ଟୋକିଓ: ପୁଣି ନିରାଶ କଲେ ଦୂତୀ । ୨୦୦ମିଟର ରାଉଣ୍ଡ ୪(ହିଟ୍ସ)ରେ ଦୌଡିଥିଲେ ଓଡିଆ ଧାବିକା ଦୂତୀ ଚାନ୍ଦ । ତେବେ ଯୋଗ୍ୟତା ଅର୍ଜନ କରିପାରିଲେନି ଦୂତୀ । ୨୩.୦୦ ସେକେଣ୍ଡରେ ୨୦୦ ମିଟର ରାଉଣ୍ଡ ୪(ହିଟ୍ସ)ରେ ଦୂତୀ ସପ୍ତମ ସ୍ଥାନରେ ରହି ଦୌଡ ଶେଷ କରିଛନ୍ତି । ଏହି ଫଳାଫଳ ସହ ସେ ସେମିଫାଇନାଲ ଟିକେଟ ହାସଲ କରିବାରେ ବିଫଳ ହୋଇଛନ୍ତି ।
୧୦୦ମିଟର ଦୌଡରେ ହାରିବା ପରେ ୨୦୦ମିଟରରେ କିଛି କମାଲ କରିବେ ବୋଲି ଆଶା ଥିଲା । ହେଲେ ତାହା ଏକ ପ୍ରକାର ମଉଳି ଯାଇଛି । ୨୨.୧୧ସେକେଣ୍ଡରେ ଦୌଡି ନାମିବିଆର କ୍ରିଷ୍ଟାଇନ୍ ବୋମା ପ୍ରଥମ ସ୍ଥାନରେ ରହିଛନ୍ତି । ଏହା ସହିତ ୨୨.୨୦ ସେକେଣ୍ଡ ସମୟ ନେଇ ଆମେରିକାର ଗ୍ରାହଏଲ ଥୋମାସ ଦ୍ବିତୀୟ ସ୍ଥାନରେ ରହିଛନ୍ତି ।
୨୦୧୯ରେ ଦୋହାର କତାରଠାରେ ଆୟୋଜିତ ଏସିଆନ୍ ଆଥଲେଟିକ୍ସ ଚାମ୍ପିୟନସିପରେ ଦୂତୀ ୨୦୦ ମିଟରରେ ବ୍ରୋଞ୍ଜ ପଦକ ଜିତିଥିଲେ । ଯେହେତୁ ଦୂତୀ ପ୍ରଥମଥର ଅଲିମ୍ପିକ୍ସରେ ୨୦୦ ମିଟରରେ ଭାଗ ନେଇଥିଲେ, ତେଣୁ ତାଙ୍କ ଉପରେ ସମସ୍ତଙ୍କ ନଜର ରହିଥିଲା ହେଲେ ସେ ସମସ୍ତ କ୍ରୀଡା ପ୍ରେମୀଙ୍କୁ ନିରାଶ କରିଛନ୍ତି ।
ଏହା ପୂର୍ବରୁ ଶୁକ୍ରବାର ୧୧.୫୪ ସେକେଣ୍ଡରେ ୧୦୦ ମିଟର ରାଉଣ୍ଡ ୧(ହିଟ୍ସ)ରେ ଦୂତୀ ସପ୍ତମ ସ୍ଥାନରେ ଦୌଡ ଶେଷକରିଥିଲେ । ଜାମାଇକାର ସେଲି ଅନ-ଫ୍ରାସର ୧୦.୮୪ ସେକେଣ୍ଡରେ ପହଞ୍ଚି ହିଟ୍ସରେ ଶୀର୍ଷ ସ୍ଥାନରେ ରହିଛନ୍ତି । ପରେ ଏଜଲା ଡେଲ ପୋଣ୍ଟେ ୧୦.୯୧ ସମୟରେ ପହଞ୍ଚି ଦ୍ବିତୀୟ ସ୍ଥାନରେ ରହିଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
