ହାଇଦ୍ରାବାଦ: ବଲିଉଡ୍ ସୁପରଷ୍ଟାର ଶାହାରୁଖ ଖାନ ତାଙ୍କ ଆଗାମୀ ଚଳଚ୍ଚିତ୍ର ଯବାନକୁ ନେଇ ଲାଇମଲାଇଟରେ ରହିଛନ୍ତି । ଫିଲ୍ମ ପଠାନ ସହ ଏହି ବର୍ଷର ଦମଦାର ଶୁଭାରମ୍ଭ କରିଥିବା ବେଳେ ବର୍ତ୍ତମାନ ଯବାନ ସହ ପୁଣି ଧମାକା କରିବାକୁ ପ୍ରସ୍ତୁତ ଅଛନ୍ତି ଶାହାରୁଖ । ଫିଲ୍ମ ରିଲିଜକୁ ମାତ୍ର ଏକ ମାସ ରହିଛି । ଏହାରି ମଧ୍ୟରେ ନିର୍ମାତାମାନେ ଫିଲ୍ମକୁ ନେଇ ଅପଡେଟ ସେୟାର କରିଥାଆନ୍ତି । ତେବେ ବର୍ତ୍ତମାନ ଫିଲ୍ମର ନୂଆ ଗୀତ 'ଚଲେୟା' ଗୀତ ଟିଜର ରିଲିଜ ହୋଇଛି । ଯେଉଁଥିରେ ନୟନତାରାଙ୍କ ସହ ଶାହାରୁଖ ରୋମାନ୍ସ କରୁଥିବା ଦେଖିବାକୁ ମିଳିଛି ।
ଏହା ମଧ୍ୟ ପଢନ୍ତୁ: ଯବାନର 'ଜିନ୍ଦା ବନ୍ଦା' ଗୀତ ଏଭଳି ହୋଇଥିଲା ସୁଟ୍, ନିର୍ମାତା ଭିଡିଓ ସେୟାର କରି ଦେଖାଇଲେ ଝଲକ
ଅଟ୍ଲିଙ୍କ ନିର୍ଦ୍ଦେଶିତ ଆଗାମୀ ଆକ୍ସନ୍ ପ୍ୟାକ୍ ଫିଲ୍ମ 'ଯବାନ'ର ପ୍ରଥମ ଗୀତ 'ଜିନ୍ଦା ବନ୍ଦା' ରିଲିଜ୍ ହେବା ପରେ ନିର୍ମାତାମାନେ ଦ୍ୱିତୀୟ ଗୀତ 'ଚଲେୟା' ରିଲିଜ କରିବାକୁ ଘୋଷଣା କରିଛନ୍ତି । ଏହି ଗୀତ 14 ଅଗଷ୍ଟରେ ମୁକ୍ତିଲାଭ କରିବ । ଏହା ପୂର୍ବରୁ ପ୍ରଶଂସକମାନଙ୍କୁ ଗୀତର ଝଲକ ଦେଖାଇଛନ୍ତି ନିର୍ମାତା । କିଙ୍ଗ୍ ଖାନ୍ ସୋସିଆଲ ମିଡିଆରେ ଚଲେୟା ଟିଜର ଛାଡିବା ସହ ହିନ୍ଦୀ, ତେଲୁଗୁ ଏବଂ ତାମିଲରେ ସୋମବାର ଏହି ଗୀତଟି ରିଲିଜ ହେବ ବୋଲି ଘୋଷଣା କରିଛନ୍ତି । ଏହି ଟିଜରରେ ନୟନତାରା ଶାହାରୁଖଙ୍କ ଜବରଦସ୍ତ ରୋମାନ୍ସ ଦେଖିବାକୁ ମିଳିଛି ।
ଏହି ଗୀତକୁ ଅନିରୁଦ୍ଧ ରବିଚନ୍ଦ୍ର ରଚନା କରିଥିବାବେଳେ ଅରିଜିତ ସିଂଙ୍କ ସହ ଶିଳ୍ପା ରାଓ ଏହି ଗୀତରେ ସ୍ୱର ଦେଇଛନ୍ତି । ଏବଂ ଗୀତର କୋରିଓଗ୍ରାଫି ଫରାହ ଖାନଙ୍କ ଦ୍ୱାରା କରାଯାଇଛି । ଗୀତର ଟିଜର ରିଲିଜ୍ ହେବା ମାତ୍ରେ ପ୍ରଶଂସକ ଏହାକୁ ଲାଇକ କରିବା ସହ ପ୍ରତିକ୍ରିୟା ଦେଇଛନ୍ତି । ଜଣେ ପ୍ରଶଂସକ ଲେଖିଛନ୍ତି, 'କିଙ୍ଗ୍ ଅଫ୍ ରୋମାନ୍ସ ଫେରି ଆସିଛି ।' ଜଣେ ପ୍ରଶଂସକ ଲେଖିଛନ୍ତି, 'ମୁଁ ଅପେକ୍ଷା କରିଛି ।' ଅନ୍ୟ ଜଣେ ପ୍ରଶଂସକ ଲେଖିଛନ୍ତି, 'ମୁଁ ଅପେକ୍ଷା କରିପାରିବି ନାହିଁ ।' ଗୀତର ଟିଜର ପ୍ରଶଂସକଙ୍କ ଉତ୍ସାହ ସ୍ତରକୁ ବଢ଼ାଇ ଦେଇଛି । ଏହି ଗୀତକୁ ନେଇ ପ୍ରଶଂସକମାନେ ବହୁତ ଉତ୍ସାହିତ ଅଛନ୍ତି ।
ଯବାନ ଶାହାରୁଖଙ୍କ ପ୍ରଡକ୍ସନ୍ କମ୍ପାନୀ ରେଡ୍ ଚିଲିସ୍ ଏଣ୍ଟରଟେନ୍ମେଣ୍ଟ୍ ଦ୍ୱାରା ନିର୍ମିତ ହୋଇଥିବା ବେଳେ ନିର୍ଦ୍ଦେଶକ ଅଟଲି ଅହି ଫିଲ୍ମର ନିର୍ଦ୍ଦେଶନା ଦେଇଛନ୍ତି । ଫିଲ୍ମରେ ସାଉଥ ଅଭିନେତ୍ରୀ ନୟନତାରା, ବିଜୟ ସେତୁପତି, ଦୀପିକା ପାଦୁକୋନ ନଜର ଆସିବେ । ନୟନତାରା ଏବଂ ବିଜୟ ସେତୁପତିଙ୍କ ସହ ପ୍ରଥମ ଥର ପାଇଁ ସ୍କ୍ରିନ୍ ସେୟାର କରିବାକୁ ଯାଉଛନ୍ତି ଶାହାରୁଖ । ଦୀପିକା ଏହି ଫିଲ୍ମର କ୍ୟାମିଓ ରୋଲରେ ନଜର ଆସିବେ । 'ଯବାନ' ଫିଲ୍ମ ହିନ୍ଦୀ, ତାମିଲ ଏବଂ ତେଲୁଗୁ ଭାଷାରେ ନିର୍ମିତ ହେଉଥିବା ବେଳେ ଚଳିତ ବର୍ଷ ସେପ୍ଟେମ୍ବର 7ରେ ରିଲିଜ ହେବ । ନିର୍ଦ୍ଦେଶକ ଅଟ୍ଲିଙ୍କ ସହ ଶାହାରୁଖ ଖାନ୍ ପ୍ରଥମ ଥର ପାଇଁ କାମ କରୁଛନ୍ତି ।
