ବ୍ରହ୍ମପୁର: ସିବିଏସଇ ପକ୍ଷରୁ ଆୟୋଜିତ ହୋଇଥିବା ଜୋନାଲ ସ୍ତରୀୟ ସ୍କେଟିଂ ଚମ୍ପିଆନସିପରେ ବ୍ରହ୍ମପୁରର କୃତୀ ପ୍ରତିଯୋଗୀଙ୍କୁ ସମ୍ୱର୍ଦ୍ଧିତ କରାଯାଇଛି । ଗତ ଅକ୍ଟୋବର ୧୨ ରୁ ୧୪ ତାରିଖ ପର୍ଯ୍ୟନ୍ତ ତିନି ଦିନ ଧରି ଛତିଶଗଡ଼ର ରାଇପୁର ଠାରେ ଏହି ପ୍ରତିଯୋଗିତା ଆୟୋଜିତ ହୋଇଥିଲା ।
କମାପଲ୍ଲୀସ୍ଥିତ ସିଲକି ରୋଲର ସ୍କେଟିଂ ଏକାଡେମୀର 6 ଜଣ ସ୍କେଟର ଏଥିରେ ଅଂଶଗ୍ରହଣ କରିଥିଲେ । ତିନୋଟି ସ୍ୱର୍ଣ୍ଣ ଓ ତିନୋଟି କାଂସ୍ୟ ପଦକ ହାସଲ କରିଛନ୍ତି 4 ଜଣ ସ୍କେଟର । ଆୟୋଜିତ ସମ୍ୱର୍ଦ୍ଧନା କାର୍ଯ୍ୟକ୍ରମରେ ସମ୍ମାନିତ ଅତିଥି ରୂପେ ଅଲମ୍ପିଆନ ତଥା ଅର୍ଜୁନ ଆୱାଡ ବିଜେତା ଭାରତ୍ତୋଳନକାରୀ କେ.ରବି କୁମାର, ଗଞ୍ଜାମ ଜିଲ୍ଲା କ୍ରୀଡ଼ା ସଂସଦର ସଭାପତି ତଥା ଗଞ୍ଜାମ ଜିଲ୍ଲା ରୋଲର ସ୍କେଟିଂ ଆସୋସିଏସନର ସଭାପତି ଅଶୋକ ସାହୁ, ଓ ଶିକ୍ଷାବିତ୍ ତଥା ଗଞ୍ଜାମ ଜିଲ୍ଲା ରୋଲର ସ୍କେଟିଂ ଆସୋସିଏସନର ଉପ-ସଭାପତି ଇ.ଟି ରାଓ ଯୋଗ ଦେଇ ସ୍କେଟର ମାନଙ୍କୁ ସମ୍ୱର୍ଦ୍ଧିତ କରିଛନ୍ତି ।
ଚାରି ଜଣ ସ୍କେଟରଙ୍କ ମଧ୍ୟରେ ୮ ବର୍ଷରୁ କମ୍ ବର୍ଗରେ ଡିଏଭି ପବ୍ଲିକ୍ ସ୍କୁଲର ଦ୍ୱିତୀୟ ଶ୍ରେଣୀ ଛାତ୍ରୀ ଅନ୍ୱେଷା ବିଷୋୟୀ ତିନି ଶହ ମିଟର ଓ ଏକ ହଜାର ମିଟର ରେସରେ ପ୍ରଥମ ସ୍ଥାନ ଅଧିକାର କରି ଦୁଇଟି ସ୍ୱର୍ଣ୍ଣ ପଦକ, ୧୦ ବର୍ଷ କମ ବର୍ଗରେ ଡିଏଭି ପବ୍ଲିକ୍ ସ୍କୁଲର ଛାତ୍ର ଆଶୁତୋଷ ପାଢୀ ଏକ ହଜାର ମିଟର ରେସରେ ସ୍ୱର୍ଣ୍ଣ ଓ ତିନି ଶହ ମିଟରରେ କାଂସ୍ୟ ପଦକ, ୧୨ ବର୍ଷ ବାଳକ ବର୍ଗରେ କେ.ସି ପବ୍ଲିକ ସ୍କୁଲର ପୁନିତ୍ ଗୌଡ଼ ଏକ ହଜାର ମିଟର ରେସରେ ତୃତୀୟ ସ୍ଥାନ ଅଧିକାର କରି କାଂସ୍ୟ ପଦକ ଓ ସଙ୍କଳ୍ପ ହାଏର ସେକେଣ୍ଡାରୀ ସ୍କୁଲର ଅନୁଭବ ପଣ୍ଡା ୧୪ ବର୍ଷ ବର୍ଗ ଏକ ହଜାର ମିଟର ରେସରେ କାଂସ୍ୟ ପଦକ ହାସଲ କରିଛନ୍ତି ।
ଅନ୍ୱେଷା ଓ ଆଶୁତୋଷ ନଭେମ୍ୱର ୨୬ରେ କର୍ଣ୍ଣାଟକରେ ଅନୁଷ୍ଠିତ ହେବାକୁ ଥିବା ଜାତୀୟ ସ୍କେଟିଂ ପ୍ରତିଯୋଗିତାରେ, ଅଂଶ ଗ୍ରହଣ କରିବା ପାଇଁ ମନୋନୀତ ହୋଇଛନ୍ତି । ସେପଟେ ୫୭ ତମ ଜାତୀୟ ରୋଲର ସ୍କେଟିଂ ଚମ୍ପିଆନସିପ୍ ନଭେମ୍ୱର ୩ରୁ ବ୍ରହ୍ମପୁର ଉପକଣ୍ଠ ଭାବନ୍ଧସ୍ଥିତ ଗାନ୍ଧୀ ସ୍କୁଲ ଅଫ ଇଂଞ୍ଜିନିୟରିଂ ପରିସରରେ ଅନୁଷ୍ଠିତ ହେବ ।
ବ୍ରହ୍ମପୁରରୁ ସମୀର ଆଚାର୍ଯ୍ୟ ଇଟିଭି ଭାରତ
