ମୁମ୍ବାଇ: ସୋନୁ ସୁଦ ଏମିତି ଏକ ନାମ ଯାହା ବର୍ତ୍ତମାନ ସମସ୍ତଙ୍କ ପାଇଁ ଭଗବାନଙ୍କ ଭଳି । ଏବେ ତାଙ୍କୁ ସମସ୍ତେ ଭଗବାନଙ୍କ ଆଖି ଦେବା ସହ ପୂଜା କରୁଛନ୍ତି । କୋରୋନା କାଳରେ ତାଙ୍କ ମହାନତା ପାଇଁ ତାଙ୍କୁ ସବୁ ମହଲରେ ପ୍ରଶଂସା ମିଳିବାରେ ଲାଗିଛି । ଆଉ ତାଙ୍କୁ ସର୍ବଦା ମନେ ରଖି ସମ୍ମାନ ଦେବା ପାଇଁ ଏବେ ତେଲେଙ୍ଗାନାରେ ତାଙ୍କ ନାମରେ ନିର୍ମାଣ ହୋଇଛି ଏକ ମନ୍ଦିର ।
ଆଜ୍ଞା ହଁ, ସୋନୁଙ୍କ ଶାନଦାର କାର୍ଯ୍ୟ ପାଇଁ ତେଲେଙ୍ଗାନାର ଗ୍ରାମବାସୀ ତାଙ୍କ ସମ୍ମାନାର୍ଥେ ଏକ ମନ୍ଦିର ନିର୍ମାଣ କରିଛନ୍ତି । ରବିବାର ଦିନ ତେଲେଙ୍ଗାନାର ସିଦ୍ଧିପେଟ୍ ଜିଲ୍ଲାର ଡୁବା ଟାଣ୍ଡା ଗାଁର ଗ୍ରାମବାସୀ ପ୍ରଶାସନ ସହାୟତାରେ ନିର୍ମିତ ଏହି ମନ୍ଦିରରେ ସୋନୁ ସୁଦଙ୍କ ଏକ ପ୍ରତିମୂର୍ତ୍ତି ଉନ୍ମୋଚନ କରିଛନ୍ତି । ଏହି ସମୟରେ ଆରତୀ ମଧ୍ୟ ପରିବେଷଣ କରାଯାଇଥିଲା ଏବଂ ପାରମ୍ପାରିକ ପୋଷାକ ପିନ୍ଧିଥିବା ସ୍ଥାନୀୟ ମହିଳାମାନେ ମଧ୍ୟ ଲୋକ ଗୀତ ଗାଉଥିଲେ ।
ପ୍ରକାଶ ଥାଉକି କୋରୋନା ସଙ୍କଟ ସମୟରେ ଦେଶବାସୀଙ୍କ ସେବା କରିବା ପାଇଁ ସୋନୁ ନିଜର 10 କୋଟିର ସମ୍ପତ୍ତି ବନ୍ଧା ପକାଇଛନ୍ତି । ଖାଲି ଏତିକି ନୁହେଁ ସେ ଏଯାବତ ଲକ୍ଷ ଲକ୍ଷ ଲୋକଙ୍କୁ ଖାଦ୍ୟଠୁ ନେଇ ରୋଜଗାର ମଧ୍ୟ ଯୋଗାଇ ସାରିଲେଣି । ସେ ଏବେ ମଧ୍ୟ ସୋସିଆଲ ମିଡିଆରେ ଅଭାବୀଙ୍କ ଦୁଃଖ ଦେଖି ନିଜ ଟିମ ସହ ସାହାଯ୍ୟ କରିବାକୁ ବାହାରି ପଡୁଛନ୍ତି । ସୋନୁଙ୍କ ସହଯୋଗରେ ଅନେକ ଦିବ୍ୟାଙ୍ଗ ସୁସ୍ଥ ହୋଇସାରିଲେଣି ।
ବ୍ୟୁରୋ ରିପୋର୍ଟ, ଇଟିଭି ଭାରତ
