ମାଲେସିଆ: ବିଜୟ ସହ ଅଭିଯାନ ଆରମ୍ଭ କରିଛି ଭାରତୀୟ ହକି ଦଳ । ଇଫୋରେ ଖେଳାଯାଉଥିବା 28 ତମ ସୁଲତାନ ଆଜଲାନ ଶାହ ହକି ଟୁର୍ଣ୍ଣାମେଣ୍ଟର ପ୍ରଥମ ମ୍ୟାଚରେ ଏହା ବିଜୟ ହାସଲ କରିଛି । ଏସିଆନ ଗେମ୍ସ ଚମ୍ପିଆନ ଜାପାନକୁ ଏହା 2-0 ଗୋଲରେ ପରାସ୍ତ କରିଛି ।
ଆଜି ଟୁର୍ଣ୍ଣାମେଣ୍ଟ ଆରମ୍ଭ ହୋଇଥିବାବେଳେ ଉଦଘାଟନୀ ମ୍ୟାଚରେ ମୁକାବିଲା କରିଥିଲେ ଭାରତ-ଜାପାନ । ତେବେ ଅନେକ ବରିଷ୍ଠ ଓ ଅଭିଜ୍ଞ ଖେଳାଳିଙ୍କ ଅନୁପସ୍ଥିତି ସତ୍ତ୍ବେ ଏହି ମ୍ୟାଚରେ ଭାରତ ଚତ୍ମକାର ପ୍ରଦର୍ଶନ କରିଥିଲା । ଉଲ୍ଲେଖଯୋଗ୍ୟ ଯେ ଆଘାତ ଯୋଗୁଁ ଭାରତୀୟ ଦଳରୁ ବହୁ ପ୍ରମୁଖ ଖେଳାଳି ବାଦ ପଡିଛନ୍ତି । ଏହି ଟୁର୍ଣ୍ଣାମେଣ୍ଟରେ ଭାରତ ଏକ ଯୁବ ଦଳକୁ ପଠାଇଛି ।
ତେବେ ଭାରତୀୟ ଯୁବ ଖେଳାଳିଙ୍କ ଆଗରେ ଫିକା ପଡିଥିଲା ଏସିଆନ ଗେମ୍ସ ଚମ୍ପିଆନ ଦଳର ପ୍ରଦର୍ଶନ । ଭାରତ ପକ୍ଷରୁ ଖେଳର ପ୍ରଥମାର୍ଦ୍ଧରେ ପ୍ରଥମ ଗୋଲ ସ୍କୋର ହୋଇଥିଲା । 24ତମ ମିନିଟ୍ରେ ଭାରତକୁ ଏକ ପେନାଲଟି କର୍ଣ୍ଣର ମିଳିଥିଲା । ଏହାକୁ ସହଜରେ ଗୋଲରେ ପରିଣତ କରିଥିଲେ ବରୁଣ କୁମାର । ଏହାପରେ ଆଉ କୌଣସି ଗୋଲ ହୋଇନଥିବାବେଳେ ଉଭୟ ଦଳ ପକ୍ଷରୁ ସ୍କୋର କରିବାକୁ କଡା ଉଦ୍ୟମ ହୋଇଥିଲା ।
ଦ୍ବିତୀୟାର୍ଦ୍ଧରେ 56 ତମ ମିନିଟ୍ରେ ଭାରତକୁ 2ୟ ସଫଳତା ମିଳିଥିଲା । ସିମ୍ରଜିତ ସିଂହ ଭାରତ ପକ୍ଷରୁ ଏକ ଫିଲ୍ଡ ଗୋଲ ଦେଇ ସ୍କୋରକୁ 2-0 କରିଥିଲେ । ଏହାପରେ ଜାପାନ ଭାରତୀୟ ଗୋଲପୋଷ୍ଟ ଉପରେ ଘନ ଘନ ଆକ୍ରମଣ କରିଥିଲେ ମଧ୍ୟ ଗୋଲ ଦେବାରେ ସଫଳ ହୋଇନଥିଲା । ରବିବାର ଭାରତ 2ୟ ମ୍ୟାଚ ଦକ୍ଷିଣ କୋରିଆ ସହ ଖେଳିବ ।
