ହାଇଦ୍ରାବାଦ: ଆଜି ଦ୍ବିତୀୟ ବିବାହ କରୁଛନ୍ତି ଅରବାଜ ଖାନ । ଭାଇଜାନଙ୍କ ଭାଇଙ୍କୁ ନେଇ ଆସିଛି ଏଭଳି କିଛି ଖବର । ଭଉଣୀ ଅର୍ପିତା ଖାନଙ୍କ ମୁମ୍ବାଇ ସ୍ଥିତ ବାସଭବନରେ ସ୍ପଟ୍ ହୋଇଛନ୍ତି ଅରବାଜ । ସେଠାରେ ତାଙ୍କର ବିବାହ କାର୍ଯ୍ୟକ୍ରମ ପାଇଁ ସମସ୍ତ ଆୟୋଜନ ହୋଇଥିବା କୁହାଯାଉଛି । ହେଲେ ସେଠାରେ ଅରବାଜଙ୍କୁ ସାଧାରଣ ଲୁକ୍ରେ ଦେଖିବାକୁ ମିଳିଥିଲା । ଏହାସହ ଅର୍ବାଜ ଏବଂ ମଲାଇକାଙ୍କ ପୁଅ ଅରହାନ ମଧ୍ୟ ଅର୍ପିତାଙ୍କ ଘରେ ପହଞ୍ଚିଥିଲେ । ସେପଟେ ବିବାହ କାର୍ଯ୍ୟକ୍ରମରେ ଯୋଗ ଦେବାକୁ ସଲମାନ ଖାନ ମଧ୍ୟ ଅର୍ପିତାଙ୍କ ବାସଭବନରେ ଉପସ୍ଥିତ ରହିଥିବା ରିପୋର୍ଟ ଆସିଛି ।
ଜର୍ଜିଆ ଆଣ୍ଡ୍ରିୟାନୀଙ୍କ ସହ ବ୍ରେକ୍ଅପ୍ ପରେ ମେକଅପ୍ ଆର୍ଟିଷ୍ଟ ଶୌରା ଖାନଙ୍କୁ ଡେଟ୍ କରୁଥିଲେ ଅରବାଜ । ଉଭୟଙ୍କ ରିଲେସନସିପକୁ ନେଇ ସେତେଟା ଚର୍ଚ୍ଚା ନଥିଲେ ବି ଆଜି ବିବାହ ବନ୍ଧନରେ ବାନ୍ଧି ହୋଇଛନ୍ତି ଏହି ପ୍ରେମୀ ଯୁଗଳ । ଏହି ବିବାହ କେବଳ ଅରବାଜ ଓ ଶୌରାଙ୍କ ପରିବାର ସଦସ୍ୟଙ୍କ ସମେତ ଅନ୍ୟ କିଛି ନିକଟତର ବ୍ୟକ୍ତି ଓ ସମ୍ପର୍କୀୟଙ୍କ ଗହଣରେ ହୋଇଥିବା ଜଣାପଡିଛି । ୫୬ ବର୍ଷ ବୟସରେ ଅରବାଜ ପୁଣି ଥରେ ବିବାହ କରିଛନ୍ତି । ଏହି ଖୁସି ଖବର ଶୁଣିବା ପରେ ଫ୍ୟାନ୍ସମାନେ ମଧ୍ୟ ଉତ୍ସାହିତ ରହିଛନ୍ତି । ହେଲେ ପ୍ରଶଂସକମାନେ ଯେତିକି ଉତ୍ସାହିତ ହୋଇଛନ୍ତି ସେତିକି ଆଶ୍ଚର୍ଯ୍ୟ ମଧ୍ୟ ହୋଇଛନ୍ତି । ଏତେ ତରବରିଆ ଭାବେ ସେ କାହିଁକି ବିବାହ ନିଷ୍ପତ୍ତି ନେଲେ ତାକୁ ନେଇ ମଧ୍ୟ ପ୍ରଶ୍ନ ଉଠାଇଛନ୍ତି ନେଟିଜେନ୍ସ ।
ଏହା ମଧ୍ୟ ପଢନ୍ତୁ...ୱେଡିଂ ରିସ୍ପେସନରେ ଝୁମିଲେ ରଣଦୀପ-ଲିନ, ଭିଡିଓ ଭାଇରାଲ
ଏହା ମଧ୍ୟ ପଢନ୍ତୁ...ଜନ୍ମଦିନ ପୂର୍ବରୁ ମଲାଇକାଙ୍କ ସହ ପ୍ୟାରିସ୍ ଗଲେ ଅର୍ଜୁନ, ଭିଡ଼ିଓ ଭାଇରାଲ
ଏହା ମଧ୍ୟ ପଢନ୍ତୁ...ଏୟାରପୋର୍ଟରେ ଅରବାଜଙ୍କୁ ଆଲିଙ୍ଗନ କଲେ ମଲାଇକା, ଭିଡିଓ ଭାଇରାଲ
ସୂଚନା ଅନୁସାରେ, ଉଭୟଙ୍କ ସାକ୍ଷାତ ଅରବାଜଙ୍କ ଆଗାମୀ ଚଳଚ୍ଚିତ୍ର 'ପାଟନା ଶୁକ୍ଲା' ସେଟରେ ହୋଇଥିଲା । ହେଲେ ସେମାନେ ନିଜ ସମ୍ପର୍କକୁ କିଛି ଦିନ ଧରି ଗୋପନ ରଖିଥିଲେ । ବର୍ତ୍ତମାନ ଅଚାନକ ବିବାହ ବନ୍ଧନରେ ବାନ୍ଧି ହେବା ନେଇ ଫ୍ୟାନ୍ସଙ୍କୁ ଖୁସି ଖବର ଦେଇଛନ୍ତି । ତେବେ ଅରବାଜ ଖାନ ପୂର୍ବରୁ ମଲାଇକା ଅରୋରାଙ୍କୁ ବିବାହ କରିଥିଲେ । ୧୯୯୮ରେ ଅରବାଜ ଓ ମଲାଇକା ବିବାହ ବନ୍ଧନରେ ବାନ୍ଧି ହୋଇଥିବାବେଳେ ୨୦୧୭ରେ ଉଭୟଙ୍କ ବିବାହ ବିଚ୍ଛେଦ ହୋଇଥିଲା । ଅରବାଜ ଓ ମଲାଇକାଙ୍କର ଗୋଟିଏ ପୁଅ ମଧ୍ୟ ରହିଛି । ସେପଟେ ଅଭିନେତା ଅର୍ଜୁନ କପୁରଙ୍କ ସହ ମଲାଇକା ରିଲେସନକୁ ନେଇ ବର୍ତ୍ତମାନ ଚର୍ଚ୍ଚା ଜୋର ଧରିଛି । ଏହାକୁ ନେଇ ଅର୍ବାଜ ଖାନ ପରିବାରବର୍ଗଙ୍କ ପକ୍ଷରୁ କୌଣସି ପ୍ରତିକ୍ରିୟା ମିଳିନାହିଁ ।
