ମୁମ୍ବାଇ: ଘଟିଲା ଦର୍ଶକଙ୍କ ଅପେକ୍ଷାର ଅନ୍ତ । ଦୀର୍ଘ ସମୟରୁ ଲୋକପ୍ରିୟ ନିର୍ମାତା ସଞ୍ଜୟ ଲୀଲା ଭଂସାଲୀଙ୍କ ଆଗାମୀ ପ୍ରୋଜେକ୍ଟକୁ ନେଇ କନଫ୍ୟୁଜ ଥିବା ଦର୍ଶକଙ୍କୁ ମିଳିଛି ଗ୍ୟୁଡନ୍ୟୁଜ । ଆଜ୍ଞା ହଁ, ସୁନ୍ଦରୀ ଅଭିନେତ୍ରୀ ଆଲିୟା ଭଟ୍ଟ ଘୋଷଣା କଲେ ସଞ୍ଜୟଙ୍କ ଆଗାମୀ ଫିଲ୍ମ ‘ଗଙ୍ଗୁବାଇ କଥିୱାଡା’ରେ ଅଭିନୟ କରିବା କଥା।
ଫିଲ୍ମକୁ ଆସନ୍ତା ବର୍ଷ ସେପ୍ଟେମ୍ବର 20ରେ ରିଲିଜ କରିବାର ଯୋଜନା କରିଛନ୍ତି ମେକର୍ସ । ‘ଗଙ୍ଗୁବାଇ କଥିୱାଡା’ର ନିର୍ମାଣ ସଞ୍ଜୟଙ୍କ ପ୍ରଡକ୍ସନ ହାଉସ ଏବଂ ଜୟନ୍ତିଲାଲ ଗଡାଙ୍କ ପେନ ଇଣ୍ଡିଆ ଲିମିଟେଡ ମିଳିତ ସହଯୋଗରେ କରାଯିବ ।
ଫିଲ୍ମର ଘୋଷଣା ଆଲିୟା ନିଜ ଟ୍ବିଟର ଆକାଉଣ୍ଟରେ କରିଛନ୍ତି । ସେ ବୁଧବାର ସନ୍ଧ୍ୟାରେ ଏକ ପୋଷ୍ଟ ଜରିଆରେ ଏହାର ସୂଚନା ଫ୍ୟାନ୍ସଙ୍କୁ ଦେଇଥିଲେ । ନାମ ଆପଣ ନିହାତି ଶୁଣିଥିବେ କିନ୍ତୁ କାହାଣୀ ଜାଣିନଥିବେ ଗଙ୍ଗୁବାଇ କଥିୱାଡାଙ୍କର । ଯାହା ସ୍ପେଶାଲ ହେବାକୁ ଯାଉଛି । ସଞ୍ଜୟ ଲୀଲା ଭଂସାଲୀଙ୍କ ନିର୍ଦ୍ଦେଶନାରେ ନିର୍ମାଣ ହେବାକୁ ଯାଉଥିବା ଏହି ଫିଲ୍ମ ଆସନ୍ତା ବର୍ଷ ସେପ୍ଟେମ୍ବର 20ରେ ରିଲିଜ ହେବ ବୋଲି ପୋଷ୍ଟରେ ଲେଖିଛନ୍ତି ଆଲିୟା ।
ପ୍ରକାଶ ଥାଉକି ନିକଟରେ ସଞ୍ଜୟ ବି-ଟାଉନର ଦବଙ୍ଗ ବୟ ସଲମାନ ଖାନ ଓ ଆଲିୟାଙ୍କୁ ନେଇ ରୋମାଣ୍ଟିକ ‘ଇନଶାଲ୍ହା’ ନିର୍ମାଣ କରିବା କଥା ଜୋର ଧରିଥିଲା । କିନ୍ତୁ ସଲମାନ ଓ ସଞ୍ଜୟଙ୍କ ମଧ୍ୟରେ କିଛି ଯୁକ୍ତିତର୍କ ହେବାରୁ ଫିଲ୍ମ ନିର୍ମାଣ ଉପରେ ଲାଗିଥିଲା ଫୁଲଷ୍ଟପ । ଯାହାକୁ ନେଇ ଖୁବ୍ ନିରାଶ ହୋଇଥିଲେ ଦର୍ଶକ । ଏବେ ଆଲିୟାଙ୍କ ଏହି ଘୋଷଣା ପରେ ଖୁସି ହୋଇଯାଇଛନ୍ତି ଫ୍ୟାନ୍ସ ।
