ନୂଆଦିଲ୍ଲୀ: ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(ବିସିସିଆଇ)ର କ୍ରିକେଟ ପ୍ରଶାସକ କମିଟି(ସିଓଏ)କୁ ମିଳିଛି ତୃତୀୟ ସଦସ୍ୟ । ସୁପ୍ରିମକୋର୍ଟ ଗତକାଲି ଲେଫନାଣ୍ଟ ଜେନେରାଲ ରବି ଥୋଡଗେଙ୍କୁ ସିଓଏର ତୃତୀୟ ସଦସ୍ୟ ଭାବେ ନିଯୁକ୍ତି ଦେଇଛନ୍ତି । ପୂର୍ବରୁ କମିଟିରୁ ଦୁଇ ଜଣ ସଦସ୍ୟ ଇସ୍ତଫା ଦେଇଥିଲେ ।
ଜଷ୍ଟିସ ଏସଏ ବୋବଦେ ଏବଂ ଏଏମ ସାପ୍ରେଙ୍କୁ ନେଇ ଗଠିତ ବେଞ୍ଚ ଏହି ନିଯୁକ୍ତି ଦେଇଛନ୍ତି । ପୂର୍ବରୁ 2017ରେ ସୁପ୍ରିମକୋର୍ଟ ଏକ 4 ଜଣିଆ ସଦସ୍ୟ ବିଶିଷ୍ଟ ପ୍ରଶାସକ କମିଟି ଗଠନ କରିଥିଲା । ଲୋଧା ପାନେଲ କରିଥିବା ସୁପାରିଶ ସବୁକୁ ବିସିସିଆଇରେ ଲାଗୁ କରିବା ପାଇଁ ଏହି କମିଟି ଗଠନ କରାଯାଇଥିଲା । ଏହାର ଅଧ୍ୟକ୍ଷ ଭାରତର ପୂର୍ବତନ ସିଏଜି ବିନୋଦ ରାଏ ଥିବାବେଳେ କମିଟିରେ ଅନ୍ୟ ସଦସ୍ୟ ଭାବେ ଭାରତୀୟ ମହିଳା ଦଳର ପୂର୍ବତନ ଅଧିନାୟିକା ଡାଏନା ଇଡୁଲଜି, ଐତିହାସିକ ରାମଚନ୍ଦ୍ର ଗୁହା ଏବଂ ବ୍ୟାଙ୍କର ବିକ୍ରମ ଲିମାୟେ ରହିଥିଲେ ।
ତେବେ ଗତବର୍ଷ କମିଟିରୁ ବିକ୍ରମ ଏବଂ ରାମଚନ୍ଦ୍ର ଇସ୍ତଫା ଦେଇଥିଲେ । ଫଳରେ କମିଟିରେ କେବଳ ବିନୋଦ ରାଏ ଏବଂ ଡାଏନା ଥିବାବେଳେ ଆଜି ତୃତୀୟ ସଦସ୍ୟ ଭାବେ ରବି ଥୋଡଗେ ନିଯୁକ୍ତି ପାଇଛନ୍ତି ।
