କଟକ: ଦେଶର କ୍ରୀଡା ରାଜଧାନୀ ପାଲଟିଛି ଓଡିଶା । ଗୋଟିଏ ପରେ ଗୋଟିଏ ମେଗା ଇଭେଣ୍ଟର ସଫଳ ଆୟୋଜନ କରୁଛନ୍ତି ରାଜ୍ୟ ସରକାର । ପୂର୍ବରୁ ହକି ବିଶ୍ୱକପ ଆଉ ଏବେ ରାଜ୍ୟଗୋଷ୍ଠୀ ଟେବୁଲ ଟେନିସ ଚମ୍ପିଆନସିପ । ରାଜ୍ୟରେ ପ୍ରଥମକରି ରାଜ୍ୟଗୋଷ୍ଠୀ ଟେବୁଲଟେନିସ ପ୍ରତିଯୋଗୀତା ହେଉଛି, ଏହା ନିଶ୍ଚିନ୍ତ ଓଡିଶା ପାଇଁ ଗୌରବର ବିଷୟ । ତେବେ ଏହି ଟୁର୍ଣ୍ଣାମେଣ୍ଟରେ ଓଡିଶାର ଖେଳାଳି କେତେ ଲାଭବାନ ହେବେ, ତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି ।
ଜାତୀୟ ଦଳରେ ଓଡିଶାର ଖେଳାଳି କେଉଁ କାରଣ ପାଇଁ ସାମିଲ ହୋଇପାରୁନାହାଁନ୍ତି ଏନେଇ ସାଧାରଣରେ ଚର୍ଚ୍ଚା ହେଉଛି । ସେପଟେ ରାଜ୍ୟ ଟେବୁଲ ଟେନିସ ଦଳର କୋଚ ରାଜ ସୁବ୍ରମନ୍ୟମ କହିଛନ୍ତି ଖେଳାଳିଙ୍କ ଇଛାଶକ୍ତି ରହିଛି । ମାତ୍ର ଜାତୀୟ ଦଳରେ ସାମିଲ ହେବାକୁ ଉପଯୁକ୍ତ ବାତାବରଣ ଉପଲବ୍ଧ ହୋଇପାରୁନାହିଁ । ପ୍ରସ୍ତୁତି ପାଇଁ ଆବଶ୍ୟକୀୟ ଭିତ୍ତିଭୂମିର ଅଭାବ ଯୋଗୁଁ ଖେଳାଳିମାନେ ଏହି ଖେଳ ପ୍ରତି ବିମୁଖ ହେଉଛନ୍ତି । ଓଡିଶାରେ ଉପଯୁକ୍ତ ପ୍ରୋତ୍ସାହନ ଅଭାବରୁ ଅନେକ ପ୍ରତିଭାରେ ପୂର୍ଣ୍ଣଚ୍ଛେଦ ପଡିଯାଉଛି ।
ଅନ୍ୟପଟେ ଓଡିଶାରେ ଟେବୁଲ ଟେନିସକୁ କିପରି ଅଧିକ ଗ୍ରହଣୀୟ କରାଯାଇପାରିବ, ଏ ନେଇ ବିଚାର କରାଯାଉଛି । ଏ ଦିଗରେ ସକରାତ୍ମକ ପଦକ୍ଷେପ ଗ୍ରହଣ କରିବାକୁ ରାଜ୍ୟ କ୍ରୀଡା ବିଭାଗକୁ ଅବଗତ କରାଯାଇଛି ବୋଲି କହିଛନ୍ତି ରାଜ୍ୟ ଟେବୁଲଟେନିସ ସଂଘ ସମ୍ପାଦକ ରବୀନ୍ଦ୍ର ପରିଡା । ତେବେ ଏହି ଦିଗରେ ରାଜ୍ୟ ସରକାର କେବେ ନିଷ୍ପତ୍ତି ନେଉଛନ୍ତି, ତାହା ଦେଖିବାକୁ ବାକି ରହିଲା ।
କଟକରୁ ପ୍ରଭୁକଲ୍ୟାଣ ପାଲ, ଇଟିଭି ଭାରତ
