ମୁମ୍ବାଇ: ଚୁଲବୁଲି ଅଭିନେତ୍ରୀ ତାପସୀ ପନ୍ନୁ ସୋମବାର ନିଜର ଅପକମିଂ ଥ୍ରିଲର ଆକ୍ସନ ଫିଲ୍ମ ‘ଦୋବାରା’ର ସୁଟିଂ ଆରମ୍ଭ କରିଛନ୍ତି । ଯାହାର ନିର୍ଦ୍ଦେଶ ଦାୟିତ୍ବ ତୁଲାଉଛନ୍ତି ଫେମସ ନିର୍ଦ୍ଦେଶକ ଅନୁରାଗ କଶ୍ୟପ । ପୂର୍ବରୁ ଏହି ଯୋଡି 2018ରେ ଆସିଥିବା ରୋମାଣ୍ଟିକ ଡ୍ରାମା ଫିଲ୍ମ ‘ମନମର୍ଜିଆଁ’ରେ ଏକାଠି କାମ କରିଥିଲେ ।
ସୁଟିଂ ଆରମ୍ଭ କରିବା ଅବସରରେ ତାପସୀ ଟ୍ବିଟରେ ଏକ ପୋଷ୍ଟ କରି ଲେଖିଥିଲେ, ‘ଦୋବାରା ସିରିଜ। କାରଣ କିଛି ସହଯୋଗ ପୁନରାବୃତ୍ତି କରିବାକୁ ଯୋଗ୍ୟ ଅଟେ । ଅଧିକ ସ୍ମୃତି ସୃଷ୍ଟି କରିବାକୁ ପ୍ରସ୍ତୁତ । କାରଣ ଆମେ ମନମର୍ଜିଆନ ପରେ ନୂଆ କାହାଣୀ ଆଣିବୁ । ଅନୁରାଗ କଶ୍ୟପ ଚାଲନ୍ତୁ ଦୋବାରା ଆରମ୍ଭ କରିବା ।’
ସେହିପରି ଫିଲ୍ମ ବିଷୟରେ ଆଲୋଚନା କରି ସେ କହିଛନ୍ତି, ‘ଏହା ହେଉଛି ଏକ ଥ୍ରିଲର ଫିଲ୍ମ । ଯାହା ଭିନ୍ନ ଧରଣର ହେବାକୁ ଯାଉଛି । କାରଣ ଏହାର ନିର୍ଦ୍ଦେଶନା ଅନୁରାଗ କରୁଥିବାର ବେଳେ ଏକତା କପୁର ଏହାର ପ୍ରଯୋଜନା କରୁଛନ୍ତି । ତାଙ୍କ ସହ ଏହା ମୋର ଦ୍ବିତୀୟ ଫିଲ୍ମ । ତେଣୁ ମୁଁ ଜାଣିଛି ସେ କିପରି କାମ କରନ୍ତି । ମୋର ଆଶା ଯେ ଦର୍ଶକଙ୍କୁ ଏହି ଫିଲ୍ମ ପସନ୍ଦ ଆସିବ।’
ପ୍ରକାଶ ଥାଉକି ଏବର୍ଷ ତାପସୀଙ୍କ ବ୍ୟାକ ଟୁ ବ୍ୟାକ ଫିଲ୍ମ ରିଲିଜ ହେବାକୁ ଯାଉଛି । ଏହି କ୍ରମରେ ସାମିଲ ଅଛି ‘ହସୀନ ଦିଲରୁବା’, ‘ରଶ୍ମୀ ରକେଟ’, ‘ସାବାସ୍ ମିଥୁ’ ଓ ‘ଲୁପ୍ ଲପେଟା’ ଭଳି ଫିଲ୍ମ । ଯାହାର ସୁଟିଂ ନିକଟରେ ଶେଷ କରିସାରିଛନ୍ତି ଅଭିନେତ୍ରୀ ।
@IANS
