ମୁମ୍ବାଇ: ଶତାଦ୍ଦୀର ମହାନାୟକ ଏବଂ ବଲିଉଡର ମେଗା ଷ୍ଟାର ଅମିତାଭ ବଚ୍ଚନଙ୍କୁ ଦାଦା ସାହେବ ଫାଲକେ ଆୱାର୍ଡ ପାଇଁ ଚନୟ କରାଯାଇଛି । ତିନି ଦିନ ପୂର୍ବରୁ ଏହି ସମ୍ମାନିତ ଆୱାର୍ଡ ପାଇଁ ତାଙ୍କ ନାମ ଘୋଷିତ ହୋଇଥିଲା । ଏହି ଉପଲବ୍ଧିକୁ ନେଇ ପୁରା ଦେଶବାସୀ ତାଙ୍କୁ ଶୁଭେଚ୍ଛା ଜଣାଇବାରେ ଲାଗିଛନ୍ତି । ଏଥିରୁ ବାଦ ପଡିନାହାଁନ୍ତି ତାଙ୍କ ପୁଅ ତଥା ଅଭିନେତା ଅଭିଷେକ ବଚ୍ଚନ ।
ସେ ମଧ୍ୟ ପିତାଙ୍କୁ ଶୁଭେଚ୍ଛା ଜଣାଇବାକୁ ଯାଇ ସୋସିଆଲ ମିଡିଆରେ ଏକ ମ୍ୟୁଜିକ ଭିଡିଓ ସେୟାର କରିଛନ୍ତି । ସେ ଇନଷ୍ଟାଗ୍ରାମରେ ବମ୍ବେ ଟକିଜ ଫିଲ୍ମର ଏକ ଭିଡିଓ ପୋଷ୍ଟ କରିଛନ୍ତି । 3 ମିନିଟ 36 ସେକେଣ୍ଡର ଏହି ଭିଡିଓରେ ବଲିଉଡର ବିଗ ବିଙ୍କ ସବୁ ଭୂମିକାର ଝଲକ ଦେଖିବାକୁ ମିଳୁଛି । ଆଉ ଏଥିରେ ନଜର ଆସିଛନ୍ତି କୁନି କୁନି ଛୁଆ ମାନେ । ଅଭିଷେକ କେନ୍ଦ୍ରମନ୍ତ୍ରୀ ପ୍ରକାଶ ଜାଭେଦକରଙ୍କ ଟ୍ବିଟକୁ ମଧ୍ୟ ରିଟ୍ବିଟ କରିଛନ୍ତି । ଆଉ କ୍ୟାପସନରେ ଲେଖିଛନ୍ତି, ‘ପିତାଙ୍କ ପାଇଁ ବହୁତ ଖୁସି ଅଛି, ଗର୍ବ ଅନୁଭବ କରୁଛି ।’
ପ୍ରକାଶ ଥାଉକି ବମ୍ବେ ଟକିଜ ଏକ ପ୍ରକାର ସଟ ଫିଲ୍ମ କଲେକ୍ସନ । ଏଥିରେ ଚାରୋଟି ଭିନ୍ନ ଭିନ୍ନ ଫିଲ୍ମକୁ ପର୍ଯ୍ୟବେଶିତ କରାଯାଇଛି । ଯେଉଁଥିରେ ଅମିତାଭଙ୍କ ସଟ ଫିଲ୍ମ ‘ମୁରବ୍ବା’ ମଧ୍ୟ ସାମିଲ ଅଛି । ‘ମୁରବ୍ବା’ ଫିଲ୍ମରେ ଅଭିନେତା ବିନୀତ କୁମାର ସିଂ ବିଗ ବିଙ୍କ ଫ୍ୟାନ ଭୂମିକାରେ ଅଭିନୟ କରିଥିଲେ ।
ବମ୍ବେ ଟକିଜର ନିର୍ଦ୍ଦେଶନା କରନ ଜୋହର, ଦିବାକର ବାନାର୍ଜୀ, ଜୋୟା ଅଖତର ଓ ଅନୁରାଗ କଶ୍ୟପ କରିଛନ୍ତି । ଏହି ଫିଲ୍ମ ହିନ୍ଦୀ ସିନେମାର 100 ବର୍ଷ ପୂରଣ ଅବସରରେ ନିର୍ମାଣ କରାଯାଇଥିଲା ।
