ରାଉରକେଲା: ସ୍ଵଚ୍ଛତା ଅଭିଯାନରେ ବହୁତ ଲୋକ ସାମିଲ ହୁଅନ୍ତି । ଷ୍ଟାର ଓ ନେତା ମନ୍ତ୍ରୀ ମଧ୍ୟ ଏଥିରେ ସାମିଲ ହୋଇ ଚର୍ଚ୍ଚାରେ ରୁହନ୍ତି । କିନ୍ତୁ ଅନେକ ଲୋକ ଏମିତି ଅଛନ୍ତି ଯେଉଁମାନେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଭିଯାନ ଆଗରୁ ଏହି କାମରେ ନିଜକୁ ନିୟୋଜିତ କରିଛନ୍ତି କିନ୍ତୁ ସେମାନେ କେବେ ଚର୍ଚ୍ଚାକୁ ଆସିବାକୁ କିମ୍ବା ବାଃ ବାଃ ପାଇବାକୁ ଏହି କାର୍ଯ୍ୟ କରି ନାହାନ୍ତି । ସେମିତି ଜଣେ ବ୍ୟକ୍ତି ହେଉଛନ୍ତି ରାଉରକେଲା ସେକ୍ଟର-6 ର ସୁରେନ୍ଦ୍ର ସୁନା ।
ସେକ୍ଟର-6 ଶନି ମନ୍ଦିର ପାଖରେ ରାଉରକେଲା ଇସ୍ପାତ କାରଖାନା ଦ୍ବାରା ତିଆରି କରାଯାଇଥିବା ମାର୍କେଟରେ ଝାଡୁ କରୁଥିବା ସୁରେନ୍ଦ୍ର ସୁନା ଅନେକ ଦିନ ହେଲା ପୁରା ମାର୍କେଟରେ ଝାଡୁ କରୁଛନ୍ତି । ସକାଳୁ ସେ ଶନି ମନ୍ଦିର ପାଖରେ ଝାଡୁ ଦେବା ସହିତ ପୁରା ମାର୍କେଟରେ ଝାଡୁ କରି ସେହି ଅଞ୍ଚଳକୁ ସଫା କରନ୍ତି। ସେ ଝାଡୁ କରିବା ପରେ କାହାରି ଠାରୁ ଟଙ୍କା ଅଧ୍ୟ ମାଗନ୍ତି ନାହିଁ।
ଠାକୁରଙ୍କ ଡୋରି ଲାଗିଛି ତେଣୁ ସେ ବହୁତ ବର୍ଷ ହେଲା ଏହି କାମ କରନ୍ତି ବୋଲି କହିଛନ୍ତି ସୁରେନ୍ଦ୍ର। ମାର୍କେଟରେ ଦୋକାନୀ ମାନେ ମଧ୍ୟ କୁହନ୍ତି ଯେ ସୁରେନ୍ଦ୍ର ଏଠାରେ ନିଜେ ଆସି ପୁରା ମାର୍କେଟକୁ ଝାଡୁ ଦେଇ ସଫା କରିବା ପରେ ଚାଲି ଯାଆନ୍ତି।
ରାଉରକେଲାରୁ ରାଜେନ୍ଦ୍ର ନାଥ ମିଶ୍ର, ଇଟିଭି ଭାରତ
