ହାଇଦ୍ରାବାଦ: ଅଲରାଉଣ୍ଡର ଯୁବରାଜ ସିଂ । ଦିନ ଥିଲା ଟିମ ଇଣ୍ଡିଆର ମଧ୍ୟକ୍ରମର ମେରୁଦଣ୍ଡ ଥିଲେ ଯୁବି । ଆଜି 38ବର୍ଷରେ ପାଦ ଥାପିଛନ୍ତି । 2019 10 ଜୁନ୍ରେ ସେ ଅନ୍ତରାଷ୍ଟ୍ରୀୟ କ୍ରିକେଟ କ୍ୟାରିଅରରୁ ସନ୍ୟାସ ନେଇଥିଲେ ।
12 ଡିସେମ୍ବର 1981 ମସିହାରେ ଚଣ୍ଡିଗଡରେ ଜନ୍ମଗ୍ରହଣ କରିଥିଲେ । ତାଙ୍କର ଅନ୍ତରାଷ୍ଟ୍ରୀୟ କ୍ୟାରିଅର ଏତେଟା ସହଜ ନଥିଲା । ଅନେକ ସଫଳତା-ଅସଫଳତା ମଧ୍ୟରେ ତାଙ୍କର କ୍ୟାରିଅର ଗତି କରିଛି । କିନ୍ତୁ 19ବର୍ଷର ନିଜର କ୍ରିକେଟ କ୍ୟାରିଅରରେ ଅନେକ ସମୟରେ ମେନ୍ ଇନ୍ ବ୍ଲୁର ସଙ୍କଟମୋଚନ ମଧ୍ୟ ସାଜିଛନ୍ତି ।
ନିଜର କ୍ୟାରିଅରରେ କେବଳ ତାଙ୍କର ବ୍ୟାଟିଂ ଯାଦୁ ଦେଖିବାକୁ ମିଳିଛି ତାହା ନୁହେଁ, ସେ ନିଜର ବୋଲଂ ମାଧ୍ୟମରେ ସମସ୍ତଙ୍କର ହୃଦୟ ଜିତିଛନ୍ତି । ନିଜର ଅଲରାଉଣ୍ଡର ପ୍ରଦର୍ଶନ ମାଧ୍ୟମରେ କୋଟି କୋଟି ପ୍ରଶଂସକଙ୍କୁ ଦିଓ୍ବାନା ବନେଇଛନ୍ତି । ସେ ଅନ୍ତରାଷ୍ଟ୍ରୀୟ କ୍ରିକେଟର 3ଟି ଫର୍ମାଟରେ ଖଳିଛନ୍ତି । ତାଙ୍କର ଆକ୍ରାମକ ବ୍ୟାଟିଂ ଓ ସାନଦାର ଫିଲ୍ଡିଂ କ୍ରିକେଟରେ ଏକ ସ୍ବତନ୍ତ୍ର ପରିଚୟ ଦେଇଥିଲା । ଏହାପରେ ସେ ମାରାତ୍ମକ କ୍ୟାନସରରେ ପିଡିତ ହୋଇଥିଲେ । ମୃତ୍ୟୁକୁ ମାତ୍ ଦେଇ ସେ ପୁଣି ଗ୍ରାଉଣ୍ଡକୁ ଫେରିଥିଲେ ।
6 ବଲ୍ରେ 6 ଛକା
19ସେପ୍ଟେମ୍ବର 2007ରେ ଯୁବରାଜ ସିଂ ଇତିହାସ ରଚିଥିଲେ । ଇଂଲଣ୍ଡ ବିପକ୍ଷରେ ଖେଳାଯାଉଥିବା ପ୍ରଥମ ଟି-20 ବିଶ୍ବକପରେ ଷ୍ଟୁଆର୍ଟ ବ୍ରାଡଙ୍କ ଗୋଟିଏ ଓଭରର ସମସ୍ତ 6ଟି ବଲ୍ରେ 6ଟି ଛକା ମାରିଥିଲେ ଯୁବି। ଅନ୍ତରାଷ୍ଟ୍ରୀୟ କ୍ରିକେଟରେ ଦ.ଆଫ୍ରିକାର ଖେଳାଳି ହର୍ଷଲ ଗିବ୍ସଙ୍କ ପରେ ଯୁବରାଜ ସିଂ 2ୟ କ୍ରିକେଟର ଭାବେ ଏହି ରେକର୍ଡ କରିଥିଲେ ।
12 ବଲ୍ରେ ଅର୍ଦ୍ଧଶତକ ହାସଲ
ଇଂଲଣ୍ଡ ବିପକ୍ଷରେ ଖେଳାଯାଉଥିବା ପ୍ରଥମ ଟି-20 ବିଶ୍ବକପରେ ଯୁବରାଜ ସିଂ 12 ବଲ୍ରେ ନିଜର ଅର୍ଦ୍ଧଶତକ ପୂରଣ କରିଥିଲେ । ଯାହା ଅନ୍ତରାଷ୍ଟ୍ରୀୟ କ୍ରିକେଟର ସମସ୍ତ ଫର୍ମାଟରେ ଏହି ରେକର୍ଡ ରହିଛି । ଯୁବି ମୋଟ 16ବଲ୍ରେ 58ରନ କରିଥିଲେ । ସେଥିରେ 7ଛକା ଓ 3ଚୌକା ସାମିଲ ଥିଲା । ଯୁବିଙ୍କ ଏହି ଦମ୍ଦାର ପାଳି ଦ୍ବାରା ଭାରତ 218/4ରନ୍ର ସ୍କୋର କରିଥିଲା ଓ ଇଂଲଣ୍ଡକୁ 18ରନରେ ପରାସ୍ତ କରିଥିଲା । ଶେଷରେ ଏହି ଟୁର୍ଣ୍ଣାମେଣ୍ଟର ଚମ୍ପିଆନ ଭାରତ ହୋଇଥିଲା ।
ଯୁବରାଜ ସିଂ ଅନ୍ତରାଷ୍ଟ୍ରୀୟ କ୍ୟାରିଅରେ 402ଟି ମ୍ୟାଚ ଖେଳିଛନ୍ତି । ସେଥିରୁ 40ଟି ଟେଷ୍ଟ, 304 ଦିନିକିଆ ଓ 58ଟି-20 ମ୍ୟାଚ ସାମିଲ ଅଛି । 3ଟି ଫର୍ମାଟରେ ମୋଟ 11ହଜାର 778ରନ ହାସଲ କରିଛନ୍ତି ଯୁବି । ସେଥିମଧ୍ୟରେ ଟେଷ୍ଟ ମ୍ୟାଚରେ 1900ରନ୍ , ଦିନିକିଆରେ 8701ରନ୍ ଓ ଟି-20ରେ 1177ରନ ହାସଲ କରିଛନ୍ତି ।
ଯୁବରାଜ ସିଂ ନିଜର କ୍ୟାରିଅରରେ ମୋଟ 1,496ଟି ଚୌକା-ଛକା ହାସଲ କରିଛନ୍ତି । ଦିନିକିଆରେ 908ଟି ଚୌକା ଓ 155ଛକା, ଟି-20ରେ 77ଟି ଚୌକା ଓ 74ଟି ଛକା ଓ ଟେଷ୍ଟରେ 260ଟି ଚୌକା ଓ 22ଟିଛକା ଅକ୍ତିଆର କରିଛନ୍ତି ।
