ମୁମ୍ବାଇ: ପୁଣି ଚର୍ଚ୍ଚାରେ ଲଭବାର୍ଡ ଅନନ୍ୟା ପାଣ୍ଡେ ଏବଂ ଆଦିତ୍ୟ ରୟ କପୁର । ଦୀର୍ଘ ଦିନ ଧରି ସୋସିଆଲ ମିଡିଆରେ ଏକ ଗୁଜବ ଚାଲିଛି ଯେ ଆଦିତ୍ୟ ରୟ କପୁର ଏବଂ ଅନନ୍ୟା ପାଣ୍ଡେ ପରସ୍ପରକୁ ଡେଟ୍ କରୁଛନ୍ତି । ହେଲେ ଏପର୍ଯ୍ୟନ୍ତ ଉଭୟ ତାରକା ନିଜ ସମ୍ପର୍କ ଉପରେ ନୀରବ ରହିଛନ୍ତି । ଦୁହେଁ ଏକାଠି ଅନେକ ଥର ନଜର ଆସୁଥିବାରୁ ଏହି ଗୁଜବ ସୃଷ୍ଟି ହୋଇଛି । ଗତକାଲି(ବୁଧବାର) ବିଜୟ ସେଥୁପଥୀ ଓ କ୍ୟାଟ୍ରିନା କୈଫଙ୍କ ଷ୍ଟାରର ଫିଲ୍ମ 'ମେରୀ ଖ୍ରୀଷ୍ଟମାସ'ର ସ୍କ୍ରିନିଂ ଅନୁଷ୍ଠିତ ହୋଇଥିଲା । ଯେଉଁଥିରେ ବି-ଟାଉନର ସମସ୍ତ ତାରକା ଅଂଶଗ୍ରହଣ କରିଥିଲେ । ସେହିପରି ଏଥିରେ ଅନନ୍ୟା ପାଣ୍ଡେଙ୍କ ସହ ରୁମର ବୟଫ୍ରେଣ୍ଡ ଆଦିତ୍ୟ ରୟ କପୁର ମଧ୍ୟ ଯୋଗ ଦେଇଥିଲେ । ଯାହାର ଭିଡିଓ ସୋସିଆଲ ମିଡିଆରେ ବେଶ ଭାଇରାଲ ହେଉଛି ।
'ମେରୀ ଖ୍ରୀଷ୍ଟମାସ'ର ସ୍କ୍ରିନିଂରେ ଅନନ୍ୟା ପାଣ୍ଡେ ଓ ଆଦିତ୍ୟ ରୟ କପୁର ଏକାଠି ନଜର ଆସିଥିଲେ । ଏନେଇ ଉଭୟଙ୍କ ଭିଡିଓ କ୍ୟାମେରାରେ କଏଦ ହୋଇଥିଲା । ଭିଡିଓରେ ଅନନ୍ୟା ପାଣ୍ଡେ ଧଳା ରଙ୍ଗର ସୁଟ ପିନ୍ଧିଥିବା ବେଳେ ଆଦିତ୍ୟ ଚେକ୍ ସାର୍ଟ ସହିତ ମାଟିଆ ରଙ୍ଗର ପ୍ୟାଣ୍ଟ ପିନ୍ଧିଥିଲେ । ଏଥିସହ ଏକ ଟୋପି ପିନ୍ଧିଥିବାର ନଜର ଆସିଥିଲେ । ବିଜୟ ସେଥୁପଥୀ ଓ କ୍ୟାଟ୍ରିନା କୈଫଙ୍କ ଆଗାମୀ ଫିଲ୍ମ 'ମେରୀ ଖ୍ରୀଷ୍ଟମାସ' ଇଣ୍ଡଷ୍ଟ୍ରିର ବହୁ ପ୍ରତୀକ୍ଷିତ ଚଳଚ୍ଚିତ୍ର ମଧ୍ୟରୁ ଅନ୍ୟତମ।
ଏହା ମଧ୍ୟ ପଢନ୍ତୁ- କ୍ୟାଟ୍ରିନା ଏବଂ ବିଜୟ ସେଥୁପଥୀଙ୍କ ଆଗାମୀ ଫିଲ୍ମର ପୋଷ୍ଟର ଆଉଟ, ଏହି ଦିନ ହେବ ରିଲିଜ
'ମେରୀ ଖ୍ରୀଷ୍ଟମାସ'ର କାଷ୍ଟ ବିଷୟରେ କହିବାକୁ ଗଲେ, କ୍ୟାଟ୍ରିନା କୈଫ ଏବଂ ଶ୍ରୀରାମ ରାଘବନଙ୍କର ପ୍ରଥମ ତାମିଲ ଚଳଚ୍ଚିତ୍ର 'ମେରୀ ଖ୍ରୀଷ୍ଟମାସ' । ଏହି ଫିଲ୍ମ ଜରିଆରେ ବିଜୟଙ୍କ ସହ ପ୍ରଥମ ଥର ପାଇଁ ସ୍କ୍ରିନ୍ ସେୟାର କରିବାକୁ ଯାଉଛନ୍ତି କ୍ୟାଟ୍ରିନା । କ୍ୟାଟ୍ରିନା ଏବଂ ସେଥୁପଥୀଙ୍କ ବ୍ୟତୀତ ଏହି ଚଳଚ୍ଚିତ୍ରର ହିନ୍ଦୀ ସଂସ୍କରଣରେ ସଞ୍ଜୟ କପୁର, ବିନୟ ପାଠକ, ପ୍ରତୀମା କନ୍ନନ ଏବଂ ଟିନୁ ଆନନ୍ଦ ନଜର ଆସିବାକୁ ଥିବାବେଳେ ତାମିଲ ସଂସ୍କରଣରେ ରାଧିକା ସରତକୁମାର, ଶାନମୁଗାରାଜା, କେଭିନ ଜୟ ବାବୁ ଏବଂ ରାଜେଶ ୱିଲିୟମ୍ସ ପ୍ରମୁଖ ଅଭିନୟ କରିଛନ୍ତି ।
ଏହି ଚଳଚ୍ଚିତ୍ର ଆସନ୍ତା ୧୨ ତାରିଖରେ ମୁକ୍ତିଲାଭ କରିବାକୁ ଯାଉଛି । ଫିଲ୍ମକୁ ସେନ୍ସର ବୋର୍ଡରୁ ୟୁଏ ସାର୍ଟିଫିକେଟ ମଧ୍ୟ ମିଳିସାରିଛି । ତେବେ ଆଦିତ୍ୟ-ଅନନ୍ୟାଙ୍କ ସହ ହିମେଶ ରେଶମିଆ ତାଙ୍କ ପତ୍ନୀ ସୋନିଆ କପୁର ଏବଂ ହ୍ୟାଣ୍ଡସମ୍ ହଙ୍କ ରୋହିତ ସରାଫ ମଧ୍ୟ ଫିଲ୍ମର ସ୍କ୍ରିନିଂ ଇଭେଣ୍ଟରେ ଯୋଗ ଦେଇଥିଲେ । ଏହି ସମୟରେ ବିକି କୌଶଲ ମଧ୍ୟ ପତ୍ନୀ କ୍ୟାଟ୍ରିନା କୈଫଙ୍କୁ ସମର୍ଥନ କରିବା ପାଇଁ କାର୍ଯ୍ୟକ୍ରମରେ ସାମିଲ ହୋଇଥିଲେ ।
