ଢାକା: ବାଂଲାଦେଶ ରୋହିଙ୍ଗ୍ୟା ମୁସଲିମ ସଂଖ୍ୟାଲଘୁଙ୍କ ଆଉ କୌଣସି ସଦସ୍ୟଙ୍କୁ ଗ୍ରହଣ କରିବ ନାହିଁ ବୋଲି ବୈଦେଶିକ ମନ୍ତ୍ରୀ ଏ.କେ ଅବଦୁଲ ମୋମେନ କହିଛନ୍ତି । ଦେଶରେ ପ୍ରବେଶ କରିବାକୁ ଚେଷ୍ଟା କରୁଥିବା ବେଳେ ଶହ ଶହ ଶରଣାର୍ଥୀ ସମୁଦ୍ରରେ ଫସି ରହିଛନ୍ତି। ମୋମେନ କହିଛନ୍ତି, ‘ଆମେ ସ୍ଥିର କରିଛୁ ଯେ ଆମେ କୌଣସି ନୂତନ ରୋହିଙ୍ଗ୍ୟାଙ୍କୁ ଅନୁମତି ଦେବୁ ନାହିଁ। ଏହା COVID-19 ପରିସ୍ଥିତି ନୁହେଁ ବରଂ ସାଧାରଣ ସମୟରେ ମଧ୍ୟ। ଆମେ ସଂରକ୍ଷିତ ରଖିବାକୁ ଚାହୁଁଥିବା ଅଞ୍ଚଳରେ କୌଣସି ଲୋକଙ୍କୁ ଗ୍ରହଣ କରିବାକୁ ଦେବୁ ନାହିଁ ’।
ବୁଧବାର ଜଣାପଡିଛି ଯେ, ମାଲେସିଆ କର୍ତ୍ତୃପକ୍ଷ ସେମାନଙ୍କୁ ଘଉଡାଇବା ପରେ ଆନୁମାନିକ 500 ରୋହିଙ୍ଗ୍ୟା ମହିଳା, ପୁରୁଷ ଏବଂ ଶିଶୁ ସମତେ ବଙ୍ଗୋପସାଗରରେ ଫସିରହିଛନ୍ତି । ମୋମେନ ସ୍ବୀକାର କରିଛନ୍ତି ଯେ, ସେମାନଙ୍କର ଦୁଇଟି ଡଙ୍ଗା ବିଷୟରେ ଅବଗତ ଥିଲେ କିନ୍ତୁ ସରକାରଙ୍କର ପ୍ରାଥମିକତା ହେଉଛି ଶରଣାର୍ଥୀ କ୍ୟାମ୍ପ ଅଞ୍ଚଳର ସୁରକ୍ଷା, ଯେଉଁଠାରେ ବର୍ତ୍ତମାନ ହଜାର ହଜାର ରୋହିଙ୍ଗ୍ୟା ବାସ କରୁଛନ୍ତି । ସେ କହିଛନ୍ତି, ‘ଏହା ଏକ ଜନଗହଳିପୂର୍ଣ୍ଣ ସ୍ଥାନ। ଯଦି ଜଣେ ସଂକ୍ରମିତ ବ୍ୟକ୍ତି କୌଣସି ପ୍ରକାରେ ଆସନ୍ତି ତେବେ ସେ ସବୁକିଛି ନଷ୍ଟ କରିଦେବେ’।
ଏପ୍ରିଲ 16 ରେ ବାଂଲାଦେଶ ଅଧିକାରୀମାନେ ସମୁଦ୍ରରେ 58 ଦିନ ରହିବା ପରେ ଦକ୍ଷିଣ ଉପକୂଳରୁ ଏକ ଡଙ୍ଗାରେ ଦେଶରେ ପ୍ରବେଶ କରିବାକୁ ଚେଷ୍ଟା କରୁଥିବା 396 ରୋହିଙ୍ଗ୍ୟାଙ୍କୁ ଉଦ୍ଧାର କରିଥିଲେ।
ସେମାନଙ୍କ ମଧ୍ୟରୁ ଅଧିକାଂଶ ମାଲେସିଆ ପାଇଁ ବାଂଲାଦେଶର ଶରଣାର୍ଥୀ ଶିବିର ଛାଡିଥିଲେ ମଧ୍ୟ ସେମାନେ ଦେଶ କିମ୍ବା ଅନ୍ୟ କୌଣସି ସ୍ଥାନକୁ ପ୍ରବେଶ କରିପାରିନଥିଲେ ଏବଂ ଫେରିବାକୁ ନିଷ୍ପତ୍ତି ନେଇଥିଲେ ବୋଲି ବାଂଲାଦେଶ ତଟରକ୍ଷୀ ମୁଖପାତ୍ର କହିଛନ୍ତି। ତଟରକ୍ଷୀ ବାହିନୀର ଅଧିକାରୀ କହିଛନ୍ତି ଯେ, ଖାଦ୍ୟ କିମ୍ବା ଜଳ ନ ଥିବାରୁ ଅତି କମରେ 28 ଜଣଙ୍କର ମୃତ୍ୟୁ ଘଟିଥିଲା ଏବଂ ମୃତଦେହ ସମୁଦ୍ରକୁ ଫିଙ୍ଗି ଦିଆଯାଇଥିଲା।
