ଭୁବନେଶ୍ବର: ଶୁକ୍ରବାର ରିଲିଜ ହୋଇଯାଇଛି ଚର୍ଚ୍ଚିତ ଚଳଚ୍ଚିତ୍ର ‘ଲଭ ଟୁଇଷ୍ଟ’ । ରିଲିଜ ପୂର୍ବରୁ ଅନନ୍ତ ଭାରତୀ କ୍ରିଏସନ ନିବେଦିତ ଏହି ଫିଲ୍ମର ପ୍ରିମିୟର ସ୍ଥାନୀୟ ରବି ଟକିଜରେ ରଖାଯାଇଥିଲା । ଅନନ୍ତ କୁମାର ସାମଲ ଓ ଅନନ୍ତ ସିଂଙ୍କ ପ୍ରଯୋଜନାରେ ନିର୍ମିତ ହେଉଥିବା ଏହି ରୋମାଣ୍ଟିକ ଚଳଚ୍ଚିତ୍ରଟି ଏକ ମୌଳିକ କାହାଣୀକୁ ନେଇ ନିର୍ମାଣ ହୋଇଥିବା କହିଛନ୍ତି ଅନନ୍ତ ସିଂ।
ଯାହାକି ଏକ ବସ୍ତି ଯୁବକର ସଂଘର୍ଷ କାହାଣୀକୁ ନେଇ କେନ୍ଦ୍ରିତ ବୋଲି ସେ କହିଛନ୍ତି। ଚଳଚ୍ଚିତ୍ରରେ କାହାଣୀ, ଚିତ୍ରନାଟ୍ୟ, ସଂଳାପ ଓ ନିର୍ଦ୍ଦେଶନା ସଚ୍ଚିଦାନନ୍ଦ ସାମଲ ଦେଇଥିବାବେଳେ ବାପୁ ଗୋସ୍ବାମୀଙ୍କ ଗୀତକୁ ଶାନଦାର ସଙ୍ଗୀତରେ ସଜାଇଛନ୍ତି ସୁଶୀଲ ଦଳାଇ।
ଏହି ଚଳଚ୍ଚିତ୍ରରେ ମୁଖ୍ୟ ଭୂମିକାରେ ସଚ୍ଚିଦାନନ୍ଦ ଓ ମନସ୍ମିତାଙ୍କୁ ଦେଖିବାକୁ ମିଳିଛି। ଚଳଚ୍ଚିତ୍ର ଜରିଆରେ ଓଲଉଡିରେ ଡେବ୍ୟୁ କରିଛନ୍ତି ମନସ୍ମିତା । ସଚ୍ଚିଦାନନ୍ଦଙ୍କ ବ୍ୟତୀତ ଚଳଚ୍ଚିତ୍ରରେ ଲୋକପ୍ରିୟ ଅଭିନେତା ମିହିର ଦାସ, ପିଣ୍ଟୁ ନନ୍ଦ, ପୁଷ୍ପା ପଣ୍ଡା, କାଳି ଓ ପ୍ରଜ୍ଞା ଖଟୁଆଙ୍କ ଶାନଦାର ଅଭିନୟ ଦର୍ଶକଙ୍କୁ ଆକୃଷ୍ଟ କରିଛି । ପ୍ରେମ କାହାଣୀକୁ ନେଇ ଆଧାରିତ ହୋଇଥିବାରୁ ଫିଲ୍ମଟି ଯୁବପିଢିଙ୍କ ବେଶ ମନ କିଣିଛି ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
