ପ୍ୟାରିସ୍: 13ଥର ଚମ୍ପିଆନ ସ୍ପେନ ଟେନିସ ସୁପରଷ୍ଟାର ରାଫେଲ ନାଦାଲ 14ତମ ଥର ପାଇଁ ଫ୍ରେଞ୍ଚ ଓପନ ସେମିଫାଇନାଲରେ ପ୍ରବେଶ କରିଛନ୍ତି । ଦୁଇ ଘଣ୍ଟା 45 ମିନିଟ ଧରି ଖେଳାଯାଇଥିବା କ୍ବାର୍ଟରଫାଇନାଲ ମୁକାବିଲାରେ ଆର୍ଜେଣ୍ଟିନାର ଡିଏଗୋ ସ୍କୱାର୍ଟଜମାନଙ୍କୁ 6-3,4-6,6-4,6-0 ସେଟ୍ରେ ହରାଇ ସେମିରେ ପ୍ରବେଶ କରିଛନ୍ତି ନାଦାଲ ।
ବିଶ୍ବ ଟେନିସ୍ ମାନ୍ୟତାର ନମ୍ବର 3 ଖେଳାଳି ନାଦାଲ ସର୍ବାଧିକ ସଂଖ୍ୟକ ଗ୍ରାଣ୍ଡସ୍ଲାମ ଟାଇଟଲ ବିଜୟ ଲକ୍ଷ୍ୟରେ ରହିଛନ୍ତି । ଶୁକ୍ରବାର ସର୍ବିଆର ବିଶ୍ବ ନମ୍ବର 1 ନୋଭାକ ଜୋକଭିକ ଓ ଇଟାଲିର ମାଟ୍ଟେଓ ବେରେଟ୍ଟିନିଙ୍କ ମଧ୍ୟରେ ଖେଳାଯିବାକୁ ଦ୍ବିତୀୟ କ୍ବାର୍ଟରଫାଇନାଲ ମ୍ୟାଚ୍ର ବିଜେତାଙ୍କ ସହ ସେମିରେ ମୁହାଁମୁହିଁ ହେବେ ନାଦାଲ ।
2016 ଫ୍ରେଞ୍ଚ ଓପନ ଚମ୍ପିଆନ ଓ 18ଟି ପ୍ରମୁଖ ଟାଇଟେଲ ବିଜେତା ଜୋକଭିକ, ପ୍ରତିନ୍ଦ୍ବନ୍ଦ୍ବୀ ନାଦାଲଙ୍କ ଠାରୁ 29-28ରେ ଆଗରେ ରହିଛନ୍ତି । 35 ବର୍ଷୀୟ ସ୍ପେନ୍ ଷ୍ଟାର ନିକଟରେ ତାଙ୍କର ପାରମ୍ପରିକ ପ୍ରତିନ୍ଦ୍ବନ୍ଦ୍ବୀଙ୍କୁ ରୋମ୍ରେ ଇଟାଲିଆନ ଓପନରେ ହରାଇଥିଲେ ।
ଅନ୍ୟପଟେ ଇଟାଲିଆନ ବେରେଟ୍ଟିନିଙ୍କ ବିପକ୍ଷରେ ନାଦାଲଙ୍କ ପଲ୍ଲା ମଧ୍ୟ 1-0ରେ ଭାରୀ ରହିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
