ନୂଆଦିଲ୍ଲୀ: ଶ୍ରୀଲଙ୍କା ଓ ଅଷ୍ଟ୍ରେଲିଆ ବିପକ୍ଷ ସିରିଜ ପାଇଁ ଭାରତୀୟ ଦଳ ଘୋଷଣା ହୋଇଛି । ତେବେ ପେସ ବୋଲର ଦୀପକ ଚହର 2020 ଏପ୍ରିଲ ପର୍ଯ୍ୟନ୍ତ ଦଳରୁ ବାହାରେ ରହିବେ ବୋଲି ମୁଖ୍ୟ ଚୟନକର୍ତ୍ତା ଏମଏସକେ ପ୍ରସାଦ କହିଛନ୍ତି ।
ଦୀପକ ଚହର ସଦ୍ୟସମାପ୍ତ ୱେଷ୍ଟଇଣ୍ଡିଜ ବିପକ୍ଷ ବିଶାଖାପଟନମ ଦିନିକିଆରେ ଆହତ ହୋଇଥିଲେ । ଫଳରେ ବାରବାଟୀରେ ଦିନିକିଆରୁ ବାଦ ପଡିଥିଲେ । ଚହର ଦଳରୁ ବାଦ ପଡିବା ପରେ, ନବଦୀପ ସାଇନି ବାରବାଟୀରେ ଡେବ୍ୟୁ କରିବାର ସୁଯୋଗ ପାଇଥିଲେ । ତେବେ ଅନ୍ୟତମ ଷ୍ଟାର ବୋଲର ଜଶପ୍ରୀତ ବୁମରା ଦଳକୁ ଫେରିଛନ୍ତି । ଉଭୟ ଶ୍ରୀଲଙ୍କା ବିପକ୍ଷ ଟି20 ଓ ଅଷ୍ଟ୍ରେଲିଆ ବିପକ୍ଷ ଦିନିକିଆ ସିରିଜରେ ଦଳରେ ସ୍ଥାନ ପାଇଛନ୍ତି । ଓପନର ଶିଖର ଧାୱନ ମଧ୍ୟ ଦଳକୁ ଫେରିଛନ୍ତି । ତେବେ ଶ୍ରୀଲଙ୍କା ବିପକ୍ଷ ଟି20 ସିରିଜରୁ ରୋହିତ ଶର୍ମାଙ୍କୁ ବିଶ୍ରାମ ମିଳିଛି ।
