ମୁମ୍ବାଇ: 'ପଠାନ' ପରେ ଫିଲ୍ମ 'ଜବାନ' ସହ ପୁଣି ବକ୍ସ ଅଫିସରେ ଧମାକା କରିବାକୁ ପ୍ରସ୍ତୁତ ଅଛନ୍ତି କିଙ୍ଗ୍ ଖାନ ଶାହାରୁଖ ଖାନ । ଫିଲ୍ମର ପ୍ରିଭ୍ୟୁ ଦେଖିବା ଦିନ ଠାରୁ ଫ୍ୟାନ୍ସଙ୍କ ମଧ୍ୟରେ ଫିଲ୍ମକୁ ନେଇ ଭିନ୍ନ କ୍ରେଜ ଦେଖିବାକୁ ମିଳିଛି । ଏହି ଫିଲ୍ମ 7 ସେପ୍ଟେମ୍ବରରେ ପ୍ରେକ୍ଷାଳୟରେ ମୁକ୍ତିଲାଭ କରିବ । ଫିଲ୍ମ ରିଲିଜକୁ ଆଉ ମାତ୍ର କିଛି ଦିନ ରହିଥିବା ବେଳେ ଫିଲ୍ମ ପାଇଁ ଆଡଭାନ୍ସ ବୁକିଂ ଆରମ୍ଭ ହୋଇଛି । ଆମେରିକାରେ ଆଡଭାନ୍ସ ବୁକିଂରେ ଫିଲ୍ମ ରେକର୍ଡ ସୃଷ୍ଟି କରିଥିବା ବେଳେ ବର୍ତ୍ତମାନ ଭାରତରେ ମଧ୍ୟ ଫିଲ୍ମ ସଫଳତା ହାସଲ କରିଛି । କିଛି ମିନିଟ୍ ମଧ୍ୟରେ ଫିଲ୍ମର ସମସ୍ତ ଟିକେଟ ବିକ୍ରି ହୋଇଛି ।
'ଜୱାନ୍' ପାଇଁ ଆଡଭାନ୍ସ ବୁକିଂ ଆମେରିକା, ସଂଯୁକ୍ତ ଆରବ ଅମିରାତ୍ (ୟୁଏଇ), ଅଷ୍ଟ୍ରେଲିଆ, ସାଉଦି ଆରବ ଏବଂ ଜର୍ମାନୀ ଇତ୍ୟାଦି ଅନ୍ତର୍ଜାତୀୟ କେନ୍ଦ୍ରରେ ଖୋଲି ସାରିଛି । ଭାରତରେ ମୁମ୍ବାଇର କେବଳ ଅଳ୍ପ କିଛି କେନ୍ଦ୍ରରେ ଅଗ୍ରୀମ ବୁକିଂ ଖୋଲିଛନ୍ତି । ସବୁଠି ଜବରଦସ୍ତ ଟିକେଟ ବିକ୍ରି ହୋଇଥିବା ବେଳେ ଭାରତରେ ମଧ୍ୟ ସମାନ ସ୍ଥିତି ରହିଛି । ଥାନେରେ ଦର୍ଶକମାନେ 1100 ଟଙ୍କା ମୂଲ୍ୟର ଟିକେଟ କିଣିଛନ୍ତି । 'ଜବାନ'ର ଟିକେଟ 15 ମିନିଟ ମଧ୍ୟରେ ଆଗୁଆ ବୁକିଂରେ ଟିକେଟ ବିକ୍ରି ହୋଇଯାଇଛି । ବିଦେଶରେ ପ୍ରାୟ 1.57କୋଟି ଟିକେଟ ବିକ୍ରି ହୋଇସାରିଲାଣି ।
ହିନ୍ଦୀ, ତାମିଲ ଏବଂ ତେଲୁଗୁ ଭାଷାରେ ତିନୋଟି ଭାଷାରେ 'ଜୱାନ୍' ସେପ୍ଟେମ୍ବର7ରେ ସାରା ବିଶ୍ୱ ସିନେମା ହଲ୍ରେ ମୁକ୍ତିଲାଭ କରିବ । ଏଥିରେ କିଙ୍ଗ୍ ଖାନଙ୍କ ବ୍ୟତୀତ ଟଲିଉଡ ତାରକା ବିଜୟ ସେଥୁପଥୀ, ଅଭିନେତ୍ରୀ ନୟନତାରା, ସାନିଆ ମଲହୋତ୍ରା ଏବଂ ପ୍ରିୟମଣି ଅଛନ୍ତି । ଏହି ଚଳଚ୍ଚିତ୍ରରେ ଦୀପିକା ପାଦୁକୋନଙ୍କୁ ଏକ କ୍ୟାମିଓ ରୋଲରେ ଦେଖିବାକୁ ମିଳିବ । ଏଥିରେ ସୁପରଷ୍ଟାର ଶାହାରୁଖଙ୍କୁ ଏକ ଡବଲ୍ ରୋଲରେ ଦେଖିବାକୁ ମିଳିବ । ଗୋଟିଏ ଭୂମିକାରେ ତାଙ୍କୁ ଜଣେ ବୁଦ୍ଧିମାନ ଅଧିକାରୀ ଏବଂ ଅନ୍ୟଟିରେ ଭିଲେନ୍ ଭୂମିକାରେ ଦେଖିବାକୁ ମିଳିବ ।
ଏହା ମଧ୍ୟ ପଢନ୍ତୁ: ରେକର୍ଡ ଭାଙ୍ଗିବେ ଶାହାରୁଖ, ଦୁନିଆର ସବୁଠୁ ବଡ ଥିଏଟରରେ ରିଲିଜ ହେବ ଫିଲ୍ମ ଜବାନ
ଫିଲ୍ମର ସୁଟିଂ ବିଷୟରେ କହିବାକୁ ଗଲେ ମୁମ୍ବାଇ, ପୁନେ, ହାଇଦ୍ରାବାଦ, ଚେନ୍ନାଇ, ରାଜସ୍ଥାନ ଏବଂ ଔରଙ୍ଗାବାଦରେ ଏହାର ସୁଟିଂ କରାଯାଇଛି । ଏହି ଫିଲ୍ମ ଅଟଲିଙ୍କ ଦ୍ୱାରା ନିର୍ଦ୍ଦେଶିତ, ଗୌରୀ ଖାନ ଏବଂ ଗୌରବ ବର୍ମାଙ୍କ ଦ୍ବାରା ସହ ପ୍ରଯୋଜିତ । ଅଟଲି, ବିଜୟ ସେଥୁପଥୀ ଏବଂ ନୟନତାରାଙ୍କ ସହ ପ୍ରଥମ ଥର ପାଇଁ ଏକାଠି କାମ କରିଛନ୍ତି ଶାହାରୁଖ ।
