ମୁମ୍ବାଇ: ସେଲିବ୍ରିଟି ଡ୍ୟାନ୍ସ ରିୟାଲିଟି ଶୋ ‘ନଚ ବଲିଏ’ ପୁଣିଥରେ ଟିଭିରେ ଦେଖିବାକୁ ମିଳିବ । ‘ନଚ ବଲିଏ ସିଜନ 10’ ଆସନ୍ତା ଜୁନ ମାସରେ ପ୍ରସାରଣ ହେବାକୁ ଯାଉଛି । ଯାହାର ପ୍ରସ୍ତୁତି ଏବେଠୁ ଆରମ୍ଭ ହୋଇଯାଇଛି । ସେପଟେ ସେଲିବ୍ରିଟି କପଲଙ୍କୁ ଶୋରେ ସାମିଲ କରିବାକୁ ଚେଷ୍ଟା ଚଳାଇଛନ୍ତି ମେକର୍ସ । ଇତିମଧ୍ୟରେ ଶୁଣିବାକୁ ମିଳୁଛି ଗତ ବର୍ଷ ଡିସେମ୍ବରରେ ବିବାହ ବନ୍ଧନରେ ଆବଦ୍ଧ ହୋଇଥିବା ଯୋଡି ଆଦିତ୍ୟ ନାରାୟଣ ଓ ଶ୍ବେତା ଅଗ୍ରୱାଲଙ୍କୁ ଶୋରେ ସାମିଲ କରିବାକୁ ଚାହୁଁଛନ୍ତି ମେକର୍ସ ।
ଯାହାପାଇଁ ଦୁହେଁଙ୍କୁ କଲ୍ ମଧ୍ୟ ଯାଇଛି । ହେଲେ ଏଯାବତ ଏହି ଯୋଡି ଶୋରେ ସାମିଲ ହେବ କି ନାହିଁ ତାନେଇ କୌଣସି ସୂଚନା ଦେଇନାହାଁନ୍ତି । ‘ନଚ ବଲିଏ 10’ ଗତ ବର୍ଷ ଅଗଷ୍ଟରେ ପ୍ରସାରଣ ହୋଇଥାଆନ୍ତା । ହେଲେ କୋରୋନା ପ୍ରକୋପ ପାଇଁ ଶୋର ସୁଟିଂ ସ୍ଥଗିତ ରଖିଥିଲେ ମେକର୍ସ ।
ଏହାର ପୂର୍ବ ସିଜନର ପ୍ରଯୋଜନା ସୁପରଷ୍ଟାର ସଲମାନ ଖାନଙ୍କ ପ୍ରଡକ୍ସନ ହାଉସ ଦ୍ବାରା କରାଯାଇଥିଲା । ଯେଉଁଥିରେ ପ୍ରିନ୍ସ ନରୁଲା ଏବଂ ୟୁବିକା ଚୌଧୁରୀ ୱିନର ସାଜିଥିଲେ । ଏବେ ଦେଖିବା ବାକି ରହିଲା ସିଜନ 10ର ଟାଇଟେଲ କେଉଁ ଯୋଡିଙ୍କ ଭାଗ୍ୟରେ ଲାଗିବ ।
