ଅନୁଗୋଳ: ଜିଲ୍ଲାରେ ଥମୁନି ହାତୀ ଆକ୍ରମଣ ଆତଙ୍କ । ପୁଣି ଥରେ ହାତୀ ଆକ୍ରମଣରେ ଜଣେ ମହିଳାଙ୍କ ମୃତ୍ୟୁ ହୋଇଛି । ଘଟଣାଟି ଘଟିଛି ଅନୁଗୋଳ ଜିଲ୍ଲା ହଣ୍ଡପା ବନାଞ୍ଚଳ ପ୍ରତାପପୁର ଗାଁରେ । ମୃତ ମହିଳା ମଞ୍ଜୁଲତା ସାହୁ ।
ସୂଚନାନୁସାରେ, ବଢି ଭୋରରୁ ମଞ୍ଜୁ ପାଖ ଜଙ୍ଗଲକୁ ଶୌଚ ପାଇଁ ଯାଇଥିଲେ । ଏହି ସମୟରେ ସେ ହାତୀ ହାବୁଡରେ ପଡିଯାଇଥିଲେ । ଉକ୍ତ ହାତୀ ତାଙ୍କୁ କଚାଡି ଫୋପାଡି ଥିଲା । ଫଳରେ ଘଟଣାସ୍ଥଳରେ ମଞ୍ଜୁଙ୍କ ମୃତ୍ୟୁ ହୋଇଥିଲା । ତେବେ ହାତୀଟି ମହିଳାଙ୍କୁ ମାରିବା ପରେ ମଧ୍ୟ ଦୀର୍ଘ ସମୟ ଧରି ମୃତଦେହ ପାଖରେ ରହିଥିଲା ।
ମଞ୍ଜୁଙ୍କ ମୃତ୍ୟୁ ଖବର ସ୍ଥାନୀୟ ଅଞ୍ଚଳରେ ପ୍ରସାରିତ ହେବା ପରେ ତାଙ୍କ ପରିବାରକୁ କ୍ଷତିପୂରଣ ଦାବି କରିବା ସହ ଜାତୀୟ ରାଜପଥ ଅବରୋଧ କରାଯାଇଛି । ଏଥସହିତ ହାତୀ ଦାଉରୁ ଉକ୍ତ ଅଞ୍ଚଳକୁ ସୁରକ୍ଷା ଦାବି ମଧ୍ୟ ହେଉଛି । ତେବେ ରାସ୍ତା ଅବରୋଧ କାରଣରୁ 55 ନଂ ଜାତୀୟ ରାଜପଥରେ ଗାଡ଼ି ଚଳାଚଳ ବନ୍ଦ ରହିଛି । ସେପଟେ ଘଟଣାର ଖବର ପାଇ ପୋଲିସ କିମ୍ବା ବନ ବିଭାଗ ମଧ୍ୟ ଘଟଣାସ୍ଥଳରେ ପହଞ୍ଚିନଥିବାରୁ ପରିସ୍ଥିତି ଗମ୍ଭୀର ରୂପ ନେଇଛି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
