ଟୋକିଓ: ମଙ୍ଗଳବାରଠାରୁ ଟୋକିଓରେ ଆରମ୍ଭ ହୋଇଛି ନୂଆ ଜୀବନଯାତ୍ରା । ଦେଶରେ ସ୍ବାସ୍ଥ୍ୟଗତ ଚେତାବନୀ କୋହଳ ହେବା ପରେ ଜୀବନଯାତ୍ରା ସ୍ବାଭାବିକ ହୋଇଥିବା ଦେଖିବାକୁ ମିଳିଛି । ସହରରେ ଅନେକ ଦୋକାନ ବଜାର ଓ କାର୍ଯ୍ୟାଳୟ ମଧ୍ୟ ଖୋଲିଛି । ହେଲେ ଏହି ସବୁ ସ୍ଥାନମାନଙ୍କରେ ସାମାଜିକ ଦୂରତାକୁ ପ୍ରାଧାନ୍ୟ ଦିଆଯାଉଥିବା ଦେଖିବାକୁ ମିଳିଛି ।
ପ୍ରଧାନମନ୍ତ୍ରୀ ସିଞ୍ଜୋ ଆବେଙ୍କ ଘୋଷଣା ମୁତାବକ ଟୋକିଓ ସମେତ 4ଟି ପ୍ରାନ୍ତରେ ସ୍ବାସ୍ଥ୍ୟଗତ ଚେତାବନୀ କୋହଳ କରାଯିବା ସହ ଅନ୍ୟ ସାଧାରଣ ନିୟମ ବଳବତ୍ତର ରହିବ । ତେବେ ଏହି ପଦକ୍ଷେପ ସହ ସାରା ଦେଶ ଲକଡାଉନରୁ ମୁକ୍ତ ହୋଇଥିବା ସେ ପ୍ରକାଶ କରିଛନ୍ତି । ସେପଟେ ଦେଶରେ ଜାରି ହୋଇଥିବା ଆପାତକାଳୀନ ପରିସ୍ଥିତି ଯୋଗୁଁ ଲୋକେ ଘରୁ ବାହାରୁ ନଥିଲେ । କେବଳ ଅତ୍ୟାବଶ୍ୟକୀୟ ସ୍ଥଳରେ ଲୋକଙ୍କୁ ବାହାରକୁ ଯିବାର ଅନୁମତି ରହିଥିଲା ।
ହେଲେ ଦେଶରେ କଟକଣା କୋହଳ ହେବା ସହ ଲୋକଙ୍କ ପାଇଁ ନୂଆ ଜୀବନଯାତ୍ରାର ନିୟମ ପ୍ରସ୍ତୁତ କରାଯାଇଛି । ଲୋକେ ସାଧାରଣ ଜୀବନ ଯାପନ କରିବା ସହ ସତର୍କତାମୂଳକ ପଦକ୍ଷେପ କିପରି ଗ୍ରହଣ କରିପାରିବେ, ସେନେଇ ବ୍ୟବସ୍ଥା କରାଯାଇଛି । ଆଗାମୀ ଦିନରେ ଦେଶରେ କୋରୋନା ସ୍ଥିତି ଯେପରି ପୁଣି ନ ଉପୁଜେ ସେଥିପାଇଁ ଲୋକଙ୍କ ସତର୍କ ରହିବା ପାଇଁ ନିର୍ଦ୍ଦେଶ ରହିଛି । ଦେଶରେ ପର୍ଯ୍ୟାୟକ୍ରମେ ଦୋକାନ ବଜାର ଖୋଲିବାକୁ ଥିବା ବେଳେ ପ୍ରଥମ ପର୍ଯ୍ୟାୟରେ କାର୍ଯ୍ୟାଳୟ, ସପିଂ ସେଣ୍ଟର, ଛୋଟ ଦୋକାନ, ମ୍ୟୁଜିୟମ, ଲାଇବ୍ରେରୀ, ପାର୍କ, ବାର ଓ ରେସ୍ତୋରାଁ ଖୋଲିବାର ଯୋଜନା ରହିଛି ।
ବାର ଓ ରେସ୍ତୋରାଁ ବର୍ତ୍ତମାନ ଏକ ନିର୍ଦ୍ଦିଷ୍ଟ ସମୟ ପାଇଁ ଖୋଲିବାକୁ ଥିବା ବେଳେ ଆଗାମୀ ଦିନରେ ଏହାର ସମୟ ସୀମା ବୃଦ୍ଧି କରାଯିବାର ଯୋଜନା ରହିଛି । ଏଥିସହ ପ୍ରତ୍ୟେକ ସ୍ଥାନରେ ମାସ୍କର ବ୍ୟବହାର ପାଇଁ ଲୋକଙ୍କ ଚେତେଇବାକୁ ଯାଇ ବିଭିନ୍ନ ପୋଷ୍ଟର ଓ ଦୋକାନର ସାମ୍ନା ଭାଗରେ ସଚେତନତା ବାର୍ତ୍ତା ଦିଆଯିବାର ବ୍ୟବସ୍ଥା ହୋଇଛି । ପ୍ରାୟ 2 ମାସ ହେବ ଦେଶର ସ୍ଥିତି ସୁଧାରିବାରେ ନାଗରିକଙ୍କ ସହଯୋଗ ପାଇଁ ସେମାନଙ୍କ ଧନ୍ୟବାଦ ଜଣାଇଛନ୍ତି କ୍ୟାବିନେଟ ମୁଖ୍ୟ ସଚିବ ୟୋସିହିଦେ ସୁଗା ।
@IANS
