ମୁମ୍ବାଇ: କୋରୋନା ମହାମାରୀର ଦ୍ବିତୀୟ ଲହର ସହ ଲଢୁଛନ୍ତି ଦେଶବାସୀ । ଏହାର ପ୍ରଭାବ ଜନସାଧାରଣଙ୍କ ଉପରେ ପଡିଛି । ଅନେକ ଲୋକ ବେକାର ହୋଇଗଲେ । ସେପଟେ ଫିଲ୍ମ ଇଣ୍ଡଷ୍ଟ୍ରିରେ ସୁଟିଂ ବିଭିନ୍ନ ସହରକୁ ସିଫ୍ଟ କରାଯାଇଛି । କାରଣ ମହାରାଷ୍ଟ୍ରରେ ମାମଲା ବୃଦ୍ଧି ହେତୁ ସୁଟିଂ ବନ୍ଦ ହୋଇଯାଇଛି । ଏହି ସମୟରେ ଖିଲାଡି ଅକ୍ଷୟ କୁମାର ପୁଣି ଥରେ ସାହାଯ୍ୟ କରିବାକୁ ଆଗେଇ ଆସିଛନ୍ତି।
ରିପୋର୍ଟ ଅନୁଯାୟୀ, ଅକ୍ଷୟ ପ୍ରତି ମାସରେ 3,600 ନୃତ୍ୟଶିଳ୍ପୀଙ୍କୁ ମାଗଣାରେ ରାସନ ଯୋଗାଇବା ଦାୟିତ୍ବ ନେଇଛନ୍ତି । କୋରିଓଗ୍ରାଫର ଗଣେଶ ଆଚାର୍ଯ୍ୟ ଏକ ସାକ୍ଷାତକାର ସମୟରେ ଏହି ସୂଚନା ଦେଇଛନ୍ତି ।
ଗଣେଶ କହିଛନ୍ତି ଯେ, ତାଙ୍କର 50ତମ ଜନ୍ମଦିନରେ ଅକ୍ଷୟ ତାଙ୍କୁ କଣ ସାହାଯ୍ୟ କରିପାରିବେ ବୋଲି ପଚାରିଥିଲେ । ଏହା ପରେ ଗଣେଶ, ଅକ୍ଷୟଙ୍କୁ ଇଣ୍ଡଷ୍ଟ୍ରିର 1600 ଜୁନିୟର ନୃତ୍ୟଶିଳ୍ପୀ ଏବଂ 2000 ପୃଷ୍ଠଭୂମି ନୃତ୍ୟଶିଳ୍ପୀଙ୍କୁ ସାହାଯ୍ୟ କରିବାକୁ ଅନୁରୋଧ କରିଥିଲେ। ଅକ୍ଷୟ ଗଣେଶଙ୍କ ଅନୁରୋଧ ଗ୍ରହଣ କରିଥିଲେ ।
ସୁରକ୍ଷା ଏବଂ ସ୍ବାସ୍ଥ୍ୟ ପ୍ରୋଟୋକଲକୁ ଦୃଷ୍ଟିରେ ରଖି ଏହି ଅଭିଯାନ ଆରମ୍ଭ ହେବ ବୋଲି ଗଣେଶ କହିଛନ୍ତି । ନୃତ୍ୟଶିଳ୍ପୀ କିମ୍ବା କୋରିଓଗ୍ରାଫର ପ୍ରତି ମାସରେ ଟଙ୍କା କିମ୍ବା ରାସନ କିଟ୍ ପାଇପାରିବେ ।
ଏକ ବାର୍ତ୍ତାଳାପ ସମୟରେ ଗଣେଶ ବ୍ୟାଖ୍ୟା କରିଛନ୍ତି ଯେ ତାଙ୍କ ପତ୍ନୀ ଏହି ଫାଉଣ୍ଡେସନ ମାଧ୍ୟମରେ ଏହି କାର୍ଯ୍ୟକଳାପ ସହିତ ଗଭୀର ଭାବରେ ଜଡିତ ଅଛନ୍ତି । ସେ ବ୍ୟକ୍ତିଗତ ଭାବେ ପ୍ୟାକିଂ ଏବଂ ବିତରଣର ତଦାରଖ କରୁଛନ୍ତି ।
