ମୁମ୍ବାଇ: ବଲିଉଡର ଚକୋଲେଟ୍ ହିରୋ ସାହିଦ କପୁର ଗତ ଦୁଇ ଦଶନ୍ଧିରୁ ବଲିଉଡରେ ରାଜ୍ କରି ଚାଲିଛନ୍ତି । ତାହା ତାଙ୍କ ଆକ୍ଟିଂ ହେଉ କି ଡ୍ୟାନ୍ସ କିମ୍ବା ଆକ୍ସନ ଏହା ସମସ୍ତଙ୍କୁ ଘାଇଲା କରେ । ଫିିଲ୍ମ ଏବଂ ଅସଲ ଜୀବନରେ ବିନ୍ଦାସ ରହୁଥିବା ସାହିଦ ପୁଣି ଏକ ସଫଳତା ହାସଲ କରିଛନ୍ତି । ଚଳିତ ବର୍ଷ ସାହିଦ ନିର୍ଦ୍ଦେଶକ ରାଜ ଆଣ୍ଡ ଡି.କେ.ର ୱେବ୍ ସିରିଜ୍ 'ଫର୍ଜି' ସହିତ ଓଟିଟି ଡେବ୍ୟୁ କରିଥିଲେ । ଏହା ସହିତ ଜୁନ୍ରେ ତାଙ୍କ ଅଭିନୀତ ଫିଲ୍ମ 'ବ୍ଲଡି ଡାଡି' ମଧ୍ୟ ଓଟିଟିରେ ମୁକ୍ତିଲାଭ କରିଥିଲା । ଏହି ଡେବ୍ୟୁ ଚଳଚ୍ଚିତ୍ର ଏବଂ ସିରିଜ୍ରୁ ହିଁ ଅଭିନେତା ଓଟିଟିରେ ଧମାଲ ମଚାଇଛନ୍ତି । ତାଙ୍କର ୱେବ୍ ସିରିଜ୍ 'ଫର୍ଜି' ଏବଂ ଚଳଚ୍ଚିତ୍ର 'ବ୍ଲଡି ଡାଡି' ଓଟିଟିରେ ସର୍ବାଧିକ ଦେଖାଯାଇଥିବା ସିରିଜ୍ ଏବଂ ଚଳଚ୍ଚିତ୍ର ହୋଇପାରିଛି । ନିକଟରେ ଏକ ସାକ୍ଷାତକାରରେ ସାହିଦ କପୁର ଓଟିଟିରେ ତାଙ୍କର ସଫଳତା ବିଷୟରେ ଖୋଲାଖୋଲି ଭାବେ କହିଛନ୍ତି ।
ଖବର କାଗଜକୁ ଦିଆଯାଇଥିବା ଏକ ସାକ୍ଷାତକାରରେ ଅଭିନେତା କହିଛନ୍ତି, “ଜଣେ ଅଭିନେତା ଭାବରେ ଆପଣ ଏହା କହିପାରିବେ ନାହିଁ ଯେ ଆପଣ ଜଣେ ଷ୍ଟାର ଅଟନ୍ତି, ଆଉ ଦର୍ଶକମାନେ ଆପଣଙ୍କ ପ୍ରତ୍ୟେକ ପ୍ଲାଟଫର୍ମକୁ ପସନ୍ଦ କରିବେ । ଏହି ପ୍ଲାଟଫର୍ମ ଏହିପରି କାମ କରେ ନାହିଁ । ଦର୍ଶକ ବହୁତ ବୁଦ୍ଧିମାନ ଏବଂ ସେମାନେ ଚଳଚ୍ଚିତ୍ର ଏବଂ ଧାରାବାହିକର ବିଷୟବସ୍ତୁ ବିଷୟରେ ମଧ୍ୟ ବହୁତ ସ୍ପଷ୍ଟ ଅଟନ୍ତି । ଓଟିଟିରେ ଦର୍ଶକମାନେ ମୋ ଉପରେ କିପରି ପ୍ରତିକ୍ରିୟା କରିଛନ୍ତି ତାହା ଦେଖି ମୁଁ ବହୁତ ଉତ୍ସାହିତ ଅଛି ।
ଏହା ମଧ୍ୟ ପଢନ୍ତୁ: ପୁଅର ନାମ ଖୁଲାସା କଲେ ଇଶିତା ଦତ୍ତା ଓ ଭାଟସାଲ ସେଠ୍, ସୋନମ କପୁରଙ୍କ ସହ ରହିଛି କନେକ୍ସନ
'ସମସ୍ତଙ୍କ କ୍ୟାରିଅରରେ...'
ସାହିଦ କପୁର ଆହୁରି ମଧ୍ୟ କହିଛନ୍ତି, "ପ୍ରତ୍ୟେକ ଅଭିନେତାଙ୍କ ଜୀବନରେ ଉତ୍ଥାନ-ପତନ ଘଟିଥାଏ । ବଡ ତାରକାମାନଙ୍କ କ୍ୟାରିଅରରେ ମଧ୍ୟ ଏକ ପର୍ଯ୍ୟାୟ ଆସେ ଯେତେବେଳେ ସେମାନଙ୍କ ପାଖରେ କୌଣସି ଚଳଚ୍ଚିତ୍ର ନଥାଏ । ଏଠାରେ ଏକ ପ୍ରତିଛବି ସୃଷ୍ଟି କରିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ଆପଣଙ୍କୁ ଚିନ୍ତା କରିବାକୁ ପଡିବ କି ଆପଣ ଏଠାରେ 10 ବର୍ଷ ପାଇଁ ଅଛନ୍ତି ନା 20-30 ବର୍ଷ ପାଇଁ ଅଛନ୍ତି ? ଜଣେ ଅଗ୍ରଣୀ ଅଭିନେତା ଭାବରେ, ଆପଣ ଏଠାରେ କେତେ ଦିନ ଅଛନ୍ତି ତାହା ସ୍ଥିର କରିବାକୁ ପଡିବ ଏବଂ ଯଦି ଆପଣ ଦୀର୍ଘ ସମୟ ଧରି ଏଠାରେ ଅଛନ୍ତି, ତେବେ ଗୋଟିଏ କିମ୍ବା ଦୁଇଟି ଫ୍ଲପ୍ ହେଲେ ଆପଣଙ୍କୁ ବେଶୀ କିଛି ଫରକ ପଡିବା ଉଚିତ ନୁହେଁ ।
କ୍ରିତି ସହ ରୋମାନ୍ସ କରିବେ ସାହିଦ କପୁର
ସାହିଦ କପୁର ଖୁବ୍ ଶୀଘ୍ର କ୍ରିତି ସାନନଙ୍କ ସହ ସ୍କ୍ରିନ୍ ସେୟାର କରୁଥିବା ଦେଖିବାକୁ ମିଳିବ । ଏହି ଆଖ୍ୟାବିହୀନ ଚଳଚ୍ଚିତ୍ରରେ ଏହି ଯୋଡିଙ୍କୁ ପ୍ରଥମ ଥର ପରଦାରେ ଏକାଠି ଦେଖାଯିବ । ଗଣମାଧ୍ୟମର ରିପୋର୍ଟ ଅନୁଯାୟୀ, ଏହି ଚଳଚ୍ଚିତ୍ର ସାଇନ୍ସ ଏବଂ ଫିକ୍ସନ ଉପରେ ଆଧାରିତ ହେବାକୁ ଯାଉଛି ।
