ମୁମ୍ବାଇ: ନିର୍ଦ୍ଦେଶିକା ଜୋୟା ଅଖତରଙ୍କ ହିଟ୍ ଫିଲ୍ମ ‘ଗଲି ବୟ’ଦର୍ଶକଙ୍କ ଖୁବ୍ ମନ କିଣିଥିଲା । ରଣବୀର ସିଂ ଓ ଆଲିୟା ଭଟ୍ଟ ଫିଲ୍ମରେ ଦମଦାର ଅଭିନୟ କରିଥିଲେ । ଏବେ ଫିଲ୍ମକୁ ନେଇ ନୂଆ ଖବର ସାମ୍ନାକୁ ଆସିଛି । ଆଜ୍ଞା ହଁ, ‘ଗଲି ବୟ’ ଫିଲ୍ମକୁ ଓସ୍କାର 2020ରେ ଏଣ୍ଟ୍ରି ମିଳିଯାଇଛି । ଯାହାକୁ ନେଇ ଉତ୍ସାହିତ ମେକର୍ସ । ଭାରତ ତରଫରୁ ଫିଲ୍ମକୁ ବେଷ୍ଟ ଇଣ୍ଟରନ୍ୟାସନାଲ ଫିଚର ଫିଲ୍ମ କ୍ୟାଟେଗୋରୀରେ ଓସ୍କାର ପାଇଁ ପଠାଯାଇଛି ।
‘ଗଲି ବୟ’ ଫିଲ୍ମରେ ମୁମ୍ବାଇର ଷ୍ଟ୍ରିଟ ରାପରଙ୍କ କାହାଣୀ ଦେଖିବାକୁ ମିଳିଥିଲା । କିପରି ସଂଘର୍ଷ କରି ଜଣେ ସଫଳତା ହାସିଲ କରିପାରୁଛି ତାହା ଉପରେ ପର୍ଯ୍ୟବେଶିତ ଏହି ଫିଲ୍ମ । ରଣବୀର ଫିଲ୍ମରେ ମୁରାଦ ଭୂମିକାପରେ ଅଭିନୟ କରିଥିଲେ । ଯିଏ ସ୍ଲମରୁ ରାପର ସାଜିଥିଲେ ।
ଅଭିନେତା, ନିର୍ଦ୍ଦେଶକ ଫରହାନ ଅଖତର ଟ୍ବିଟରରେ ଫିଲ୍ମ ଓସ୍କାରରେ ସାମିଲ ହେବାର ସୂଚନା ଦେଇଛନ୍ତି । ସେ ମଧ୍ୟ ଏହି ଫିଲ୍ମର ପ୍ରଯୋଜକ ଥିଲେ । ସେ ରଣବୀରଙ୍କ ଏକ ପୋଷ୍ଟର ସେୟାର କରି ଲେଖିଛନ୍ତି, ‘ଗଲି ବୟକୁ ଭାରତ ପକ୍ଷରୁ 92ତମ ଓସ୍କାର ପାଇଁ ଚୟନ କରାଯାଇଛି । ଫିଲ୍ମ ଫେଡରେଶନକୁ ଅନେକ ଅନେକ ଧନ୍ୟବାଦ ଏବଂ ଜୋୟାଙ୍କୁ ଶୁଭକାମନା ।’
ପ୍ରକାଶ ଥାଉକି ‘ଗଲି ବୟ’କୁ ଏହାପୂର୍ବରୁ ବେଷ୍ଟ ଏସିଆନ ଫିଲ୍ମ କ୍ୟାଟେଗୋରୀରେ(NETPAC)ରୁ ଆୱାର୍ଡ ମିଳିଥିଲା । ଏହି ଆୱାର୍ଡ ସମାରୋହ ସାଉଥ କୋରିଆରେ ଆୟୋଜିତ ହୋଇଥିଲା । ଏବର୍ଷ ଅଗଷ୍ଟରେ ମେଲବର୍ଣ୍ଣରେ ଆୟୋଜିତ ହୋଇଥିବା ଇଣ୍ଡିଆନ ଫିଲ୍ମ ଫେଷ୍ଟିଭାଲରେ ମଧ୍ୟ ‘ଗଲି ବୟ’କୁ ବେଷ୍ଟ ଫିଲ୍ମ ଆୱାର୍ଡ ମିଳିସାରିଛି ।
