ଲଣ୍ଡନ: ଦେଶରେ କୋରୋନା ବିପତ୍ତି ସତ୍ତ୍ବେ ଲକଡାଉନ ନିୟମ କୋହଳ କରିବା ପାଇଁ ପଦକ୍ଷେପ ଗ୍ରହଣ କରୁଛନ୍ତି ପ୍ରଧାନମନ୍ତ୍ରୀ ବୋରିଶ ଜନସନ । ଏନେଇ ମଙ୍ଗଳବାର ସେ ଘୋଷଣା କରିଛନ୍ତି କି ଆସନ୍ତା ଜୁନ 15ରୁ ଦେଶରେ ଥିବା ସମସ୍ତ ସାଧାରଣ ଦୋକାନ ଖୋଲାଯିବ । ପୂର୍ବରୁ ଲକଡାଉନ ନିୟମ କୋହଳ କରି କେବଳ ଜରୁରୀ ସେବା ଦୋକାନ ଖୋଲିବା ପାଇଁ ଅନୁମତି ମିଳିଥିବା ବେଳେ ଏବେ ସମସ୍ତ ଦୋକାନ ବଜାର ଖୋଲିବା ପାଇଁ ପ୍ରଧାନମନ୍ତ୍ରୀ ଘୋଷଣା କରିଛନ୍ତି ।
ଡାଉନିଂ ଷ୍ଟ୍ରିଟରେ ହେଉଥିବା କୋରୋନା ଦୈନିକ ବିବରଣୀରେ ବୋରିଶ କହିଛନ୍ତି କି ଦେଶରେ କୋରୋନା ଲଢେଇରେ ଏହା ଆଗାମୀ ପଦକ୍ଷେପ ହେବ । ଏନେଇ ସମସ୍ତ ଦୋକାନ ବଜାର ଖୋଲିବାକୁ ଥିବା ବେଳେ ସମସ୍ତଙ୍କୁ ମାନିବାକୁ ହେବ କିଛି ନୂଆ ନିୟମ । ସେପଟେ ଆଉଟଡୋର ମାର୍କେଟ ଓ କାର ଶୋ’ରୁମ ଆଦି ଜୁନ 1ରୁ ଖୋଲିବା ପାଇଁ ଅନୁମତି ଦେଇଛନ୍ତି ବୋରିଶ । ଅନ୍ୟପଟେ ଖୋଲିବାକୁ ଥିବା ଦୋକାନମାନଙ୍କ ପାଇଁ ଏକ ସ୍ବତନ୍ତ୍ର ନିୟମାବଳୀ ପ୍ରସ୍ତୁତ କରାଯାଇଛି । ଯେଉଁଥିରେ ସମସ୍ତ ନୂଆ ନିୟମ ଓ ଏହାକୁ ପାଳନ କରିବାର ବିଧି ଉଲ୍ଲେଖ ରହିଛି ।
ଏହି ସମସ୍ତ ନିୟମ ପାଳନ କରି ଦୋକାନରେ ସ୍ବଚ୍ଛତା ପାଳନ କରିବା ପାଇଁ କଡା ନିର୍ଦ୍ଦେଶ ଜାରି କରିଛନ୍ତି ବୋରିଶ । ତେବେ ଏହି ପଦକ୍ଷେପରେ ପ୍ରତିକ୍ରିୟା ପ୍ରକାଶ କରି ବ୍ୟବସାୟିକ ସଚିବ ଆଲୋକ ଶର୍ମା କହିଛନ୍ତି ଏହା ଏକ କଠୋର ପଦକ୍ଷେପ । ମହାମାରୀ ସମୟରେ ଏପରି କଡା ପଦକ୍ଷେପ ବିପଦପୂର୍ଣ୍ଣ ହେଲେ ବି ଏହାର ଆବଶ୍ୟକତା ରହିଛି । ଗତ ଦୁଇ ମାସ ହେବ ଦେଶରେ ଲକଡାଉନ ପାଇଁ ଅର୍ଥନୀତିରେ ହୋଇଥିବା କ୍ଷତିକୁ ରୋକିବାକୁ ହେଲେ ଏହି ପଦକ୍ଷେପର ଆବଶ୍ୟକତା ରହିଛି । ସେପଟେ ବେରୋଜଗାର ସମସ୍ୟାର ଏହା ସମାଧାନ କରିବ ବୋଲି ସେ ଆଶା ରଖିଛନ୍ତି ।
@IANS
