ମୁମ୍ବାଇ: ଟିଆରପି ସ୍କାମ କରୁଥିବା ତିନୋଟି ଚ୍ୟାନେଲର ଖୁଲାସା କରିଛି ମୁମ୍ବାଇ ପୋଲିସ । ଯାହା ପରେ ସୁପରଷ୍ଟାର ସଲମାନ ଖାନଙ୍କ ପ୍ରତିକ୍ରିୟା ଦେଖିବାକୁ ମିଳୁଛି । ‘ବିଗବସ 14’ ର ୱିକେଣ୍ଡ କା ୱାର ଏପିସୋଡରେ ଏହାକୁ ନେଇ ବୟାନ ଦେଇଥିଲେ ସେ। ତାଙ୍କ ନାମ ନେଇଥିବା ନ୍ୟୁଜ ଚ୍ୟାନେଲ ଉପରେ ସେ ବର୍ତ୍ତମାନ ବର୍ଷିଛନ୍ତି ।
କଥାଟି ହେଲା ଯେ ସୁଶାନ୍ତ ସିଂ ରାଜପୁତଙ୍କ ମାମଲାରେ କିଛି ମିଡିଆ ଚ୍ୟାନେଲ ସଲମାନଙ୍କୁ ମଧ୍ୟ ଟାର୍ଗେଟ କରିଥିଲେ । ପ୍ରାଇମ ଟାଇମ ସମୟରେ ତାଙ୍କୁ ନ୍ୟୁଜ ଚ୍ୟାନେଲ ତରଫରୁ ପ୍ରଶ୍ନ ପଚରାଯାଇଥିଲା । ସେ କୌଣସି ଚ୍ୟାନେଲ ନାଁ ନନେଇ ବିଗବସ ପ୍ରତିଯୋଗୀଙ୍କୁ କହିଥିଲେ, ‘କେବଳ ଟିଆରପି ପାଇଁ କିଛି କରିବାର ଆବଶ୍ୟକ ନୁହେଁ ବରଂ ସଠିକ୍ ଖେଳ ଖେଳିବା ଦରକାର । ଫାଲତୁରେ ଚିତ୍କାର କଲେ ଦର୍ଶକ ଟିଭି ବନ୍ଦ କରିଦେବେ । ନହେଲେ ଭିନ୍ନ ଚ୍ୟାନେଲ ଲଗାଇବେ ।’ ଏହି ବୟାନ ଦେଇସାରିବା ପରେ ସେ ଆହୁରି କହିଥିଲେ ଯେ ତାଙ୍କୁ ଯାହା କହିବାର ଥିଲା ସେ କହିସାରିଛନ୍ତି ଯିଏ ବୁଝିବା କଥା ସେ ବୁଝିଯିବେ।
ପ୍ରକାଶ ଥାଉକି ସୁଶାନ୍ତଙ୍କ ମୃତ୍ୟୁ ପରଠୁ ସଲମାନଙ୍କ ଉପରେ ପରିବାରବାଦ ଅଭିଯୋଗ ଲାଗିଥିଲା । ସୁଶାନ୍ତଙ୍କ ଅନେକ ଫ୍ୟାନ୍ସ ସଲମାନଙ୍କ ଫିଲ୍ମକୁ ବୟକଟ କରିବାକୁ ମଧ୍ୟ ଦାବି କରିସାରିଛନ୍ତି । ବଲିଉଡରେ ଡ୍ରଗ କାରବାରରେ ମଧ୍ୟ ଆସିଥିଲା ତାଙ୍କ ନାମ ।
