ମୁମ୍ବାଇ: ବଲିଉଡର ପ୍ରସିଦ୍ଧ ଚଳଚ୍ଚିତ୍ର ନିର୍ମାତା କରନ ଜୋହର ଦୀର୍ଘ ସମୟ ପରେ ଦର୍ଶକଙ୍କୁ ଏକ ରୋମାଣ୍ଟିକ ଫିଲ୍ମ ଭେଟି ଦେବାକୁ ଯାଉଛନ୍ତି । କରଣ ଜୋହରଙ୍କ ନିର୍ଦ୍ଦେଶିତ ଫିଲ୍ମ ରକି ଔର ରାନୀ କି ପ୍ରେମ କାହାନୀ ଖୁବ ଶୀଘ୍ର ରିଲିଜ ହେବାକୁ ଯାଉଛି । ଏଥର କରନ ତାଙ୍କ ରୋମାଣ୍ଟିକ ଚଳଚ୍ଚିତ୍ରରେ ଗୁଲି ବୟ ରଣଭୀର ସିଂ ଏବଂ ଆଲିଆ ଭଟ୍ଟଙ୍କ ହିଟ୍ ଯୋଡିକୁ କାଷ୍ଟ କରିଛନ୍ତି । ନିକଟରେ ଅର୍ଥାତ ଜୁନ 20 ତାରିଖରେ ଫିଲ୍ମର ଟିଜର ରିଲିଜ ହୋଇଛି । ପୋଷ୍ଟର ରିଲିଜ ହେବା ପରେ ଚର୍ଚ୍ଚାରେ ରହିଛି ରକି ଔର ରାନୀ କି ପ୍ରେମ କାହାନୀ । ଏହାରି ଭିତରେ ଏହି ଚଳଚ୍ଚିତ୍ରରେ ରଣଭୀର ସିଂଙ୍କ ପରିବାରରେ ଏକ ବଡ଼ ଭୂମିକା ଗ୍ରହଣ କରୁଥିବା ଭେଟେରାନ୍ ଅଭିନେତା ଧର୍ମେନ୍ଦ୍ର ସୋସିଆଲ ମିଡିଆରେ ଏହି ଚଳଚ୍ଚିତ୍ର ସହ ଜଡିତ ଏକ ସ୍ମୃତି ସେୟାର କରିଛନ୍ତି ।
ଭେଟେରାନ ଅଭିନେତା ଧର୍ମେନ୍ଦ୍ର ଫିଲ୍ମର ମୁଖ୍ୟ ଅଭିନେତ୍ରୀ ତଥା ଚୁଲବୁଲି ନାୟିକା ଆଲିଆ ଭଟ୍ଟଙ୍କ ସହ ଏକ ସୁନ୍ଦର ଫଟୋ ସେୟାର କରିଛନ୍ତି । ବର୍ତ୍ତମାନ ଏହି ଫଟୋ ସୋସିଆଲ ମିଡିଆରେ ବେସ ଭାଇରାଲ ହେଉଥିବା ବେଳେ ପ୍ରଶଂସକମାନେ ମଧ୍ୟ ଏହାକୁ ଅଧିକ ପସନ୍ଦ କରିଛନ୍ତି । ଲାଇକ ଏବଂ କମେଣ୍ଟ ବଢିବାରେ ଲାଗିଛି । ଏହାରି ଭିତରେ ଧର୍ମେନ୍ଦ୍ରଙ୍କ ବଡ ପୁଅ ସନ୍ନି ଦେଓଲ ମଧ୍ୟ ପିତା ଏବଂ ଆଲିଆଙ୍କ ଛବି ଉପରେ ନିଜର ପ୍ରତିକ୍ରିୟା ଦେଇଛନ୍ତି ।
ସୋସିଆଲ ମିଡିଆରେ ଆଲିଆଙ୍କ ସହ ଫଟୋ ସେୟାର କରି ଧର୍ମେନ୍ଦ୍ର ଲେଖିଛନ୍ତି, "ବନ୍ଧୁଗଣ, ପ୍ରିୟ ଆଲିଆ ମୋତେ ମୋର ଅତୀତର ରୋମାନ୍ସ ସମୟର କିଛି ଝଲକ ଦେଖାଉଛନ୍ତି..ରକି ଔର ରାନୀ କି ପ୍ରେମ କାହାନୀ ।" ହାର୍ଟ ଇମୋଜି ମଧ୍ୟ ଦେଇଛନ୍ତି । ବର୍ତ୍ତମାନ ଧର୍ମେନ୍ଦ୍ର ଏବଂ ଆଲିଆଙ୍କ ପ୍ରଶଂସକମାନେ ଏହି ଫଟୋକୁ ବହୁତ ଲାଇକ କରୁଛନ୍ତି । ପ୍ରଶଂସକମାନେ ଏହି ଫଟୋକୁ ବହୁତ ସୁନ୍ଦର ବୋଲି କହିବା ସହ ରକି ଔର ରାନୀ କି ପ୍ରେମ କାହାନୀ ଫିଲ୍ମକୁ ରିଲିଜ ହେବା ଯାଏଁ ଆଉ ଅପେକ୍ଷା କରିହେବ ନାହିଁ ବୋଲି କହିଛନ୍ତି । ସନ୍ନି ଦେଓଲ ଏହି ପୋଷ୍ଟର କମେଣ୍ଟ ବକ୍ସରେ ରେଡ ହାର୍ଟ ଇମୋଜି ଦେଇଛନ୍ତି ।
ଏହା ମଧ୍ୟ ପଢନ୍ତୁ: Rocky Aur Rani Ki Prem Kahani: ଟିଜର ଆଉଟ୍, ପୁଣି ସ୍କ୍ରିନ୍ରେ ଜଲୱା ଦେଖାଇବେ ଆଲିଆ ରଣଭୀର
କେବେ ରିଲିଜ ହେବ ରକି ଔର ରାନୀ କି ପ୍ରେମ କାହାନୀ: ଜଟ ପଞ୍ଜାବୀ ଏବଂ ବଙ୍ଗାଳୀ ପରିବାର ଉପରେ ଆଧାରିତ ଏହି ଚଳଚ୍ଚିତ୍ରରେ ରଣବୀର ସିଂ ଜଟ ପଞ୍ଜାବୀ ପରିବାର ଏବଂ ଆଲିଆଙ୍କ ଚରିତ୍ର ଜଣେ ବଙ୍ଗାଳୀ ପରିବାରର ରହିଛି । ଉଭୟ ପରିବାରର ଭିନ୍ନ ରୀତିନୀତି ହେତୁ ସେମାନଙ୍କର ପ୍ରେମ କାହାଣୀ ଏତେ ସହଜ ହେବ ନାହିଁ ବୋଲି ଜଣାପଡିଛି । ଏହାସହ ଏହି ଫିଲ୍ମରେ ଧର୍ମେନ୍ଦ୍ର, ଜୟା ବଚ୍ଚନ ଏବଂ ଶବାନା ଆଜମିଙ୍କ ପରି ଭେଟେରାନ ତାରକାମାନେ ମଧ୍ୟ ଏହି ଫିଲ୍ମରେ ନଜର ଆସିବେ । ଜୁଲାଇ 28 ତାରିଖରେ ପରଦାକୁ ଆସିବ ବହୁ ପ୍ରତିକ୍ଷିତ ଫିଲ୍ମ ରକି ଔର ରାନୀ କି ପ୍ରେମ କାହାନୀ ।
କହିରଖୁଛୁ କି, ନିକଟରେ 1 ମିନିଟ 19 ସେକେଣ୍ଡର ଟିଜର ଆଉଟ ହୋଇଥିଲା । ଟିଜର ରିଲିଜ ହେବାର ମାତ୍ର 1ଘଣ୍ଟା ମଧ୍ୟରେ 2 ଲକ୍ଷରୁ ଅଧିକ ଭ୍ୟୁଜ ହୋଇଯାଇଥିଲା । ଏହା ପୂର୍ବରୁ ଜୁନ୍ 20ରେ ଫିଲ୍ମର ପ୍ରଥମ ଟିଜର ରିଲିଜ ହୋଇଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
