ପୁରୀ: ପିସିସିର ନୂଆ ସଭାପତି ଶରତ ପଟ୍ଟନାୟକ ପୁରୀ ଗସ୍ତରେ ଆସି ଶ୍ରୀମନ୍ଦିରରେ ମହାପ୍ରଭୁଙ୍କ ଦର୍ଶନ କରିଛନ୍ତି । ମହାପ୍ରଭୁଙ୍କ ଆଶୀର୍ବାଦ ନେଇ ପୁଣି ସେ ରାଜ୍ୟରେ କଂଗ୍ରେସ ସଂଗଠନକୁ ତୃଣମୁଳ ସ୍ତରରୁ ମଜଭୁତ କରିବେ ବୋଲି କହିଛନ୍ତି । ନବୀନ ସରକାରରେ ରାଜ୍ୟରେ ଗରିବୀ, ଚାଷୀ ମାରଣ ନୀତି, ବେକାରୀ, ସରକାରୀ ଅଫିସରେ ଦୁର୍ନୀତି ବୃଦ୍ଧି ପାଇଥିବା ଅଭିଯୋଗ ହୋଇଛି । ଏଭଳି ପ୍ରସଙ୍ଗକୁ ନେଇ ଅଗାମୀ ଦିନରେ ବିଜେଡିକୁ ଗାଦିରୁ ହଟାଇବା ପାଇଁ ବ୍ୟାପକ କାର୍ଯ୍ୟକ୍ରମ କରାଯିବ ବୋଲି ନୂଆ ପିସିସି ସଭାପତି ଶରତ ପଟ୍ଟନାୟକ କହିଛନ୍ତି ।
ସେହିପରି କେନ୍ଦ୍ରରେ ଥିବା ମୋଦି ସରକାରଙ୍କ ଗରିବ ମାରଣ ନୀତି, ଅତ୍ୟାବଶ୍ୟକ ସାମଗ୍ରୀର ଅହେତୁକ ମୂଲ୍ୟ ବୃଦ୍ଧି ଯୋଗୁ ଜନସାଧାରଣ ଅତିଷ୍ଠ ହୋଇଥିବା ନେଇ ନୂତନ ପିସିସି ସଭାପତି ଅଭିଯୋଗ କରିଛନ୍ତି । ଜନସାଧାରଣଙ୍କ ପୁଞ୍ଜିଭୁତ ଅସନ୍ତୋଷକୁ ପାଥେୟ କରି ବିଜେପି ବିରୋଧରେ କଂଗ୍ରେସ ଲଢେଇ କରିବ ବୋଲି ପିସିସି ସଭାପତି କହିଛନ୍ତି । ଅଗାମୀ ଦିନରେ କଂଗ୍ରେସକୁ ମଜଭୁତ କରିବା ପାଇଁ ପ୍ରୟାସ କରିବ କଂଗ୍ରେସ ।
ତାସହ ଆଗାମୀ ୨୦୨୪ ନିର୍ବାଚନକୁ ଆଖି ଆଗରେ ରଖି କଂଗ୍ରେସକୁ ସଂଗଠିତ କରାଯିବ । ପିସିସି ସଭାପତି ହେବା ପରେ ପ୍ରଥମ ଥର ପାଇଁ ପୁରୀ ଗସ୍ତ କରିଛନ୍ତି ଶରତ ପଟ୍ଟନାୟକ । ଏହି ଅବସରରେ ଜିଲ୍ଲା ସଂଗଠନ ପକ୍ଷରୁ ତାଙ୍କୁ ସମ୍ବର୍ଦ୍ଧିତ କରାଯାଇଛି । ଶତାଧିକ କର୍ମୀଙ୍କ ସହ ପ୍ରଥମେ ଅଠରନଳାରୁ ବାଇକ ଶୋଭାଯାତ୍ରା ଓ ମାର୍କେଟ ଛକରୁ ପଦଯାତ୍ରାରେ ଆସି ମହାପ୍ରଭୁଙ୍କୁ ଦର୍ଶନ କରିଛନ୍ତି ପିସିସି ସଭାପତି ଶରତ ପଟ୍ଟନାୟକ ।
ଇଟିଭି ଭାରତ, ପୁରୀ
