ଭୁବନେଶ୍ବର: ଓଡିଶା ରାଜଧାନୀରେ ଆୟୋଜିତ ହୋଇଥିବା 33ତମ ଜାତୀୟ ସବ ଜୁନିୟର ବ୍ୟାଡମିଣ୍ଟନ ଚମ୍ପିଆନସିପ ଶେଷ ହୋଇଛି। ଯେଉଁଥିରେ ଓଡିଶା ଗୋଟିଏ ସ୍ବର୍ଣ୍ଣ ଓ ଗୋଟିଏ ରୌପ୍ୟ ପଦକରେ ସନ୍ତୁଷ୍ଟ ହୋଇଛି। ତାମିଲନାଡୁ, ରାଜସ୍ଥାନ ଓ ହରିୟାଣାର ଖେଳାଳି ଏକାଧିକ ସ୍ବର୍ଣ୍ଣ ପଦକ ଜିତିବାର ସଫଳ ହୋଇଛନ୍ତି। ଓଡିଶାର ଶ୍ବେତପର୍ଣ୍ଣା ପଣ୍ଡା 15 ବର୍ଷରୁ କମ ବର୍ଗରେ ମିକ୍ସଡ ଡବଲରେ ତେଲେଙ୍ଗାନାର ସ୍ବାତିକ ରେଡ୍ଡିଙ୍କ ସହ ନିଜର ସ୍ବର୍ଣ୍ଣ ପଦକ ସେୟାର କରିଥିବା ବେଳେ ଆୟୁଷ ପଟ୍ଟନାୟକ 17 ବର୍ଷରୁ କମ ବର୍ଗର ବାଳକ ବିଭାଗ ଡବଲ୍ସରେ କର୍ଣ୍ଣାଟକ ସହଯୋଗୀ ସୁବାଷ ଭିଙ୍କ ସହ ରୌପ୍ୟ ମେଡାଲ ସେୟାର କରିଛନ୍ତି।
ସମ୍ପୂର୍ଣ୍ଣ ପ୍ରତିଯୋଗିତାର 10ଟି ପଦକ ମଧ୍ୟରୁ ତାମିଲନାଡୁ, ରାଜସ୍ଥାନ ଓ ହରିୟାଣାର ଉଦୀୟମାନ ସଟଲର 6ଟି ସ୍ବର୍ଣ୍ଣ ପଦକ ହାସଲ କରିଛନ୍ତି । ସେହିପରି କର୍ଣ୍ଣାଟକ, ଆସାମ ଓ ଓ ଉତ୍ତରପ୍ରଦେଶ ଗୋଟିଏ ସ୍ବର୍ଣ ପଦକ ଜିତିବାର ସଫଳ ହୋଇଛନ୍ତି। ହରିୟାଣାର ଖେଳାଳି 15 ବର୍ଷରୁ କମ ବାଳିକା ସିଙ୍ଗିଲସ ଓ 17 ବର୍ଷରୁ କମ ବାଳିକା ଡବଲ୍ସରେ ମୋଟ 2ଟି ପଦକ ହାସଲ କରିଛନ୍ତି। ରାଜସ୍ଥାନ 15 ଓ 17 ବର୍ଷରୁ କମ ବାଳକ ଡବଲ୍ସ ମ୍ୟାଚରେ 2ଟି ସ୍ବର୍ଣ୍ଣ ଜିତିଛନ୍ତି।
ଏହି ଉଦ୍ଯାପନି ଉତ୍ସବରେ ରାଜ୍ୟ ଅର୍ଥ ମନ୍ତ୍ରୀ ନିରଞ୍ଜନ ପୂଜାରୀ, ଶିଳ୍ପମନ୍ତ୍ରୀ କ୍ୟାପଟେନ ଦିବ୍ୟଶଙ୍କର ମିଶ୍ର, କ୍ରୀଡା ସଚିବ ବିଶାଳ ଦେବ,ପ୍ରତିଯୋଗିତାର କନଭେନର ରାଜେଶ ପ୍ରଭାକର ପାଟିଲ, ବ୍ୟାଡମିଣ୍ଟନ ଆସୋସିଏସନ ଅଫ ଇଣ୍ଡିଆର ସାଧାରଣ ସଚିବ ଅଜୟ କୁମାର ସିଂଘାନିଆ ,ଓଡିଶା ବ୍ୟାଡମିଣ୍ଟନ ଆସୋସିଏସନର ଅଧ୍ୟକ୍ଷ ରୋହିତ ପୂଜାରୀ ଓ ଅନ୍ୟମାନେ ଯୋଗଦେଇ ବିଜୟୀ କ୍ରୀଡାବିତଙ୍କୁ ମେଡାଲ ପ୍ରଦାନ କରିବା ସହିତ ପୁରସ୍କୃତ କରିଛନ୍ତି।
ଏହି ଅବସରରେ କ୍ରୀଡା ସଚିବ ଶ୍ରୀ ଦେବ 2020 ପ୍ରଥମାର୍ଦ୍ଧ ସୁଦ୍ଧା ପ୍ରସ୍ତାବିତ ବ୍ୟାଡମିଣ୍ଟନ ଏକାଡେମୀ କାର୍ଯ୍ୟକ୍ଷମ ହୋଇଯିବ ବୋଲି କହିଛନ୍ତି। ଏହା ସହ ଓଡିଶାରେ ଏହି ଖେଳର ମଧ୍ୟ ଆଦର ବଢୁଥିବା ବେଳେ ଆହୁରି କିପରି ଜାତୀୟ ଓ ଆନ୍ତର୍ଜାତିକ ମ୍ୟାଚ ଆୟୋଜନ କରାଯାଇ ପାରିବ ସେନେଇ ଚିନ୍ତା କରାଯାଉଥିବା କହିଛନ୍ତି।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
