ଅଙ୍କାରା: ଉତ୍ତର-ପଶ୍ଚିମ ତୁର୍କୀର ସକାର୍ୟା ପ୍ରାନ୍ତରେ ଥିବା ଏକ ବାଣ କାରଖାନାରେ ଶୁକ୍ରବାର ହୋଇଛି ଭୟାବହ ଅଗ୍ନିକାଣ୍ଡ । ଏଥିରେ ଅନ୍ୟୁନ 50 ଜଣ ଆହତ ହୋଇଥିବା ଜଣା ପଡିଛି । ଏନେଇ ସକାର୍ୟା ରାଜ୍ୟପାଳ ସେଟିନ ଓକଟେଙ୍କ ସୂଚନା ଦେଇ କହିଛନ୍ତି କି ଘଟଣାରେ ଆହତ 50 ଜଣଙ୍କୁ ତୁରନ୍ତ ଉଦ୍ଧାର କରାଯାଇ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରାଯାଇଛି । ସେମାନଙ୍କ ସ୍ବାସ୍ଥ୍ୟାବସ୍ଥାରେ ସୁଧାର ଆସିଥିବା ବେଳେ ଚିକିତ୍ସା ଜାରି ରହିଛି ।
ସେପଟେ ସ୍ଥାନୀୟ ସୂଚନା ମୁତାବକ ବିସ୍ଫୋରଣ ସମୟରେ କାରଖାନାରେ 172 ଜଣ ଲୋକେ ରହିଥିଲେ । ଏଥିସହ ଭିତରେ 110 ଟନ୍ ବିସ୍ଫୋରକ ରହିଥିଲା । ଘଟଣାସ୍ଥଳରେ ଉଦ୍ଧାରକାର୍ଯ୍ୟ ପାଇଁ 60ରୁ ଉର୍ଦ୍ଧ୍ବ ଆମ୍ବୁଲାନ୍ସ ଓ 2ଟି ହେଲିକପ୍ଟର ପହଞ୍ଚିଥିଲା । ସେପଟେ ଏନେଇ ତୁର୍କୀଶ ରେଡ କ୍ରେସେଣ୍ଟ ରାଷ୍ଟ୍ରପତି କେରେମ କିନିକଙ୍କ ସୂଚନା ମୁତାବକ ସ୍ଥାନୀୟ ଲୋକଙ୍କ ଏହାର ପ୍ରକୋପରୁ ବଞ୍ଚାଇବା ପାଇଁ ଘରରୁ ଦ୍ବାର ଓ ଝରକା ବନ୍ଦ ରଖିବାକୁ ନିର୍ଦ୍ଦେଶ ଦିଆଯାଇଛି । ଏହି କାରଖାନାରେ ହୋଇଥିବା ବିସ୍ଫୋରଣରେ ରସାୟନିକ ପଦାର୍ଥ ନିର୍ଗତ ହୋଇଥିବାରୁ ଏହାର ସ୍ବାସ୍ଥ୍ୟଗତ ପ୍ରଭାବ ଅତି ଭୟଙ୍କର ହୋଇପାରେ ବୋଲି ସେ ଆଶଙ୍କା ପ୍ରକାଶ କରିଛନ୍ତି ।
ଦେଶର ବିପର୍ଯ୍ୟୟ ଓ ଆପାତକାଳୀନ ସେବା ପରିଚାଳନା ବିଭାଗ ଏହି ଘଟଣାକୁ ଏକ ଉଦ୍ୟୋଗିତ ଦୁର୍ଘଟଣା ଭାବେ ଘୋଷଣା କରିବା ପାଇଁ କହିଛି । ଏଥିସହ ଘଟଣାରେ ବର୍ତ୍ତମାନ ସୁଦ୍ଧା ରେଡିଏସନର କୌଣସି ସୂଚନା ରହିନଥିବା ସହ 3ଜଣଙ୍କ ଅବସ୍ଥା ସଙ୍କଟାପନ୍ନ ରହିଥିବା ଜଣା ପଡିଛି ।
@IANS
