ଲଣ୍ଡନ: ୟୁକେରେ ବିଦେଶୀ ଅପରାଧିଙ୍କ ପାଇଁ ଘୋଷଣା ହୋଇଛି ନୂଆ ନିୟମ । ଏନେଇ ଗୃହ ସଚିବ ପ୍ରୀତି ପଟେଲ ସ୍ପଷ୍ଟ କରିଛନ୍ତି । ଏକ ବର୍ଷରୁ ଉର୍ଦ୍ଧ୍ବ ସମୟ ପାଇଁ ଜେଲ ଦଣ୍ଡାଦେଶ ହୋଇଥିବା ଅପରାଧିମାନଙ୍କୁ ୟୁକେରେ ପ୍ରବେଶ ଉପରେ କଟକଣା ଲଗାଯିବା ନେଇ ପ୍ରୀତି ସ୍ପଷ୍ଟ କରିଛନ୍ତି । ଇମିଗ୍ରେସନ ନେଇ ୟୁକେରେ କିଛି ନିୟମର ସଂଶୋଧନ କରାଯାଇଥିବା ବେଳେ ଏନେଇ ବିସ୍ତୃତ ଭାବେ ପ୍ରୀତି ଗଣମାଧ୍ୟମକୁ ସୂଚନା ଦେଇଛନ୍ତି ।
ଏହି ନୂଆ ଘୋଷଣା ଅନୁଯାୟୀ ଦେଶର ମନ୍ତ୍ରୀମାନଙ୍କୁ ବିଦେଶୀ ଅପରାଧୀଙ୍କୁ ବିଭିନ୍ନ କାର୍ଯ୍ୟକଳାପ ବାଦ ଦେବା ସହ ଦେଶରେ ପ୍ରବେଶ ପାଇଁ କଟକଣା ଲାଗୁ କରିପାରିବାର ଅଧିକାର ପ୍ରଦାନ କରାଯିବ । ସେପଟେ ଅଧିକାରୀମାନେ ଚାହିଁଲେ ଲଗାତାର ଅପରାଧିକ କାର୍ଯ୍ୟ ଯଥା ପକେଟମାର ଓ ଚୋରି ବା ଡକାୟତିରେ ଲିପ୍ତ ରହିଥିବା ଅପରାଧିଙ୍କୁ ଦେଲ ପଠାଇପାରିବାର କ୍ଷମତା ଦିଆଯିବ । ଏଥିପାଇଁ ସମ୍ପୃକ୍ତ ଅପରାଧିମାନେ ଏକ ବର୍ଷରୁ କମ ଜେଲ ଦଣ୍ଡାଦେଶ ପାଇଥିଲେ ସୁଦ୍ଧା ସେମାନଙ୍କୁ ପୁନର୍ବାର ଦଣ୍ଡାଦେଶ ଦିଆଯାଇପାରିବା ନେଇ ସ୍ପଷ୍ଟ ହୋଇଛି ।
ଏହି ନୂଆ ନିୟମ ଅନୁଯାୟୀ ଅନ୍ୟ ଦେଶର ଅପରାଧିମାନଙ୍କ ଭଳି ୟୁରୋପିଆନ ୟୁନିଅନ ଦେଶର ଅପରାଧିମାନଙ୍କୁ ମଧ୍ୟ ଦଣ୍ଡବିଧାନ କରାଯିବ । ବର୍ତ୍ତମାନ ପ୍ରଚଳିତ ନିୟମ ଅନୁଯାୟୀ ମାମଲାର ଗଭୀରତା ଅନୁଯାୟୀ ଅପରାଧୀଙ୍କୁ ଦଣ୍ଡବିଧାନ ହେଉଥିଲା । ହେଲେ ପରିବର୍ତ୍ତିତ ନୂଆ ନିୟମ ଅନୁଯାୟୀ ପ୍ରତ୍ୟେକ ଅପରାଧିଙ୍କୁ ଦଣ୍ଡବିଧାନ ବାଧ୍ୟତାମୂଳକ କରାଯିବ । ଏହି ନୂଆ ନିୟମ ଜାନୁଆରୀ 1, 2021ରୁ କାର୍ଯ୍ୟକାରୀ ହେବ । ଯାହା ଦ୍ବାରା ହୀନ ମନସ୍କ ଅପରାଧୀମାନଙ୍କୁ ଦେଶରେ ପ୍ରବେଶ ଉପରେ ଆସନ୍ତା ବର୍ଷଠାରୁ କଟକଣା ଲଗାଯିବ ।
ସେପଟେ ୟୁକେରେ ପ୍ରବେଶ ପାଇଁ ଭିସା ପାଇବାକୁ ହେଲେ ଜଣେ ବ୍ୟକ୍ତିଙ୍କୁ 70 ପଏଣ୍ଟ ହାସଲ କରିବାକୁ ହେବ । ଏନେଇ ବ୍ରିଟିଶ ନାଗରିକମାନେ ମଧ୍ୟ ସହମତି ପ୍ରକାଶ କରିଥିବା ପ୍ରୀତି ପ୍ରକାଶ କରିଛନ୍ତି ।
@IANS
