ଖୋଜି କରିବା ସେହି ଗାଡି ରୁ ପ୍ରାୟ 40 କେଜିରୁ ଅଧିକ ଗଞ୍ଜେଇ ଜବତ ହୋଇଛି । ସେହିଭଳି ଏକ ଟିମ୍ ଚକାମାର 55 ନଂ ଜାତୀୟ ରାଜପଥରର ମୁଣ୍ଡା ସାହି ଛକ ନିକଟରେ ସନ୍ଦେହରେ ଆଉ ଏକ ଗାଡିକୁ ଅଟକାଇବାରୁ ସେଥିରୁ ମଧ୍ୟ 60 କେଜିରୁ ଅଧିକ ଗଞ୍ଜେଇ ଜବତ କରିଥିଲା । ଏନେଇ ପଚରାଉଚରା ବେଳେ ସେମାନେ ମଧ୍ୟ ବାହାଘର କାର୍ଡ ବାଣ୍ଟିବାର ବାହାନା କରିଥିଲେ । ତେବେ ଅବକାରୀ ବିଭାଗ କର୍ମଚାରୀଙ୍କ କଡ଼ା ଆଭିମୁଖ୍ୟ ପରେ ସେମାନେ ଗଞ୍ଜେଇ ଚାଲାଣ କରୁଥିବା ସ୍ବୀକାର କରିଥିଲେ ।
ଏହି ଘଟଣାରେ ସମ୍ପୃକ୍ତ ଥିବା ତିନି ଜଣଙ୍କୁ ଗିରଫ କରିଛି ବିଭାଗ । ଉଭୟ ଘଟଣାରେ ମୋଟ 108 କେଜି ଗଞ୍ଜେଇ ଜବତ ହୋଇଛି । ତେବେ ଜବତ ଗଞ୍ଜେଇର ଆନୁମାନିକ ମୂଲ୍ୟ 10 ଲକ୍ଷ 80 ହଜାର ଟଙ୍କା ହେବ ବୋଲି ବିଭାଗ ପକ୍ଷରୁ କୁହାଯାଇଛି । ଏଥିରେ 6 ଜଣଙ୍କୁ ଗିରଫ କରିବା ସହ ଗୋଟିଏ କାର ଓ ଗୋଟିଏ ବୋଲେରୋ ଜବତ କରିଛି ବିଭାଗ। ତେବେ ଦୁଇଟି ଅଲଗାଅଲଗା ସ୍ଥାନରୁ ସମାନ କଥା କହି ଗଞ୍ଜେଇ ଚାଲାଣକାରୀଙ୍କୁ ଧରିବା ପରେ ଏମାନେ କେଉଁଠୁ କେଉଁଠାକୁ ଗଞ୍ଜେଇ ଚାଲାଣ କରୁଥିଲେ ତାହାର ସନ୍ଧାନ ଆରମ୍ଭ କରିଛି ପୋଲିସ । ଏହାସହ ଏଥିରେ ଆଉ କାହାର ସମ୍ପୃକ୍ତି ରହିଛି ଓ ଏମାନେ ଗୋଟିଏ ଟିମ୍ର ନା ଏକାଧିକ ମାଫିଆ ଏହି କାର୍ଯ୍ଯରେ ସାମିଲ ଅଛନ୍ତି ସେନେଇ ତଦନ୍ତ କରୁଛି ଅବକାରୀ ବିଭାଗ ।
ଇଟିଭି ଭାରତ, ଅନୁଗୋଳ
