ହାଇଦ୍ରାବାଦ: ଆସନ୍ତା ମେ 30ରୁ ଇଂଲଣ୍ଡ ଓ ୱେଲ୍ସରେ ଖେଳାଯିବ କ୍ରିକେଟ ମହାକୁମ୍ଭ ବା କ୍ରିକେଟ ବିଶ୍ବକପ ଟୁର୍ଣ୍ଣାମେଣ୍ଟ । ଏଥିପାଇଁ ସୋମବାର ଅପରାହ୍ନ 3ଟା ବିସିସିଆଇ ଘୋଷଣା କରିବ 15ଜଣିଆ ଭାରତୀୟ ଦଳ । ବିରାଟ ସେନାର ଫୋକସରେ 2019 ବିଶ୍ବକପ । ମାତ୍ର ଦ୍ବନ୍ଦ୍ବରେ ରହିଛି ଭାରତୀୟ ମଧ୍ୟକ୍ରମ ଓ ବ୍ୟାକଅପ ୱିକେଟ କିପର ।
ଟପଅର୍ଡରେ ରୋହିତ-ଧୱନ ଓ ବିରାଟ । ଷଷ୍ଠ ସ୍ଥାନରେ ଧୋନି । ମାତ୍ର ଚତୁର୍ଥ ଓ ପଞ୍ଚମ ସ୍ଥାନ ପାଇଁ କିଏ? ବର୍ତ୍ତମାନ ପର୍ଯ୍ୟନ୍ତ ବିସିସିଆଇର ସିଲେକ୍ସନ କମିଟି ଏହି ପ୍ରଶ୍ନର ଉତ୍ତର ଖୋଜି ଚାଲିଛି । ତେଣୁ ସୋମବାର ଦଳ ଘୋଷଣା ହେବା ପୂର୍ବରୁ ହେବ ବିରାଟ ବୈଠକ । ବୈଠକରେ ସାମିଲ ହେବ ଅଧିନାୟକ ବିରାଟ କୋହଲି ଓ କୋଚ ରବି ଶାସ୍ତ୍ରୀ । ସମ୍ଭବତଃ ଧୋନିଙ୍କୁ ମଧ୍ୟ ଡକରା ମିଳିପାରେ । ତେବେ ଏହି ବୈଠକ ପରେ ପ୍ରେସ କନଫରେନ୍ସ ମଧ୍ୟମରେ ଦଳ ଘୋଷଣା କରାଯିବ ବୋଲି ବିସିସିଆଇ ଗତକାଲି ସୂଚନା ଦେଇଛି ।
ତେବେ ଚତୁର୍ଥ ଓ ପଞ୍ଚମ ସ୍ଥାନ ପାଇଁ ଅଙ୍କ ସମ୍ଭବତଃ ଏମିତି ସମାଧାନ ହୋଇପାରେ । ଚତୁର୍ଥ ସ୍ଥାନରେ କେଦାର ଯାଦବ ପଞ୍ଚମ ସ୍ଥାନରେ ଧୋନି ଓ ଷଷ୍ଠ ସ୍ଥାନରେ ଅଲରାଉଣ୍ଡର ହାର୍ଦିକ ପାଣ୍ଡ୍ୟାଙ୍କୁ ଖେଳାଯାଇପାରେ । ଅନ୍ୟପଟେ କମିଟି ଯଦି ଅମ୍ବାତି ରାଇଡୁଙ୍କୁ ମଧ୍ୟକ୍ରମ ପାଇଁ ଦଳରେ ସାମିଲ କରୁଛି ତେବେ ଅଲରାଉଣ୍ଡର ହାର୍ଦିକ ପାଣ୍ଡ୍ୟାଙ୍କୁ ଚୂଡାନ୍ତ ଏକାଦଶରେ ସାମିଲ କରାଯାଇ ନପାରେ । ସେହିପରି ଯଦି କେଏଲ ରାହୁଲଙ୍କୁ ଦଳକୁ ଅଣାଯାଉଛି । ତେବେ କଣ କୋହଲି 4ର୍ଥ ସ୍ଥାନରେ ବ୍ୟାଟିଂ କରିବାକୁ ଆସିବେ ।
ସେହିପରି ବ୍ୟାକ ଅପ ୱିକେଟ କିପରର ଦ୍ବନ୍ଦ୍ବ ବି କମିଟିକୁ ଘାରିଛି । ଫର୍ମରେ ଥିବା ଯୁବ ଋଷବ ପନ୍ତ କିନ୍ତୁ ହୋସରେ ରହୁ ନାହାଁନ୍ତି । ତେଣୁ ବିଶ୍ବକପ ପରି ବିରାଟ ଯୁଦ୍ଧରେ କେମିତି ତାଙ୍କ ଉପରେ ଭରସା କରାଯାଇପାରିବ । ଅନ୍ୟପଟେ ଖରାପ ଫର୍ମ ଦେଇ ଚାଲୁଥିବା ଅଭିଜ୍ଞ ଦିନେଶ କାର୍ତ୍ତିଙ୍କୁ କିନ୍ତୁ କମିଟି ଦଳରେ ସାମିଲ କରିବାକୁ ମଙ୍ଗୁ ନାହିଁ । ତେଣୁ ଦ୍ବନ୍ଦ୍ବ ମଧ୍ୟରେ ଫସି ଯାଇଛି ଭାରତୀୟ ସିଲେକ୍ସନ କମିଟି ।
ବ୍ୟୁରୋ ରିପୋର୍ଟ, ଇଟିଭି ଭାରତ
