ପୁରୀ: ସରିଛି କାର୍ତ୍ତିକ ବ୍ରତ । ଘର ବାହୁଡା ହବିଷ୍ୟାଳି । ନିଜ ନିଜ ଘର ଲୋକଙ୍କ ଦାୟିତ୍ବରେ ଘରକୁ ଫେରୁଛନ୍ତି । ଦୀର୍ଘ 1ମାସ ଧରି ଶ୍ରୀକ୍ଷେତ୍ରରେ କାର୍ତ୍ତିକ ବ୍ରତ ପାଳନ ପରେ ଆଜି ଏଠାରୁ ବିଦାୟ ନେଉଛନ୍ତି । ଦିନକୁ ଥରେ ହବିଷ୍ୟାନ ଗ୍ରହଣ କରି ନିଷ୍ଠାର ସହ ପାଳନ କରିଥିଲେ କାର୍ତ୍ତିକ ବ୍ରତ । ତେବେ ଘରକୁ ଯିବାକୁ ଯେତିକି ଆନନ୍ଦ ସେତିକି ଦୁଃଖିତ ଦେଖିବାକୁ ମିଳିଛି ।
ଦୀର୍ଘ 1 ମାସ ଧରି ହିବଷ୍ୟାଳି କ୍ୟାମ୍ପରେ ହଜାର ହଜାର ହବିଷ୍ୟାଳି ସାଥୀଙ୍କ ସହ ସକାଳୁ ଉଠି ଚଉରା ପୂଜା କରୁଥିଲେ । ଏହା ପରେ ରାଇ ଦାମୋଦର ପୂଜା, ଜଗନ୍ନାଥ ଦର୍ଶନ, ସନ୍ଧ୍ୟାରେ ପୁରାଣ ପାଠ, ମହାପ୍ରସାଦ ସେବନକୁ ନେଇ ବେଶ ଆନନ୍ଦରେ ସମୟ କଟାଇଥିଲେ । ଯାହାକୁ ନେଇ ପରବର୍ତ୍ତି ସମୟରେ ଏହାକୁ ମନେ ପକାଇବେ । ଆଉ ସବୁ ଦିନ ପରେ ଜଗା ଦର୍ଶନ ମିଳିବ ନାହିଁ ବୋଲି ସେମାନେ ଦୁଃଖ ପ୍ରକାଶ କରିଛନ୍ତି । ଆଉ ପୁଣି ଆର ବର୍ଷକୁ ଦେଖା ହେବା ନେଇ ବିଦାୟ ନେବା ପୂର୍ବରୁ ପରସ୍ପର ଆଲିଙ୍ଗନ କରିଥିଲେ । ଏପରିକି ନିଜର ମନର ଭାବନା ପ୍ରକାଶ କରିଛନ୍ତି । ଏଥିସହ ହବିଷ୍ୟାଳି କ୍ୟାମ୍ପରେ ସରକାରଙ୍କ ବ୍ୟବସ୍ଥାକୁ ପ୍ରଶଂସା କରିଛନ୍ତି ହବିଷ୍ୟାଳି ।
ଚଳିତ ବର୍ଷ ରାଜ୍ୟ ସରକାର ପୁରୀରେ 3ଟି ହବିଷ୍ୟାଳି ଶିବିର କରାଯାଇଥିଲା । ରେଳ ଯାତ୍ରୀ ନିବାସ, ମୋଚି ସାହି କଲ୍ୟାଣ ମଣ୍ଡପ ଓ ନରେନ୍ଦ୍ର କୋଣ ହବିଷ୍ୟାଳି ଶିବିରରେ 26 ଶହରୁ ଅଧିକ ହବିଷ୍ୟାଳିଙ୍କ ରହିବାର ବ୍ୟବସ୍ଥା ହୋଇଥିଲା । ଏହି ଶିବିରରେ ମାଗଣା ଶୋଇବା ପାଇଁ ଗଦି, ତକିଆ, କମ୍ବଳ ସମେତ ମହାପ୍ରସାଦ ସେବନ, ରାଇ ଦାମୋଦର ପୂଜା ନେଇ ବ୍ରାହ୍ମଣ ବ୍ୟବସ୍ଥା ଏବଂ ଜଗନ୍ନାଥ ଦର୍ଶନ ନେଇ ବସ ସମେତ ଗାଇଡ଼ର ବ୍ୟବସ୍ଥା କରାଯାଇଥିଲା । ସନ୍ଧ୍ୟା ବେଳେ ପୁରାଣ ପାଠ ସମେତ ପାଲା, ଦାସ କାଠିଆ, ପ୍ରବଚନ ଆଦି କାର୍ଯ୍ୟକ୍ରମ ଆୟୋଜନ ହୋଇଥିଲା । ସୁରକ୍ଷା ପାଇଁ ପୋଲିସ ସମେତ ଅଗ୍ନିଶମ ବ୍ୟବସ୍ଥା ମଧ୍ୟ ହୋଇଥିଲା ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
