ମୁମ୍ବାଇ: ଗୁରୁବାର ଶେରଶାହ ତଥା କ୍ୟାପଟେନ ବିକ୍ରମ ବତ୍ରାଙ୍କ ୪୭ତମ ଜନ୍ମବାର୍ଷିକୀରେ ତାଙ୍କୁ ଶ୍ରଦ୍ଧାଞ୍ଜଳି ଜଣାଇଛନ୍ତି ରିଲ ଶେରଶାହ ସିଦ୍ଧାର୍ଥ ମଲହୋତ୍ରା । କାର୍ଗିଲ ଯୁଦ୍ଧରେ ଦେଶ ପାଇଁ ନିଜ ଜୀବନକୁ ବଳିଦାନ ଦେଇଥିବା ଏହି ବୀର ଯବାନଙ୍କୁ ସର୍ବଦା ଦେଶବାସୀ ମନେ ରଖିବେ ବୋଲି ସେ କହିଛନ୍ତି । ଶହୀଦ ବିକ୍ରମଙ୍କ ଜୀବନ କାହାଣୀ ଉପରେ ଅଭିନୟ କରିଥିବା ଅଭିନେତା ସିଦ୍ଧାର୍ଥ ତାଙ୍କ ଜନ୍ମବାର୍ଷିକୀରେ ସୋସିଆଲ ମିଡ଼ିଆରେ ଏକ ଭାବପୂର୍ଣ୍ଣ ନୋଟ ସେୟାର କରିଛନ୍ତି ।
ସିଦ୍ଧାର୍ଥ ଟ୍ବିଟ କରି ଲେଖିଛନ୍ତି ଯେ ଯେଉଁମାନେ ଆମ ଜୀବନକୁ ସ୍ପର୍ଶ କରନ୍ତି ବା ନିଜ କାର୍ଯ୍ୟ ଦ୍ବାରା ଲୋକଙ୍କ ଆତ୍ମାକୁ ସ୍ପର୍ଶ କରନ୍ତି, ସେମାନେ ଆମ ହୃଦୟରେ ସବୁଦିନ ପାଇଁ ରୁହନ୍ତି । କ୍ୟାପଟେନ ବିକ୍ରମ ବତ୍ରା, ତୁମେ ତୁମର ଜୀବନକୁ ବୀରତ୍ବ, ଜ୍ଞାନ, ଚମତ୍କାରିତା ଏବଂ ଦେଶ ପ୍ରତି ପ୍ରେମ ସହିତ ସମସ୍ତଙ୍କ ଆତ୍ମାକୁ ସ୍ପର୍ଶ କରିଛ। ଏହି ବଳିଦାନ ପାଇଁ ସେ ସର୍ବଦା ଆମ ହୃଦୟରେ ରହିବେ ବୋଲି ସିର୍ଦ୍ଧାର୍ଥ କହିଛନ୍ତି । ଶହୀଦ ବିକ୍ରମଙ୍କୁ ସ୍ମରଣ କରି ସେ ଜୟ ହିନ୍ଦ ବୋଲି ଲେଖିଛନ୍ତି ।
୧୯୯୯ ମସିହା କାର୍ଗିଲ ଯୁଦ୍ଧରେ କ୍ୟାପଟେନ ବିକ୍ରମ ବର୍ତ୍ତା ପାକିସ୍ତାନ ସହିତ ଲଢେଇ କରି ଶହୀଦ ହୋଇଥିଲେ । ତେବେ ସେ ମାତ୍ର ୨୪ ବର୍ଷ ବୟସରେ ନିଜ ବୀରତ୍ବ ପ୍ରଦର୍ଶନ କରି ଦେଶ ମାତୃକା ପାଇଁ ଜୀବନ ଦେଇଥିଲେ । ଏହି ବଳିଦାନ ପାଇଁ ତାଙ୍କୁ ସବୁଠାରୁ ଅଧିକ ସମ୍ମାନରେ ସମ୍ମାନିତ କରାଯାଇଛି । ଯୁଦ୍ଧକାଳୀନ ଗ୍ୟାଲେଣ୍ଟ୍ରି ଯେମିତିକି ପରମବୀର ଚକ୍ର ଭଳି ସମ୍ମାନଜନକ ଆୱାର୍ଡ ଦିଆଯାଇଛି ।
ବଲିଉଡ଼ ଅଭିନେତା ସିଦ୍ଧାର୍ଥ ଏହି ବୀର ଯବାନଙ୍କ ଭୂମିକାରେ ଅଭିନୟ କରିଥିଲେ । ଗତ ଅଗଷ୍ଟ ୧୨ ତାରିଖ ପୂର୍ବରୁ ଆମାଜନ ପ୍ରାଇମ ଭିଡ଼ିଓରେ ଏହି ଫିଲ୍ମଟି ରିଲିଜ ହୋଇଥିଲା । ଯାହାକୁ ଦର୍ଶକ ଖୁବ ପସନ୍ଦ କରିଥିଲେ । କାର୍ଗିଲ ଯୁଦ୍ଧରେ ବିକ୍ରମଙ୍କୁ ଦିଆଯାଇଥିବା କୋଡ ନାମ(ଶେରଶାହ) ନାମରେ ଫିଲ୍ମର ନାମ ରଖାଯାଇଥିଲା । ଏଥିରେ ଅଭିନେତ୍ରୀ କିଆରା ଆଡ଼ଭାନୀ କ୍ୟାପେଟନ ବିକ୍ରମଙ୍କ ଭାବି ପତ୍ନୀ ଡିମ୍ପଲ ଛିମାଙ୍କ ଭୂମିକାରେ ଅଭିନୟ କରିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
